انا في وظيفة حاليا وقدمت طلب عدم تجديد العقد رسميا لهم.
وفي نفس الوقت جاني عرض قوي جدا بالنسبة لراتبي الحالي والبونس من شركة صينية !
الامر المحير واخذت ضمانات منهم وكانوا واضحين معي من البداية وانا كذلك
ان حاليا مالهم تواجد في السعودية كسجل تجاري فما راح يوفروا تامين طبي او تامينات اجتماعية الى حين دخولهم ( ووعدوني خلال 6 شهور راح يكون لهم هالشي ويوفروا هالاشياء)
المهم بطبيعة الحال الرواتب راح تكون بالدولار وتحويل , وسبق ان قال لي صديق قديم اني افتح حساب بالدولار في احد البنوك المحلية
تأكد هل الموضوع صحيح أو الوظيفة وهمية ، لأن الموضوع مريب .
و إذا كانوا مهتمين جدًا ، شوف هل فيه مكتب لهم في أحد دول الخليج ،بحيث يكون عقدك تبع الدولة و تكون كأنك في assignment وتشملك كل المميزات المتوفرة في العقد من تأمين و غيرها ، ما ادري اذا هذا الشي موافق لأنظمة وزارة العمل لكن من قبل انعرض على واحد من الشباب عقد عمل مع شركة عالمية وكان مسجل كعقد عمل في أبوظبي .
الي فهمته إن هالشي تسويه بعض الشركات الي مركزها الرئيسي في الامارات مثلا و شغلها في السعودية بسيط .
أو تقترح لهم إن تشتغل معهم part time ، إلى أن يدخلوا السوق و تتحول لـ Full time
طبعا البارت تايم مب لازم يكون كل يوم دوام بساعات معينة . ممكن يكون بالأيام مثلا تشتغل في الويكند فقط .
وبكذا بيكون عندك دخل ثاني غير وظيفتك الحالية + بتضمن شيئ في يدك بحيث لو لاسمح الله أخلفوا في وعدهم ماراح تكون بدون وظيفة وتروح عليك 6 شهور غير مسجلة في التأمينات .
ارسل سؤالك لهذا الحساب وهو راح ينشره وبتحصل آراء كثيرة ومن أشخاص أصحاب خبرة
الوظيفة غير وهمية انا تاكدت بنفسي والوظيفة جتني من موظفة ال HR بنفسها عن طريق تقديم في لينكدين
الشركة الان تتعامل مع احد الهيئات الحكومية بشكل مباشر واذا دخلت موقع الهيئة راح تحصلهم هناك , طبعا هم وعدوني وقالوا اننا شغالين على ان يكون لنا سجل تجاري هنا وراح نوفر كل متطلبات وزارة العمل من تامين طبي واجتماعي
طبعا الشركة الان تحاول تتوسع فحصلت الفرصة وتواصلوا معي , حاليا موظفينها قليل جدا في السعودية تقريبا 3
تواصلت مع احدهم عشان حبيت اطمئن اكثر وبالفعل اعطاني رقمه وتكلمنا عن كل شي وقالي عن نفس كلامهم لي وانهم جالسين يشتغلون وان الرواتب تصرف في وقتها وكل شي
ولما تكلمت مع الشركة قالت العقد راح يكون كونتراكتور حاليا لين يكون لنا سجل تجاري , فيعني حتى الراتب راح يجيني تحويل من دولة بالخارج وبالدولار( طبعا هالكلام تاكدت منه من الموظف السعودي اللي تواصلت معه)
مع العلم ان خطوات التوظيف كانت طويلة شهر تقريبا وكلها مقابلات بالفيديو في سكايب مع 3 مسؤولين في الشركة + الشركة معروفة في مجالها وانا بالاساس حصلت الفرصة عن طريق تقديم عليها في لينكدين وكانوا المتقدمين عليها فوق 200 شخص
الأفضل ماتفصل من عملك الحالي لين تضمن وتثق بالوظيفة الجديدة.
بما أنها كونتراكتر ومالها سجل تجاري محلي ف يمدي تتوظف فيها و تظل بوظيفتك السابقة في نفس الوقت.
أعتبرها بمثابة Remote job
اللي تسويه ببساطة خذ اجازة اسبوع وابدأ في “الشركة الصينية” & test the water
بحكم وضع الشركة الحالي, فما راح يطلبون منك أي إثبات بإزالة اسمك من التأمينات, اثبات الاستقالة … الخ (مالهم حق يطالبون ب أوراق نظامية محلية لأنهم جهة مجهولة - على الأقل الآن).
طريقة أخرى, بحكم أنها تتعامل مع جهة حكومية في المملكة, ليش مافكرت تتواصل مع الجهة الحكومية وتبني العقد معهم كونتراكت؟ أعتقد كذا الموضوع بيكون أبسط و أضمن بس ما أعرف عن امكانية حصوله وخياراتك معهم.
بالنهاية بوضح لك شغلة ممكن تكون غافل عنها
عدم وجود سجل تجاري للشركة معناته يسقط حق حمايتك كموظف في المملكة, بمعنى أصح: أنظمة وزارة العمل لايمكن تطبيقها عليك.
شخصياً بالنسبة لي أكون في حماية ورعاية وزارة العمل وحقوقي واضحة ومعروفة أهم بكثير من الراتب واسم الشركة.
سؤال جانبي: لأي درجة الشركة الحالية سيئة تجعلك تخطو بهذه المخاطرة؟
بما إنها حسب ماذكرت فالحل الأمثل انك خليك في وظيفتك الحالية وأقبل بالوظيفة الجديدة وشوف جدية الأمر وبعدها تصرف مع وظيفتك الأولى. أنا ما أشوف في سبب انها تكون وهمية خصوصاً انهم ماطلبوا منك مبالغ او تحويلات وما شابه ذلك. الله يوفقك يارب.
الوعود مالها امان ولا تُعتبر مضمونة اذا ما كانت رسمية ، ممكن بعد 6 شهور يقولون لك لا زلنا في الاجراءات والموضوع تحت الدراسة … الخ
في الوظايف والأمن المالي الواحد ما يخاطر الا وعنده شي مضمون
كيف ما تتسجل بالتأمينات ؟ الكونتراكتر ما يسوي لك تأمين ولا بينكم عقد؟ اذا بينكم عقد يعني راح تكون موظف عند الكونتراكتر بشكل رسمي مدري ليه يوعدونك وما يعطونك تأمين + دام سهل عليهم يعطوك راتب عالي ليه صعب عليهم يدبرون لك تأمين؟ ولو عن طريق الكونتراكتر ترى يقدرو
ما انصحك تبني مستقبلك وامآلك على عبارة (وعدوني) دام ما بينكم شي رسمي اعتبرها سواليف
المشكلة ان ما عندي القدرة اني امسك الوظيفتين مع بعض شي متعب جددددا
غير ان هالوقت في العقد المناسب للخروج لو تاخرت شوي بيكون فيها موافقة ورفض وتعويض ومشاكل
الشركة لازم تدخل بسجل تجاري اذا تبغى تتوسع عشان تدخل في مناقصات حكومية لانه ممنوع عليها وسالت عن وضعهم في السوق وعندهم ارباح فالوضع من هالناحية مطمئن لي
وانا بالاساس ابلغت شركتي الحالية باني لن اجدد العقد
أعرف حاله مشابهة حصلت لأحد الزملاء من عدة سنوات كانت مع شركة أوروبية تعمل بالسعودية لكن ما عندها سجل تجاري
وكان يشتغل من بيته حسب حاجة العمل والعرض المقدم كان مغري جدا من الناحية المالية
بالبداية كانوا يعطونه الراتب لكن بعد فترة قليلة صاروا ما يعطونه شيء وكل مرة يتحججون بأسباب جديدة لسبب التأخير
والشخص عنده التزامات مادية ما يقدر ينتظر إلى أجل غير مسمى ولا يقدر يشكيهم لأن الشركة فعليا ليس لها وجود رسمي
وكان الحل تقديم الشكوى بالإمارات لأن لهم مكتب هناك
عموما الرجال تركهم وراح يشتغل بمكان ثاني وإلى يومك ما أخذ حقوقه من الشركة حسب علمي
الخلاصة ، إذا كان عملك الحالي لا بأس به وتقدر تكمل معهم انسى الشركة الصينية
لكن إذا لديك من المهارات والشهادات المميزة اللي تقدر بسببها تحصل على فرصة وظيفية أخرى بوقت قليل لا مانع من المخاطرة
بالتوفيق