السلام عليكم…
دخلت المنتدى لقيت ان فيه الكثير من المعلومات المهمة وكيفية قبول العرض ورفضه وغيرها من مواضيع مهمة للخريجين لهذا سجلت…
أنا مهندس برمجيات خريج سعود متخرج هالسنة بعد ما تخرجت توظفت بعدها بشهر تقريبًا…
راتبي مع البدلات وكل شيء 14767 ريال متوظف لي 4 شهور تقريبًا…
المشكلة ان كل راتبي بدلات بدرجة انهم حاطين بدل ندرة 3000 ريال … خيييير ندرة مييين يا قلبي وأنا توي خريج …!
راتبي الأساسي 6390 ريال فقط من 14767 …اقل من النصف …!
هل هذا الشيء يضرني وهل هو سيء وليش يسوون كذا …!؟
أولاً مبروك الوظيفة ومنها للاعلى ان شاء الله …
الامر الاخر انا ماني عارف وين المشكلة لو كان راتبك بدلات 
خصوصا انه ماشاء الله راتب اكثر من ممتاز بالنسبة لخريج جديد …
بل على العكس ليته يوصل ٢٠ ويكون كله بدلات وين المشكلة وانا اخوك؟
خذ كمثال موظف شركات السيرفس الاساسي عنده ١٠ والبونص يوصل الراتب ١٦ و ١٧ …
انا مستغرب انزعاجك من بدل ٣٠٠٠ وكانه مصيبة ههههههه الناس تدور البدلات والبونص والانتدابات وانت متأذي 
بالنهاية تقدر تاخذ خبره بعد مده معينة وتطلع للمكان اللي تشوفه مناسب لك.
ربنا يوفقنا وياك لكل خير 
وعليكم السلام ورحمة الله وبركاته
مثل ما ذكر الأخوان ، كبداية بحياتك المهنية ما يضرك أن راتبك أغلبه بدلات
لكن فيه بعض السلبيات بهذا الموضوع ، فمثلا على سبيل المثال لا الحصر:
١- الراتب التقاعدي أو راتب العجز المهني - لا قدر الله - يعتمد على راتبك الأساسي بنسبة كبيرة وإذا كان الأساسي قليل ، بيكون الراتب التقاعدي قليل أيضا.
٢- العلاوات والترقيات غالبا تكون نسبة مئوية من راتبك الأساسي ، فلو كانت بدلاتك مبلغ ثابت ما راح تزيد بنفس النسبة. فعلى سبيل المثال لو أخذت علاوة 10% وكان بدل الندرة غير مرتبط بالأساسي ، بيزيد الأساسي تقريبا 640 ريال وبدل الندرة ما تغير.
٣- لو رغبت بالانتقال إلى جهة أخرى ، بعض الجهات تفاوضك على راتبك الأساسي فقط ولا تنظر لبدلاتك الأخرى. فهذي الحالة ممكن يجيك عرض زيادة 50% على راتبك الأساسي لكن يصير الإجمالي نفس راتبك الحالي.
الجهات تسوي هذا شيء لأنه أوفر لها كمصاريف على الموظف مثل اشتراك التأمينات الاجتماعية ولو لا قدر الله صارت ضائقة مالية بالجهة ، يقدرون يلغون البدلات هذي بسهولة مقارنة بتخفيض راتبك الأساسي. مثلا بدل الندرة يقدرون يقولون بأي وقت خلاص ما يحتاج نصرفه لأن فيه غيرك كثير وتخصصك غير نادر الآن.
أرجوا ما تفهم من ردي أنهم خدعوك أو أني أنصحك ما تكمل بالجهة. بالعكس ، راتبك ما شاء الله جيد جدا كحديث تخرج وحاليا ما يضرك هذا الموضوع. أنت ببداية المشوار الوظيفي ، طور واثبت نفسك ومع الوقت بإذن الله ستنفتح لك فرص أفضل بعملك الحالي أو غيره
صحيح الراتب ككل ممتاز لكن أفهم تخوفك. خاصةً اذا في بدلات غير مذكورة في العقد، أو مثلاً بدل الندرة هذي تروح كلها في اي وقت.
اللي تقدر تسويه انه في كل فترة زيادة أو في حال الترقية تحاول تخليهم يرفعون الأساسي… هذا اذا ما كان عندهم سلم ثاتب.
يا هلا اخوي Arsenalist
الفكرة أن بدل الندرة هذا حاطينه حتى يزيدوا الراتب (متوسط راتب الخريج في مجالي 14000 ريال تقريبًا مو بكيفهم السوق فارض عليهم لان مطلوب يتسعود بالكامل)…
ليش ما يخلونه راتب اساسي مو بدل مع أن ماله معنى وواضح انه زيادة راتب وماودهم يزيدونه الأساسي تبعي…
ثم الراتب الأساسي مقارنه بالأجمالي فرق كبير…
ترى فيه بدلات خنفشارية غير بدل الندرة هذا…
هلا اخوي…
هو فيه جوانب سلبية وايجابية لما فكرة فيها…
الإيجابي:
خصم التأمينات صار اقل … بدال ما ياخذون مني 10% كاملة صاروا ياخذون قرابة 6% (بدل السكن محسوب مع الراتب الأساسي في التأمينات) راتبي صار شبه كامل
وهذا شيء جيد لي كوني خريج باقي لي سنوات طوال بأني لحتى اسفيد من التأمينات لحتى التقاعد فياخذون جزء بسيط مني مو ياكلوني 25 سنة ثم يعطوني ما قدمته لهم… ممكن يكون الراتب الأساسي غير مقبول ابدًا يكون بهالوضع بعد 20 سنة خبرة لما اقرب للتقاعد(أنا قطاع خاص ماراح اجلس في الشركة اكثر من 3 سنوات اكيد فمايهمني الراتب الأساسي بالتقاعد)
السلبيات وهي للي معقدتني:
لما ابي اطلع من الشركة راح يسألوني عن الراتب الأساسي وهذا يزعجني لأن راتبي غريب الأطوار ما اعتقد فيه مثله كذا فبياخذون الأساسي ويطوني راتب قليل…(هذا ماصار مع اي واحد في الشركة طلع وهو في وضعي كلهم فوق 20 الف …حسب ما سمعت لما سألت)…
مع انهم لو سألوني بذكر الأساسي ثم بذكر الراتب الكلي بعدها على طول ممكن يفيدني…
الشركات الخاصة تخاف منها ودك تطلع لما تحس بأي شيء غريب يصير…فالراتب الأساسي بهالحالة مهم بالتفاوض ومثل ما قلت ان ممكن يسحبون بدل مع اني ما اعقد لان الكل يطلع محد يجلس اكثر من سنتين…اذا قللوه محد بيجلس عندهم في شح في المؤهلين من السعوديين…
هالموضوع فتحته حبيت اعرف لو فيه شيء انا ما اعرفه يضرني او شيء من هذا لان بدلاتهم مالها اي معنى والشركة ذي فيها فساد وكذب وخداع للحكومة بشكل ما يتصور … مشكور ما قصرت اخوي…
اهلا اخوي…
الترقيات ما تكون كذا… هم يرفعون من الراتب الأساسي بالأرقام مو بالنسب… يعني 1000 ريال بالسنة حسب تقييمك مثلا… وهذا شيء جيد ما يضرني قلة الأساسي… لو كان نسبة مشكلة…
ثم حسب ما قال المدير راح يرفعني لوضيفة اعلى بعد سنة اذا اجتهدت وهي براتب ثابت بس ما ادري كم بس مو زيادة على نفس الراتب … بعقد جديد اعتقد…
اولا مبروك الوظيفه
ثانيا بعطيك نصيحه اذا اعجبتك كان بها
ما اعجبتك انساها
شوف مثل الشركات الكبيره مثل ارامكوا وسابك ومعادن وتصنيع ووووو الخ والشركات الاجنبيه مثلا سيسكو واوراكل وديل واتش بي سلم رواتبهم خاص فيهم او خلينا نقول واضح وثابت من الخريج الى البروفيشنال اكسبيرينس … احس من ردك انك مكبر السالفه جدا ومخوف نفسك من لا شيء … ومتوتر
ي عزيزي انت خريج ابدا معاهم واشتغل على نفسك وطور نفسك سنه وسنتين وثلاث معاهم ثم قدم ، انا كنت في شركه تعتبر كبيره بمجال IT ومعطيني الاساسي ٥ الاف
بعد سنه رحت لشركه اعطوني الاساسي بحدود ٩ لان هذا سلم الوظيفي حقهم …
التوتر الي انت فيه بيحطك في دائرة الخوف والتفكير وووو الخ والله العظيم راح ياثر عليك وياثر على عملك وحماسك
مالك دخل بالبدلات اهم شيء راتبك يمشي وتاخذ حقك هذا المهم لكل شركة سلم وظيفي هم لهم الاحقيه يسون الي يبون … مكتب العمل شرطه يكون بالعقد اساسي وبدل سكن وبدل نقل … كيف يقسمونه هم احرار .
لا تضغط ع نفسك وانت توك باالبدايه راتبك ممتاز ماشاء الله … اشتغل ع نفسك وطور نفسك لان الخبره هي الي بتفتح لك ابواب اكثر ان شاء الله .
هم حراميه نصابين … بحريقه تحرقهم انت امام فرصه ما تتعوض اكسب خبره وضبط وضعك وخذ الخبره وقدم
الله يوفقك وييسر امرك
فهد اسمع الله يوفقك .
انا اكلمك عن خبرة اكثر من 13 سنة واشتغلت في شراكات واجد … هذي الشركة الي انت فيها باختصارمع احترامي لك ( شركة وصخة ) .
مسوين الحركة هذي عشان ساعة الاوفر تايم تكون اقل وكل بدل لك يكون اقل . شوف الملاعين بدل ندرة ههههههههه حسبنا الله قصو راتبك وحطوة بدل ندرة عشان ماترتفع باقي البدلات.
تعلم ياصديقي ان تكون مفاوضاتك على اي راتب تكون على ( Basic salary الراتب الاساسي ) لا تفاوض في شي غير الراتب الاساسي لانة كل مازاد الراتب الاساسي كل شي يزيد من البدلات كل شي بدل النقل وبدال السكن وبدل رموت ايريا بدل شفت بدل الخ . حتى بدل الندرة يزيد ههههههههه
الحركات هذي تسويها الشركات السيئة .
الله يوفقك .
…
تسلم اخوي وياك التوفيق يارب…
صحيح كلامك الخبرة في مجالنا مهمه و الشركات مو ام حنون يدورون مصلحتهم فوق كل شي ادا ماكنت فاهم وعندك خبرة وقيمة داتيه تميزك راح ياكلوك ويظلموك ويمسكوك الباب بأي وقت ومايهتموا بحقوقك وبرضاك من عدمه وتكون علاقتهم فيك استغلالية ولا تقدر تتكلم على اي ظلم في حقك لان ماعندك بديل ومو هامهم انت لانك مجرد رقم… لازم تسلح عمرك باسرع وقت…
هههههه وياك التوفيق يارب
راتبي مثل بقية الخريجين حنا 4 وكلنا نفس العرض لهدا ما اقدر افاوض ماعندي اساس للتفاوض فيه عنهم…مافيه شيء يميزني…
الشركة صح قعيطية ووصخة بشكل ماتتصورة ولكن بصراحة قبل شهر عطوني دورة قيمتها 8500 واخدت شهادتها والدورات بالطريق…
فيها تطوير ولكن يوظفونك في وظيفة يقوم فيها 4 ويقنعون الكلاينت بان فيه 4 فعلا يقومون بدوري وقبل اي ميتينق يعطوك لسته من الكدبات لا تعد ولا تحصى وبس يجي الكلاينت يجيبوا موظفين من بقية الاقسام عندنا ليزيدوا العدد بس يروحوا ابقى لوحدي هههههه وماشيه الحياة
مافيها شيء يبن الحلال وترى اعرف مهندسين رواتبهم ٤ الى ٥ الاف وماعندهم بدلات.
مايأثر ان شاء الله
لو انتقلت لشركة اخرى بتطالع في خبرتك وليس راتبك