رواتب المهندسين !!!

Career
1

السلام عليكم

مثل ماتشوفوا الوضع جميع التخصصات سواء بكالوريس دبلوم في اي تخصص هندسه , حاسب, قانون, فني في اي مجال, كيمياء, اداره,محاسبين او hr حتى خدمه العملاء او الكاشير في بعض المطاعم او غيرهم … رواتبهم مثل راتب المهندسين في اغلب الشركات او بفرق جدا بسيط طبعا ماقصد الشركات الي تنعد على الاصابع مثل ارامكو وشركات السيرفيس الرقوق وكذا … اقصد باقي الشركات الي عددها كبير وماتعطي راتب مستحق للمهندسين يكون الافرج للراتب تقريبا 8000 الف حاله حال اي موظف اخر في تخصص اخر. ممكن احد يفهمني ايش الفرق ؟ لانه الدراسه اصعب والشغل متعب جدا والشركات موقاعده تعطينا راتب قد التعب وفوق كذا كل شي حولنا يغلا سعره الدنيا في غلا والرواتب تقل. والي قاهرني بعد كان من اول عجل درست بزنس مثلا اسهل واريح لي واستلم نفس الراتب للمهندس …

الي يعرف الفروقات او اي شي ايجابي للمستقبل المهندس يفيدني لانه هالشي قاهرني ومحطمني . وهذا من احد الاسباب الي تخلي الخريجين ينظرون لشركات مثل ارامكو وغيرها تقدم راتب افضل

2

وعليكم السلام

شوف ما ألومك لما تنقهر لما تشوف راتب المهندس ضعيف وبعض الوظائف من تخصصات ثانية مثلا براتب أعلى
لكن الموضوع ماله علاقة بالتخصص ، الموضوع سببه الشركات نفسها
يعني كحديث تخرج وتحس إنك مغبون بسبب راتب ضعيف فما بالك بوظيفة مهندس خبرة وراتب 10 آلاف بينما مهندس حديث تخرج في شركة ثانية الفل باكج يوصل 15 الف ومميزات ثانية ؟

فالموضوع ماله علاقة بالتخصص ، اكيد الهندسة البعضهم يشوفها أصعب من بعض التخصصات الإدارية و الي في التخصصات الصحية يشوفها اصعب من الهندسة و كل واحد يشوف تخصصه صعب وتعب فيه وهذا من حقه . لكن العلة باختصار مب في التخصص

العلة في نظام الشركات و رواتبها ،

طبعا الشركات أنواع :

- شركة صغيرة وتعطي رواتب منخفضة لأن هذي ميزانيتها ( ممكن ينضم لها الواحد ويتقبل الموضوع ويبحث عن فرصة أفضل بعد مايكسب خبرة فيها )

- شركة أرباحها كبيرة لكن سلم الرواتب ضعيف والإدارة متعمدة ( حاول تتجنبها و لا تدخلها إلا لو كنت مضطر وظليت فترة طويلة بدون وظيفة وتالي حاول تنتقل لفرصة افضل )

- شركة كبيرة الأرباح عالية وسلم الرواتب قوي ( تمسك فيها وحاول تترقى لأعلى المناصب فيها و حاول تنتقل لشركات مشابهة لها لأن الانتقال ماراح يصير إلا بفرق محترم في الراتب )

طبعا في شركات تحاول تستغل المتقدمين خاصة حديثي التخرج و في المقابلة لو تم ذكر الراتب و اعترضت عليه راح يقولون لك ترا فيه أشخاص بمؤهلات أعلى وأفضل منك قبلوا في العرض
و لو ماقبلته ترا في 10 غيرك ينتظرون هالفرصة . هالنوعية من الشركات اعرف إنها سيئة وحتى لو قبلت بالعرض غالبا ماراح تطول معاهم أكثر من سنتين.

يعني من الدليل إن المشكلة هي بسبب أنظمة الشركات ، اعرف موظفين في وحدة من الشركات عندهم نفس الخبرة و الاثنين بنفس المسمى الوظيفي لكن الفرق بين راتبهم أكثر من 5 آلأف ! الفرق الوحيد بينهم إن واحد منهم انضم للشركة بعد تعديل الرواتب و الثاني قديم .

تقريبا لي 3 سنوات من تخرجت واشتغلت في اكثر من شركة ، الي اقدر اقولك إياها كحديث تخرج
حاول تبدأ في شركة ممتازة خاصة من ناحية الراتب و التطوير الوظيفي لكن في نفس الوقت مستحيل إن كل الشركات في أي دولة تقدم رواتب بنفس المستوى والمميزات وتستوعب كل الخريجين .
فلو ماتوفقت بفرصة ممتازة ترا مب معناها إنك ماراح تحصل أو تقدر تدخل الشركات الكبيرة صحيح الموضوع بيحتاج مجهود وبيكون أصعب شوي ، لكن راح تقدر تدخلها و من ضمنها أرامكو لكن وقتها بيكون خبرتك وفهمك للتخصص و المهارات التكنيكال الي تهم الشركات هي الي بتساعدك على دخولها أكثر من موضوع المعدل.

هالشي شفته مع أكثر من شخص ، انتقلوا لشركات كثيرة وكل انتقال كان فيه فرق في الراتب لكن بعد 7 -8 سنوات وبعضهم بفترة أقصر ، وصلوا لشركات مميزة مثلا ارامكو أو شركات شبه حكومية أو هيئات حكومية .

الشي الثاني : اتوقع بيكون فيه تحسن في الرواتب على الأقل في المشاريع الحكومية خاصة مع قرار توطين عقود التشغيل والصيانة
لأن في القرار تم تحديد الحد الأدنى لرواتب المهندسين السعوديين 8400 ريال ، طبعا بتحصل شركات تحاول تلتف على النظام لكن على الأقل بتكون فيه نسبة من الشركات ممتثلة للقرار .
https://mlsd.gov.sa/sites/default/files/83956_0.pdf

في النهاية ترا موضوع الرواتب المتأثرين فيه كل التخصصات ، يعني حتى لو افترضنا إن التخصصات الإدارية سهلة ( بغض النظر عن صحة هالشي من عدمه ) لكن مستحيل إن 5000 - 3000 تكون هي الراتب المناسب لهم ، والوظائف الي تذكر هالمبلغ و أقل في الإعلان كثيرة هاليومين .

3 Likes
3

انا قلتها سابقا لاتوجد شركة تقدر المهندس بالشكل المطلوب الا ارامكوا والشركات الكبيرة .

بعدين مو كل اداري راتبه عالي ترى حسب طبيعة العمل وحسب الشركة بعضهم الراتب قليل مرة وشوف بيت كوم وتأكد واغلب الطلب حاليا نساء . فالموضوع خيرة لك . اذا مرة تحب ادارة الاعمال كمل ماستر فيها !

خلاص اشتغل ب ٨٠٠٠ ترى والله نعمة وكمل سنوات فيها وحول لشركة كبيرة بعد ماتجيب خبرة كافية . انتهى الموضوع .

4

وعليكم السلام ورحمة الله وبركاته

للأسف كلامك صحيح بخصوص ضعف رواتب المهندسين بشكل عام واعتقد السبب والله أعلم كثرة المهندسين الوافدين وضعف السعودة الإلزامية مقارنة بالمجالات الأخرى
وبحكم مجالي بتقنية المعلومات ، أشوف رواتب خريجي تخصصات الحاسب الألي أفضل بكثير من الهندسة وأصبح راتب 15 ألف ريال متوسط الرواتب ورقم سهل نسبيا الحصول عليه
إذا المردود المادي من أهم أولوياتك ، لا تطول بالعمل كمهندس ميكانيكي وقريب إن شاء الله بأطرح موضوع يتطرق لأشياء كثيرة وبيفيدك بإذن الله

1 Like
5

شركات السيرفس وشلمبرجير وشركات النفط تعطي ٢٠ الف ريال للمهندس .

بس كرررف عمل ومناطق نائية .

1 Like
6

السلام عليكم ورحمة الله وبركاتة

الرواتب هي وشطارتك وعلاقاتك مع الكبارية ولا هي بالمجهود ابدا انا متخرج من الجامعة البترول لي 18 سنة واعرف ناس كانت تغش مني homework وضعيفة جدا ماابغى اقول انه الاخير بالدفعة وتخرجوا من الجامعة بالتفق بتخصص هندسة ميكانيكية واحد منهم اصبح رئيس لا احدى شركات سابك !!! انا تفاجأت والله يرزقه مشاء الله تبارك الله لكن لما اشوف حالي واقارنه بوضعه في فرق شاسع في المعلومات والخبرة والاجتهاد لكن هي اخي العزيز ارزاق ومعارف وواسطات ومدى تقبل الشركة لك شخصيا((القبلية والشللية موجودة )) وتلقى واحد مستسلم ومتخرج مرتبة شرف الاولى لا امر الواقع وجالس في شركات الهنود للتاجير مقاولات لدرجة انه الهندي والباكستاني والفلبيني يصير رئيسة في العمل ويحاسبة اشد الحساب ويتصيد اخطائة ويبي يفصلة بااي طريقة عشان يجيب اجنبي ثاني بداله وفي الاول والاخير هي ليست بالمجهود ولا بالتعليم هي الواسطة والاسم الاخير واذا عندك ظهر ولا لا…هنا مربط الفرس في السوق السعودي . حط في بالك انت في بلد ثري وعندك 13 مليون اجنبي من جميع الجنسيات والبديل موجود لك براتب نص راتبك هي مجرد فيزا يجيبون اطلق هندي ب 5000 ريال مهندس وعمرة 22 سنة ومستعد ينام في العمل وكلها كم سنة يتضخم ويكبر ويصير مديرولا احد يقدر ينافسة ومادام السعودي اللي فوق غير مؤهل والهندي والمصري والباكستاني والاردني والفلسطيني يسمعون كلام السعودي اللي على المنصة ويصيرون له حاشية لدرجة انه المدراء الادارات السعوديين اللي في المنا صب العالية مايداومون بس شغل اعلام وسوشيال ميديا وجرايد انه الرجل العصامي شغل على الاجانب وهو التنفيذي فطبيعة الحال ماهمه وضعك ولا فكر فيك وهي في الاول والاخير يخاف على مكتسباته من الاجانب ولا عنده استعداد يجيب واحد سعودي ينافسه على منصب شركة او مدير اقليمي

7

الحين انخفضت رواتب المهندسين عن سابقها في معظم الشركات بسبب زيادة عدد الأجانب.
و تحديد رواتب المهندسين يعود الى الشركة نفسها.
أعرف واحد مهندس بدأ براتب ما شاء الله 9000 ريال قبل 12 سنة و ما جته زيادة الا مرتين عندهم و وصل راتبه فقط الى حوالي 10000 و ظل على نفس هالراتب و كان يحس نفسه مرتاح فيها و ما كان يدري بنياتهم بعدين و بقي معهم الى ان فصلوه عام 2016 بسبب ازمة النفط طبعا مجرد حجة من الشركة و ظل 4 شهور بدون وظيفة مع أنه عنده خبرة 7 سنوات إلى أن حصل عرض براتب 8000 اقل من راتبه قبل ما ينفصل!!!! و قبلها بعدين!!! يعني كأنه بدأ من جديد و ال 7 سنوات الماضية طارت عليه!!!
و استمر معاهم بعدين الى أن حصل عرض ثاني في عام 2018 براتب 9500 ثم في 2019 حصل عرض آخر براتب 10500 و انتقل اليه و بعدها بسنة في 2020 قبل ازمة كورونا انتقل الى شركة أخرى براتب 12000 و الى اليوم بدون زيادة في راتبه و يفكر في الانتقال الى شركة أخرى.
شوفوا الفرق في الراتب طيلة المدة 12 سنة خبرة الى اليوم ما قدر يرفع راتبه. صار رفع الرواتب صعب مثل طيحة الأسهم عام 2006 و الى اليوم ما قامت.
و أعرف واحد آخر بدأ براتب 6000 فقط قبل 10 سنوات و اليوم صار راتبه 25000 لكن ليس بفض البقاء في الشركة و انما بالانتقالات من شركة الى أخرى كل سنة أو سنتين يطلع من شركة الى أخرى بعرض افضل و هذا هو الواقع الصحيح الذي يجب علينا فعله الذي رأيته في معظم الشركات لو تجلس في الشركة سنين ما راح تحصل أي زيادة منهم إلا إذا جبت لهم عرض و قلت لهم ترى اما تزيدوا راتبي أو أطلع عنكم!!! و حصل لي هذا أيضا.
الخلاصة أكثر الذين ارتفعت رواتبهم و ترقوا اليوم كان بالانتقال من شركة إلى شركة و قليل من ارتفع راتبه و ترقى في الشركة بعد استقراره فيها لسنوات طويلة إلا بعض أصحاب الواسطات منهم.
أيضا لاحظت كثير من الاجانب يظل مستقرا في شركته لمدة سنوات أما السعودي قيقدم على الانتقال من شركة الى أخرى و السبب هو ضعف و عدم زيادة رواتب السعوديين في الشركات و عدم الترقيات للسعودي.
بخصوص الأجانب نعم ألأجانب كان لهم دور في انخفاض رواتب المهندسين السعوديين و الشركات نفسها ايضا هي من تختارهم قبل 15 سنة كان عدد الأجانب أقل بالنصف من عددهم اليوم.
أنا عملت في 6 شركات تقريبا كلهم أنا الوحيد السعودي بين القسم الذي أعمل فيه و أحس كأني مواطن غريب عنهم.
و من الصعب اليوم أنك تعمل في شركة سعودية بدون أجانب انظروا ارامكو نصفهم اجانب لانه لم تكن هناك فكرة لخلق شركة هندسية سعودية 100% من موظفينها سعوديين بداية من HR الى المهندسين و المدراء و لكن هناك أسباب كثيرة لعدم تحقق ذلك منها توفير المال لدى الشركات.
الآن الفلوس هي هم الشركات لو فرضنا مثلا اثنين قابلتهم الشركة و سيتم اختيار واحد منهم للوظيفة واحد سعودي و الثاني هندي وبنفس الخبرة أو خبرة السعودي أعلى راح يتم اختيار الهندي لانه ارخص من السعودي.
إحدى الشركات في أثناء المقابلة الطويلة التي استغرقت نصف ساعة تحمسوا بجد لتوظيفي معهم و قالوا لي في نهاية المقابلة نبغاك تباشر معانا بعد شهر اي بعد ما تقدم استقالتك و في نهاية المقابلة سألوني كم راتبك و اعطيتهم و فجأة تغير وجههم!!! و قال لي بهدوء راتبك زين لكن راح نتفاوض معاك على الراتب و السلام عليكم و بعدها لا حس و لا خبر!!! و سمعت بعدين أنهم وظفوا واحد هندي ضعيف الخبرة و كنت أعرفه عمل معاي في الشركة الي قبلها!!!
خلاصة الشركات اليوم انها توظف الي تبغاه بالراتب الي تبغاه و ليس بالخبرة.

8

فيما يخص رواتب المهندسين .
أقل راتب هو 7000 ريال وفق شروط معينة داخل المنشأة .

شيء طبيعي المعدل ليس كل شيء فيه اللي تخرجت بمراتب شرف وتوظفت وظائف عادية وفيه اللي معدلاتهم نازلة مرة و توظفوا في كبرى الشركات والمناصب .
وهذا الشيء لاحظته فعلياً على أرض الواقع بيني وبين زملائي وغيرهم .

في النهاية أرزاق وحظ وتوفيق من رب العالمين أولاً وأخيراً .

ال Range للمهندس حديث التخرج من 7000 الى 12000 والأغلب حدود 9000 .

أما انك تجلس سنوات بنفس الراتب هذي مشكلة ويجب الإنتقال الى شركة أخرى .

9

.

10

هي في الاول والاخير الدولة هي اللي تضغط وتحط نسب السعودة ونسب كمية وليست كيفية يعني يبغون مهندسين صغار وظائف الخبرة يبغون فيها اجنبي بمعنى اصح اهم شي اكمل النسبة المطلوبة سواء مهندس متدرب ويكون مسماه متدرب 6 سنوات يعني شي مضحك للامانة وانه السعودي مايشتغل ولا عنده مسوولية وهذا كلام غير صحيح السعودي شغيل لكنهم يعملون فرادا في الشركات وليسوا جماعات واللي عنده واسطه يطلع البطل الهمام لانه المسوول السعودي للاسف مايبيك تكون موجود في الشركة عشان ماتشوف ضعفه الاداري والتقني وخاصة المهندسين الخبرة ويحاول يطفشك عن طريق الاجانب ويحميهم منك بالتلوي على الانظمة انا شيب شعر رأسي من البلاوي اللي اشوفها ولو انا مااني قوي بالله ومحارب شرس وبااحترافية عالية ولا اخلي لهم مجال لمحاربتي حتى السكرتير الباكستاني يقفل عني معلومات ويستهبل واصيده كم مرة والسبب لانه يمشي على توصيات VP !!!!! ولا كان الاجانب اكلوني من زمان ويتمنون طيحتي لكن فعلا انا حافظت على شخصيتي الثابتة بالتنقل عبر الشركات
ولا عندي ولاء الي اي شركة اللي يعاملني بااحترام بااعامله باحترام وبشتغل عن 5 هنود لكن المحصلة الاخيرة هل يوجد ترقيات لا طبعا مجرد انهم ينيطوا الاعمال بااسم البطل الهمام اللي عنده واسطه وبكل بجاحة يمكن يناديك الاجتماع ويسترسل كيف انه فكر وتعب عشان يصل الى الانجاز ويكون الانجاز انت اللي مسوية !!!!! قباحة مابعدها قباحه !!!!!وهذي ركيزة كل الشركات في القطاع الاعمال السعودي اتمنى بس انك تلقي نظرة على linkedin تضحك شوي بنت متخرجة من جامعة الاميرة نورة قسم انجليزي مالها سنتين تصير Project Manager وتصور المناكير يدها وشهادات الشكر من المدير العام وعلبه شوكلاته وهي مقضيه وقتها كوفي وتصوير والاجانب هم اللي يديرون دفة العمل من خلف الكواليس وتلاقي راتبها 9000 ريال وشوف المناصب الرنانة للبنت وخريج جامعة الملك فهد في هندسة تقنية اللي تقطع وجهه في البر والمشاريع اللي خارج المدن ماوصل Project Manager بعد 18 سنة خبرة لم يصل الى هذه المرتبة مع العلم ممكن كومار الهندي من جامعة تعليم بريطاني ابو 3 سنوات هندسة يصير Director في 10 سنوات ويفصل في السعوديين ويجيب اولاد عمه وبرضى المدير العام السعودي مبسوط على هذا الشي اذكر في شركة لم استطع العمل فيها 3 شهور بسبب روائح الهنود والاجتماعات يتكلمون اردوا ولا فيه احترام اساسا ولا سلم وظيفي ولا شي ومدير المصنع كان هندي والمدير العام اخته متزوجة راعي الحلال وخريج تاريخ فشي طبيعي انه يمسك الهنود كل شي .

5 Likes
11

كلامك حاد لكنه صحيح وأهنيك عليه وأقدّر شجاعتك
من يريد أن يتملص من هذه الحقيقة فهو يكذب على نفسه
المهندس السعودي لم يعد ظاهرة تستحق الإحترام كما كان مسبقًا
تمكين المرأة ودخولها في المجال الهندسي هي القشة التي قصمت ظهر البعير ، أجيب لي بنت وأخليها مزهرية وتمثال ولوحة فنية
أو أضرب فيها مثال للتعايش والتأقلم في بيئة عملنا وتكون تحت أمري ولا ترفض لي طلب وتشتغل زي الآلة في المكتب لو أعطيها 5000
اما لينكدين حدث ولا حرج، مليء بمسميات أطول من صاحبة المسمى نفسها
أما الأجانب فنظرتهم القبيحة للسعودي لا تتغير، يا تصير **** مكدة مثلنا، ولا تراك ما تبي تشتغل
عني شخصيًا لا أتوقع إلا الأسوأ والأسوأ لا من حيث رواتب ولا من حيث فرص ولا من حيث بيئة صالحة للمهندس
بر ومشاريع وشموس ومناطق نائية ودوام 6 أيام وبيئة مخيسة ، والأمر والمحزن أن رواتبنا مثل موظفة HR جالسة 8 ساعات على المكيف

2 Likes
12

جلاد كما عهدتك

1 Like
13

جيت بقدم على أحد الشركات وكان هناك أجنبي وطردني . وواحد سلمت عليه وتكلمنا وأول ما قلت له في توظيف ماناظر فيني وجمدني تماما ولاتكلم بكلمة …
واحد كمان سألته هل في توظيف وقام يضحك ويبتسم ويستهزء
وواحد يقلي مافي توظيف حاليا وبكرة الصبح وربي تلقاه موظف ٣ و ٤ من جماعته …

يعني احترموا المتقدم على أقل تقدير شوي احترام !!
واللي مايحترم الله لايوفقه واللي تأثرت فيه يلقاها فيه ان شاء الله

مالنا الا العطالة شي يقهر … حسبي الله ونعم الوكيل

أتمنى زيادة نسبة التوطين يعني مانبغا مدارس أهلية وماني عارف ايش!! نريد الشركات يكون فيها توطين بنسبة أكبر ولاتقل عن 50% وبراتب لايقل عن ٧٠٠٠ سواء يحسب في التوطين أو لا .

ويكون توطين وليس سعودة وهمية وكلام فاررغ …
الله يوفق شبابنا يارب لكل خير .

14

المشكلة الاساسية مافي نقابات عمالية سعودية بمسميات وظيفية لو مثل في نقابة المهندسين السعوديين يطلعوا الاعلام ويسووا شوي صوت للمسوليين ويتناقشوا في الامور اللي تخص المهندسين زي مافي دول العالم الاخر حتى مصر عندها نقابة مهندسين ويجتمعون يطالبون بحقوقهم لدرجة انهم يلحقوا المهندسين المصريين للعمالة في الخارج ولك ان تشاهد سوق المقاولات في السعودين كيف اصبح مدراء المشاريع خصيص للمهندسين للمصريين واللبنانين والاردنين والسوريين والسودانين لابسين كرفتات وخبرته خمس سنوات ويقولك Director Middle East على عيني وراسي اخواننا وحبايبنا لكن مافي سعوديين اذا سوق العمل السعودي في بلد استهلاكي يصل عدد المهندسين 300 الف شخص 260 الف اجنبي لك ان تتخيل وطيب 40 الف مهندس سعودي و 7 الالاف منهم عاطلين وهيئة المهندسين السعودية بس يكتبوا في الجرائد والترشيحات والرئيس القادم هو رئيس اللي فات مكانك سر انا باقي لي 3 سنوات واتقاعد وافتح لي شي يدخل علي دخل بلاش هرطقات وتعب على الفاضي يكفي جامعة البترول ارهقتنا في بدايه اعمارنا الوظيفية وفي الاخير حصة ومزنة ابو مناكير عندها شهادة تقدير توها توظفت لها شهرين من رئيس شركة كبرى ويقول ياحصة ويامزنة مااندري وش كنا نسوي بدونك !!!!!! وتتكلم عن الاستراتجيات وحوكمة الشركات اللي بالاساس عمل استراتيجي اي خريج مبتدء هندسة نظم ولا MIS يعرف مبادئها !!! ياعالم ارحموا عقولنا شوية والنتيجة مهندس سعودي خبرة 20 سنة وراتبه 9000 ريال وش خلى لباكستاني فاتح محل مكيفات وموظف اربعه بنجلادشين يحملون المكيفات وهو مدير باكستاني كبير في الصبيخة يطلع اكثر منه

انا ماني جلاد لكن انا اتكلم عن خبرة 18 سنة قضيتها في 8 شركات في المنطقة الشرقية وشفت العجب العجاب

1 Like
15

و هذا هو سبب كثرة التنقلات بين المهندسين من شركة الى اخرى ظلم المهندسين و عدم انصافهم في الرواتب و الخبرة

طلعوا لي مهندس في شركة غير ارامكو و سابك و سكيكو استقر فيها الى ان تقاعد منها؟ لن تجدوا ذلك

سابقا كان المهندس يطول في الشركات اما اليوم كل سنتين تنقل بين الشركات اما بسبب فصل او عدم انصاف او او ضغط عمل و تطفيش او تهميش و عدم تطوير الخ…

هذا يصب في مصلحة الشركات لتقليل مكافاة نهاية الخدمة اذا كثر تنقله

16

فيه ناس مستفيدة من المهزلة الي صايرة لكن مين الله أعلم، القطاع الهندسي والخاص يبي له غربلة
وش اخلي وش اقول، هي من لوبيات ولا من واسطات ولا من رواتب ***… القائمة تطول. الحل واضح وضوح الشمس، لكن…

1 Like
17

السلام عليكم ورحمة الله وبركاته

ياليت تفيدنا اخوي عن موضوع المجال التقني اكثر ايش افضل الشركات من ناحية بيئة العمل و الراتب خصوصا اني باذن الله راح اتخرج قريب

جزاك الله خيرا

18

فيه كثير شركات ممتازة تعطي رواتب وحوافز قوية حتى لحديث التخرج

على سبيل المثال أرامكو تعطي راتب ١٢ ألف اساسي غير البدلات حقت ارامكو وتقدر تراجع هذا الموضوع
https://www.google.com/url?sa=t&source=web&rct=j&url=https://www.stkfupm.com/forum/threads/%25D8%25B1%25D9%2588%25D8%25A7%25D8%25AA%25D8%25A8-%25D9%2585%25D9%2587%25D9%2586%25D8%25AF%25D8%25B3%25D9%258A%25D9%2586-%25D8%25AD%25D8%25AF%25D9%258A%25D8%25AB%25D9%258A-%25D8%25A7%25D9%2584%25D8%25AA%25D8%25AE%25D8%25B1%25D8%25AC-%25D8%25A3%25D8%25B1%25D8%25A7%25D9%2585%25D9%2583%25D9%2588-%25D9%2588%25D8%25B3%25D8%25A7%25D8%25A8%25D9%2583-2020.142957/&ved=2ahUKEwjP5qXT8dXwAhVJu3EKHRg1Bn4QFjABegQIBBAF&usg=AOvVaw1C7qAdruBrcyinFMAF0QwT

ايضا سابك والكهرباء والمياه وشركات الجبيل وغيرها كذلك رواتب ممتازة

بإذن الله يتحسن التوظيف بعد التعافي والربع الاول لكل هذي الشركات في أرباح اعلى من السابق … بإذن الله يفتح التوظيف والمقابلات .

راتب المهندس يجب ان لايقل عن 10 الاف ريال هذا الراتب المستحق لكل مهندس . ولا مانع من اخذ خبرة براتب اقل لكن المستحق هو ١٠ الاف ريال .

فالكم التوفيق …

19

الموضوع مستفز ويقهر يارب يتعدل الوضع ب اقرب وقت لأن الحياه بدت تصعب بشكل كبير

20

مشكلة عويصة هذي ثالث شركة تبغى توظفني بس يضربون بريك لما يعرفون راتبي المشكلة انه راتبي متوقف من الزيادات اربع سنوات والله العظيم شي مضحك ومبكي في نفس الوقت