أشكركم على هذا المنتدى المثمر، حقيقة هو كنز للطلاب والخريجين.
إخواني أنا خريج هندسة ميكانيكية من شهر أبريل ٢٠١٩ من أحد الجامعات الحكومية بمعدل ٣.٣١/٤ مع مرتبة الشرف، أعمل موظف عسكري في أحد القطاعات العسكرية من عام ٢٠١٣. ودي أشاوركم في مستقبلي المهني خصوصا الإخوان الخريجين.
بعد الثانوية دخلت العسكرية لحاجتي لوظيفة وقدمت على السنة التحضيرية للجامعة بنفس الوقت، دراستي كانت متعثرة ومحبطة في البداية لكنها تغيرت للأفضل الحمد لله ومن الله علي وتخرجت بمعدل مرضي لكن كان دون الطموح.
بعد ما حصلت على الشهادة وبدأت مرحلة البحث عن وظيفة أفضل، كانت بعض الفرص الوظيفية مثل الكليات العسكرية وبعض الوظائف الأكاديمية ما تقبل موظف حكومي.
وبدأت أبحث في القطاع الخاص ورفعت سيرتي الذاتية لكثير من الشركات وقدمت على وظائف كثيرة لكن ما كان فيه رد، كنت أظن أن السبب أن ما عندي خبرة وأن تدريبي في أمانة المنطقة كان دون المأمول، كنت مضطر أتدرب بالأمانة بحكم أنها قريبة من العمل وأقدر أتعامل مع الجهتين.
قررت أبحث عن مكان يوظفني بدون تأمينات وبدون راتب بس عشان أكسب خبرة، بحثت في طاقات وتمهير ولكنها ما تقبلني، رحت لشركات لكن كانوا يطلبون معروض من الجامعة عشان التدريب أو أنهم يسجلوني في التأمينات.
في نوفمبر جاء اليوم اللي جاني عرض وظيفي بمسمى مهندس استقبال صيانة في أحد وكالات السيارات، عرضوا راتب أقل من راتبي الحالي، كلمتهم أني أتنازل عن نص الراتب ولا يسجلوني في التأمينات ورفضوا، قلت ما أبي فلوس بس أبي تدريب عشان الخبرة قالوا لازم تأمينات، استخرت وتركتهم.
أنا أسعى وأقدم على الفرص الوظيفية وأحاول أطور سيرتي الذاتية، وراضي برزقي وأن المكتوب مع السعي بيجي بإذن الله، لكن مؤخرا كثر السؤال من بعض الناس ليش ما توظفت؟ معك شهادة هندسة وإلى الحين عسكري؟ صرت أشوف نظرة الإحباط بأهلي والناس اللي قريبين مني، بعض إخواني وأصدقائي صاروا يرسلون لي إعلانات توظيف، أصدقائي اللي توظفوا صاروا يكلمون الناس اللي معهم عشاني، جاتني فترة دخلني الإحباط وحسيت إني فاشل وعالة وما أستحق كل الاهتمام من أهلي وأصدقائي، لكن كنت أقول يجي اليوم اللي تنفرج فيه إن شاء الله.
حاليا راح أكمل سنة بدون أي خبرة، وأفكر أترك وظيفتي الحالية وأبحث عن أي فرصة لو براتب أقل بس عشان الخبرة، لكن يمنعني التزاماتي المالية اللي لازم أقوم فيها. أيضا حصلت فرصة اكمال دراسة الماجستير بتخصصي في واحدة من أقوى الجامعات المحلية وعندي رغبة كبيرة أواصل دراستي، لكنني متخوف أن الماجستير ما راح يفتح لي فرص كثر فرص البكالريوس خصوصا أن ما عندي خبرة.
السؤال: لو أنت بمكاني وظروفي وش راح يكون قرارك؟
أعتذر عن الإطالة وشكرا مقدما لكل اللي ردوا وأفادوني.
ماشاء الله عليك انسان مقاتل والله يكتب لك فرصة ممتازة تناسب طموحك قريبا.
تأكد ان سيرتك الذاتية تكون مكتوبة بشكل احترافي ( في موضوع مثبت لمراجعة السير الذاتية )
ماعرف كم عمرك لكن العمر بعض الاحيان يكون عائق اذا كتبته لان الشركات ماتدري عن الاشياء الي مريت فيها وبمجرد مايشوفون انك متخرج بعمر اكبر من الطبيعي يعطيهم انطباع عن الاهمال ( فحالتك الموضوع مختلف ) لو كنت مكانك ماراح اكتب العمر واذا سالوك عنه فالمقابلة بيكون نقطة قوة بحيث توضح لهم انك كنت تشتغل وتدرس فنفس الوقت.
الله يوفقك ان شاء الله
بالعكس أنا مستعد أترك العسكرية لو لقيت شركة تعطيني مثل راتبي الحالي أو أقل بشيء معقول، راتب مهندس الاستقبال أقل بحوالي ٢٠٠٠ ريال، والوضع تقريبا شبه سعودة بدون أي خطط التطوير، ما كان ودي أضيع الفرصة لكن ما الله كتب.
ابحث عن شيء يناسب شهادتك مو مهندس استقبال
أنت بوضع كويس و ممتاز يعتبر لأنك موظف حكومي و تبحث عن الأفضل ذي لوحدها نعمة من رب العالمين غيرك عاطل باطل
حاب أقولك لا تيأس و العمر قدامك طوييييييييل و لساعك صغير و الله
اجتهد و اصبر و توكل على الله و نظرة الناس ادعس عليها برجلك , الناس ما يعجبها شيء
ادع رب العالمين و لا توقف بحث و انتبه تذل نفسك على وظيفة ما تفيدك بتخصصك أو ما تجيب لك راتب زين
حاب احط مداخله من خبرتي انا مهندس ميكانيكا خريج امريكا
انا اشتغلت بشركه 3 سنوات مع مشاريع ارامكو والمهم بعد ماخلصت الثلاث سنوات مشوا اغلب الموظفين وخسرت الشركه وحاولت اقدم على شركات كثيره بخبرتي وزي منت عارف وضع السوق المهم اني شفت عمري قاعد يمشي والعمر مايرحم رحت دخلت عسكريه على رتبه رقيب ( بالواسطه بعد جبتها ) وحاليا موظف والحمد لله تزوجت واستقريت
صحيح اني تعبت على الشهاده والدراسه لكن الحمد لله على كل حال اعتقد الاستقرار الاسري والوظيفي اهم من هذا كله انا عكس قصتك تماما عسى الله يكتب لك اللي فيه الخير انت اسعى وجاهد وفالك التوفيق
فعلا،اخونا عنده طموح لكن مسيطرة عليه فكرة “وظيفة الحكومة امان والقطاع الخاص كخة”
وهذا الي جاب الفقر للعالم
ترا الهيئات وكبرى الشركات عقود تتجدد سنويا ورواتبهم ضعف رواتب ديوان الخدمة،
افصل من الفقر طالما انت مهندس وتوظف اي وظيفة اهم شي قريبة لتخصصك . وبظرف ثلاث سنين بالكثير راتبك راح يصير دبل العسكري.
للأسف كثير فرص تضيع من شباب واشوفه غباء بسبب السالفة ذي
والله اعرف واحد فصل من شركة الكهرباء بعد ماتوظف بشهر وراح توظف مرتبة سابعة بوزارة المياه.
حجته الغبية يقول الكهرب شركة مافيها امان وظيفي !!!
والمصيبة كانت كل الوظيفتين عند اهله
طبعا هالكلام عام 2014
بعد مانزل من راتبه حول 4000 ريال وشاف خوياه فرق رواتبهم بينهم وبينه للحين يعض اصابع ااندم
دامك عسكري ليش ما تقدم على كلية الضباط راح يرتفع راتبك اكثر وفيه اقسام للمهندسين ممكن تدخل معاها.
ترى مب ضروري تشتغل نفس تخصصك 100% لو طبقت 10% فهذا شيء ممتاز
انا خريج جامعة البترول وخبرة. اللي طبقته من دراستي حوالي 15% فقط والسبب ان اللي تدرسه اغلبه نظريات هندسية و اغلبها (assumptions )
لكن الحياة الواقعية ما فيها assumptions.
الخلاصة : انا لو محلك مستحييييييييل اتخلى عن وظيفتي الحالية وراح اقدم على الكليات العسكرية بشهادة الهندسة. ترى القطاع الخاص حاليا سيء كل الشركات الكبيرة صارت توظف كونتركات يعني اذا خلص المشروع الله يستر عليك (مافي امان وظيفي مثل الوظيفة الحكومية )
و اسف ع الاطالة
المسألة يا أبو حميد ما هي مسألة قطاع حكومي وقطاع خاص وأمان وظيفي.
الكلام عن البحث عن فرصة أفضل، حتى بالقطاع الخاص الموظف اللي معه خبرة ما راح يترك وظيفته إلا بوظيفة أحسن منها ماديا ومهنيا.
وأتفق معك أن شركة الكهرباء والهيئات الحكومية أفضل من وظائف ديوان الخدمة بكثير.
صدقت، الكليات العسكرية فيها فرص ممتازة جدا وشغلها أغلبه هندسي وميزاتهم كثيرة، لكن للأسف ما تقبلني لأن عندي خدمة سابقة.
ما نختلف أن القطاع الخاص فيه الزين والشين، لكن القطاع الخاص فيه فرص يحلم فيها أي واحد خصوصا مع الشركات الوطنية الكبيرة.
توك صغير سن تعتبر. ترا انا توظفت وعمري قريب 28 سنة. وتوظفت والله بوظيفة شاطحة عن تخصصي لكن شرطت يحطون مسماي مهندس كهرب
وعديت سنة وبعدها الحين مهندس مشروع مع أحد الهيئات والوضع يتحسن لصالحي من فضل الله
فإياك تدفن نفسك ،يعني ماشاء الله حتى عمرك صغير توك يعني .وانا لو محلك والله اقبل وظيفة لو اقل راتب لأنك راح تاخذها دبل باذن الله قبل الثلاثين واختبر قدرة معرفية عشان تسجل ديوان الخدمة بعد.
والله اثنين ضباط اعرفهم مهندسين
واحد فصل بعد خدمة حول عشر سنين وراح هيئة الطيران
والثاني خدمة حول 15 سنة وتوظف بشركة المياه فتأمل رعاك الله.
العسكرية حتى لو انك ضابط وقت التقاعد ينخسف راتبك خسف قاتل لأن ثلاث ارباع راتبك بدلات
عكس المدني، فما بالك بالشركات
أولاً لاتفقد الأمل في نفسك وفي سوق العمل، فأنت انسان مكافح وربما كل من يقرأ موضوعك يتفق، ثانياً؛ معدلك مرتفع وتخصصك مطلوب، يجب عليك رسم طريق واضح لمستقبلك ان كان قطاع خاص او عسكري او حكومي، فكرة الأمان الوظيفي فكرة غبية جداً وهي لاتوجد في الدول المتقدمة ، ( ولا يعني ذلك بأن انصحك ان لاتفكر بقطاع حكومي او عسكري) ولكن الفكرة اساسها خطأ وعودتنا كسعوديين على الراحة وشرب الشاي وترك الأجانب يعملون ويصلون الى المناصب، عمرك لا شيء فيه بل بالعكس مازلت شاب، اذا امضيت سنة بمقابلة واحدة فقط فهذا يشير الى خلل في السيرة الذاتية انصحك بمراجعتها في الموضوع المختص في القسم، لاحظت خطأ عند اجراءك للمقابلة وهي قلت ( انا ابغى خبرة بس ) اذا كانت افكار بينك وبين نفسك فلا بأس، اما اذا قلتها الى الشركة فهذا خطأ فادح يشير الى انك تعتبر الشركة محطة عبور فقط والشركات لايعجبهم هذا الشيء، هذه مجرد نصيحة لك ولي وللجميع، دائماً اظهر انك مهتم في الشركة عند المقابلة، انا نفس تخصصك وتخرجنا نفس الوقت ( خريج امريكا) ومعدلي اقل منك بكثير وحصلت على عشرة مقابلات ربما، حاول ان تجدرالاسباب، هل الفرص الهندسية متوفرة في مدينتك ؟ هل طريقة تقديمك للشركات صحيحة ؟ لاتيأس جميعنا نعرف السوق لكن اهالينا كبار ومايعرفوا لذلك اعذرهم اذا تكلموا بهذا الاسلوب، اتمنى لك كل التوفيق
ماشاء الله عليك ، اولاً الله يوفقك ويكتب لك في كل خطوه نجاح وتوفيق ، انا مهندس كهربائي خبرتي ولاشي ، جلست عاطل سنتين تقريبًا قلنا يمكن العيب بالسيره الذاتيه وضبطتها وكل شي ومانفع ، قلت والحل طيب ، للأمانه احباط في احباط وتخصصي مطلوب هندسة كهربائية ولكن الفرص الاغلب للخبره عشان نكون صريحين ، رحت لأحد مكاتب الاستشارات الهندسيه وتبعد عن مدينتي ٤ ساعات اضطريت اروح وبدون مقابل عشان استفيد ، وكملت معهم ٤ شهور وعطوني عرض وظيفي كمهندس مشروع اشراف يعني ، ولكن يوم سويت مقابله مع مالك المشروع رفضني رغم ان المقابله كانت جميله وسهله لأبعد الحدود وطلعت من المقابله مبسوط ، المكتب الاستشاري وافق علي وعطاني العرض وقالو بمجرد يوافق المالك خلاص توقع عقدك وللأسف رفضني مالك المشروع وجاني علم بعدين ان الي قابلوني وظفو عن طريقهم اشخاص والله يبارك لهم بالنهايه الجهه هذي هي مالكة المشروع ، فقلت يالله لعلها خيره وخلص التدريب ورجعت مدينتي مابقى ملتقى وشركه مارحت لها ف سبحان الله الرزق مكتوب لك اللهم ماتدري متى يجي رزقك والحين الحمدلله اشتغلت في شركة متعاقده مع ارامكو والان البوزيشن حقي site engineer ف صدقني رزقك بيجيك بس حاول وان شاء الله فالك التوفيق والله يسهل لك امرك ويفتح لك ابواب الرزق.
ماشاء الله عليك انت شخص طموح ومكافح
اذا لم تجد فرصة بالقطاع الخاص اكمل الماجستير في تخصصك واهم شيء يكون امتداد لتخصصك اذا كانت لك رغبة بالوظائف الاكاديمية بحيث تكون استفدت وحصلت على شهادة اعلي و الوظائف الاكياديمية لاتطلب خبرة عملية وهذا شيء جيد
القطاع الخاص سيء وخاصة من ناحية الشركات المتوسطة والصغيرة ودوام مرهق انصحك اكمل الماجستير
وفقك الله
كلامك جميل، بالعكس ما عندي مانع بأي فرصة ممتازة وبأي مكان سواء قطاع خاص أو حكومي أو عسكري، مع أني أفضل الخاص عشان الفرص اللي فيه، لكن المسألة توفيق من الله، راجعت السيرة الذاتية وقدمت تقديمات ما أحصيها.
شاكر لك ردك، الله يوفقنا وإياك.