لـ هذا السبب انا دخلت العسكريه وريحت راسي وراتب وتزوجت والحمد لله …
الشركات تحتاج واسطات وعلاقات غير كذا قطع بصل وكل بيئة الشركات عصابات ومافيات وحزبيات ومعارف والوظايف معروفه تروح لـ مين
لا تضيع عمرك شف لك عسكريه مثل التنجيد الموحد وخلصنا , اللي بعمرك صاروا مدراء شركات وانت للحين ماعندك خبره والشركات معروفه حركاتها ,
ادري ب تقول الشهاده لكن بقولك مهنه الهندسه هنا ضايعه والمواطن المهندس ضايع اكثر , ي تلاقي المهندس السعودي عاطل او تلاقيه موظف بغير تخصصه او تلاقيه موظف سعوده والشغل على الاجانب او تلاقيه موظف بتخصصه براتب سكيورتي ماعدا الشركات الكبيره فقط
صدقت يالغالي. وأحب أضيف نقطه وحده وأقفل هذا الموضوع لاني قلت كل اللي عندي والشباب كلهم فيهم الخيره قالوا اللي عندهم حتى اللي ماعنده شي حاول يرفع من معنوياتي ولهم جزيل الشكر والتقدير. ولا أحب أيضا ان يتكرر نفس الكلام.
نقطة اخيره هم يرون الاجنبي اكفى منا نشوف التطور المنتظر من الاجنبي للبلد وغدا لناظره قريب.
مساءكم الله بالخير…
انت الحين على كلامك انك دخلت العسكرية وتزوجت وامورك تمام الحمدالله ومرتاح على كلامك
طيب انت اخترت طريقك والله يوفقك ليش تبي تقنع الناس باللي انت فيه ومتشائم وهم لك موضوع عن كورنا والوظائف ومن هالكلام ابي افهم ليش !!؟ مو على اساس متزوج ومرتاح بالعسكرية ولا ابي الناس كلهم مثلي !!
ومقصدي ترى مو انتقدك لا والله كثر ماهو استغراب وتعجب فقط
وعلى العموم الله يوفقكم بالوظائف للي ماحصل وظيفة والسيل مايبطى الا من كبره باذن الله للجميع العاطلين تفاءلو بالخير وباذن الله بتلاقون رزقكم …
نقطة اخر سطر لتفاءل كنت اتنقل من ثلاث شركات الحمدالله في اخر ست شهور وانا حديث تخرج تقول معدل عالي اقوالك لا تقول واسطة وربي بعد لا اهم نقطة CV ثم CV وكرزمة وقت المقابلة الشخصية وكن واثق اولا بالله ثم في نفسك وصدقني راح تجي بس يبي لها صبر وتقديمات اول باول تتابع في سناب ولينكد وتويتر وتلجرام وباذن الله
اظن من حقي اني ابدي رأيي في اي موضوع بغض النظر عن مستقبلي , طالما انا شخص من نفس الموجودين ونفس الاهتمامات …
تقول لي كنت تنتقل اكثر من 3 شركات والموضوع ماله علاقه بالمعدل ولا واسطه شوف انا عن نفسي صدقت = )
بخصوص السي في اغلب العاطلين عامله مع دكاتره الجامعه ومراجعه الف مره ومن اجمل مايكون ومافيه اي مشكله الموضوع اكبر من سي في والموضوع اكبر من معدل وكلنا عيال قريه وعارفين الوضع لا تضحك على نفسك ولا تضحك على الكل خلك صريح اذا ماقدرت على الاقل اسكت : )
انا كنت شغال في احد اكبر مشاريع ارامكو وشايف وضع الشركات وشفت كل شي بعيوني هذا من غير زملائي في شركات مختلفه " كبيره "
محد قالك لاتبدي رايك ابد …
لكن اقوالك دامك مرتاح بالعسكرية ومتزوج ومبسوط عيش وانبسط ياعم مالك ومال القطاع الخاص وخلق الله 
تفرفش يامرتاح 
وعلى فكرة ماطلبت منك تصدق بخصوص الشركات لان الموضوع مايهمك انت متوظف مرتاح على قولتك
سي يو
موضوع ازمه المهندسين السعوديين اذا ماتكلمنا فيها بيتضرر اجيال كثيره قادمه الموضوع ماهي ( انانيه ) ابدا الموضوع خطير جدا لما تشوف وضع المهندسين وصل لـ هذا الحال
اقولك انا من جهتي صدقت بصراحه ان شاء الله غيري يكون صدق بعد = )
سي يو ي الغالي
استغرب جدا من موضوعك ترى العسكرية ابو الواسطات بل واكثر حتى من الشركات ومعروفة تروح للي ابائهم ضباط ورتب عالية فقط !!! باختصار الدنيا كلها واسطة .
العسكرية حلوة لكن لها عدد من العيوب منها عدم السفر وعدم الزواج من اجنبية بالاضافة الى التقاعد الاجباري وخفض راتب التقاعد لأنه بدلات فقط .
هم يختاروا لك المنطقة والمكان ممكن يودوك اخر الدنيا وماتقدر تتنقل بكيفك .
لكن مجملا هي شيء كويس ويكفي انها خدمة للوطن .
بالنسبة للشركات الكبيرة وحتى هناك شركات اخرى تعطي رواتب عالية واكثر من ارامكوا مثل شلمبرجير 18 الف ريال وغيرها . بالعكس اخوي الشركات دلع للمهندسين وحوافز وكرف الحمار للفنيين . وهكذا الفرق بين الافراد والضباط.
العائق الوحيد هو قلة الوظايف لحديثي التخرج ومحصورة فقط على اصحاب الخبرة .
الخبرة هي العائق الكبير .
نعم عدد المهندسين العاطلين ضخم ولا اعلم ماهي المشكلة ولا اعلم اذا كانت التخصصات الاخرى مثل الطب او ادارة الاعمال مثل وضع المهندسين .
المهندس يقدر يكمل ماستر ادارة اعمال وتصير له فرص كبيرة .
حياك الله يالغالي
اتفق بكل اللي قلته ماعدا نقطه ان الوظايف محصوره للخبرات وقليله لـ حديثي التخرج لا والله السعودي مشكلته سواء خبره ولا حديث التخرج كلها واحد انا خبرتي 3 سنوات بالشركات وم لقيت وقتها من يوظفني واجيب لك ناس على 7 و 8 سنوات خبرات وقعدوا في بيوتهم وموجودين بـ تويتر بعد اذا حاب تبحث …
المشكله انك سعودي غير مرغوب في الشركات خاصه اللي مستحوذ عليها الاجانب , والشركات الكبيره لها ناسها ومعارفها = )
هو السعودي مرغوب ان شاء الله ادخل داخل ارامكو شيبه واسط منيفة تناجيب سفانية راس تنورة … تلاقي ان كلهم سعوديين بحمد الله .
وبإذن الله توطين جميع وظايف الهندسة بكل الشركات ونفتخر بكل المهندسين السعوديين .
ارامكو اغلبها سعوديين اكيد لكن ارامكو ماراح تقدر تستقبل كل المهندسين السعوديين , ضيف على ذلك ارامكو لها ناسها ومعارفها وانت فاهمني …
نتمنى من سنوات توطين مهنه الهندسه لكن يبدو ان مثل اللي يركض خلف السراب وعلى طريقة الكادر الهندسي اللي له اكثر من 20 سنه يطالبون فيه
الشركات السعودية الكبيرة كثيرة واخوي مهندس كهرب عاطل له فوق سنتين وبدا ينفس حتى شعره وقع وسوف اسرد لكم العقبات اللي تواجه السعودي بالتوظيف ولاكن لنتأكد بالأول ان الارزاق بيد الله وهو رازق الطير والحيوان وهو مقسم هذه الأرزاق سبحانه .
العقبه الأولى بعض الشركات اللتي يسمح بالمدراء الأجانب يوجد فيها لوبي وتحيز لجنسيتهم مثلا يجيك GM من جنسية معينه ف يطلب عند التقدم بالتوظيف وبكل بساطه باختيار Non Saudi وال HR بدوره جهه منفذة فسوف تبحث له ب Non Saudi
والعقبه الثانية هي من HR نفسهم فبعضهم يسهل الاستقدام من الخارج لمجرد ان الشركة تكون في النطاق البلاتيني ف طبيعي جدا ان يجلب مهندس ولاكن بالإقامة انه كهربائي عام او مكانيكي سيارات او حتى عامل فالأهم العقد عند الموظف ومسماه الوظيفي داخل الشركة فالأقامة مجرد إثبات لمن هو خارج تلك المنضمه
والعقبه الثالثة هي ايضا من HR يريد ان يتدخل في توظيف أحد أقربائه فإن لم تفعل يخبرك بأنه المؤهل المطلوب لهذة الوظيفه لم يتقدم لنا سعودي او أنه من الصعب الحصول على سعودي وتستمر ك مدير بإصرارك بان تريد سعودي ف يتركونك وقتا طويلا بدون اي تحديث وعندما تستفر منهم يقولون لك بأنه لم نجد وإن ذهبت وبحثت قالو ذالك ليس من إختصاصك و(يطفشونك لين تمل بيعاند ويلطعك وقت طويل وانت بحاجه لموظف في البوكس بعدها ترضخ لهم وتقول بروسس وذ Non saudi ليه لانك ماتبي قريبه يبي خلاص زعل ويبي غير سعودي )
العقبة الرابعة هو من المدراء السعودين بان يكون متعنت ضد السعوديين بأنهم لايعملون ثم ي غب بغير سعودي وهؤلا هم أشر خلق الله
العقبه الخامسة بعض الشباب هداهم الله لايتركون بصمه جميلة في الشركات عند توظيفهم بعد فترة التجربة يبدأ بما يسمى بالبزوطه ويطلع عيونك ويعلق اعمالك ودوامك واعذار وسكاليف وأحيان يكون سبب هذه التجربة بأن المدير خلاص ماراح يغامر بورقه حظ فيقول جيبو لي غير سعودي وخلاص بيكون مخلص في شغله ولو تهاوشه او تامره لاي سبب ماراح يقول الا Yes sir و sure sir
الحل هو من جهة خارجية لها صلاحيات للشركة وهي وزارة الموارد البشرية فالوزير مفوض وله صلاحيات من الدولة لدفع هذه العجلة ويمكن وضع أليه للتوظيف بأن يكوون التقديم في بوابة مثل جدارة وتقوم الوزارة بتنظيم التوظيف حسب الخبرة المطلوبه والأقدمية ومن يقال من شركته بسبب البزوطه يوقف ملفه لمده سنه لايستطيع التقديم وتكون العملية منظمه وتمنع الواسطات والمحسوبيات ويكون التقديمم بإنتظام وتقليل البطالة
ليس كما الأمر الواقع بأن تعرض الوظائف في طاقات ويقوم صاحب العمل برفض المتقدمين السعوديين لمده شهر وبعدها يسمح له بإصدار تاشيرة لهذه الوظييفة .
واسأل الله العظيم رب العرش العظيم ان يفرح كل عاطل بوظيفة تثلج قلبه
من يحتاج توطين مهنة الهندسة باسرع وقت وتطوير المهندس اكثر ؟ الوطن او العاطل بشهادة الهندسة؟
هل تعلمون ان الوطن في اشد احتياج لتوطين مهنة الهندسة اكثر من احتياج العاطل صاحب شهادة الهندسة لايجاد عمل بمهنته …
كما هو معلوم انه لا يدخل كلية الهندسة الا نخبة النخبة من ابناءنا …
وهم الان خارج نطاق القرار التطويري لتحقيق الرؤية واهدافها بنجاح تام …
ف لك ان تتخيل مدي الخسارة من ابعاد النخبة وجعل خريجي الاقتصاد هم من يحركوا عجلة الصناعة …
وهذا لا يقلل من قيمتهم ولكن … قطاع الصناعه يحتاج لمهندس وليس اقتصادي يستطيع ان يفهم اكثر ما هو المشروع الفاعل والمحقق للارباح والصعوبات التقنيه واللوجستية لانجار المشروع … بمعني المثل الشعبي اعطي الخبز خبازه… لذلك من وجهة نظري
فالان هذه الشركات واصحاب القرار هم انفسهم في اشد الحاجة لنا وليس العكس…
والله العظيم وليس انقاص بقدر احد ولكن
يوجد من المهندسين العاطلين حاليا من لو مسك منصب وزير الصناعه سيكون بمستوي ويمكن اكثر انتاجيه من الوزير الحالي
فلك ان تعلم مدي الخسارة الكبيرة لنا من اشخاص كهؤلاء معطلين وعدم استثمار طاقتهم وموهبتهم وذكائهم في تطوير
لذلك لا يوجد خوف علي الاطلاق والان ادرك الجميع احتياجهم لهم لدعم القطاع الصناعي …