بالبداية أحب أهنيك على وعيك وحرصك على مستقبلك بالرغم من صغر سنك، أنت أفضل مني ومن شباب كثيرين يوم كنا عمرك.
الشيء الثاني: مهنة الهندسة في السعودية مالها مستقبل، لا الحين ولا حتى بعد ١٠ سنوات على أقل تقدير. تكدس خريجين بشكل فظيع من جامعات محلية وأجنبية، سوق العمل مب بس متشبع إلا جته تخمة من أعداد الخريجين الهائلة مقابل احتياجاته. إذا أنت تخرجت بمعدل ٣/٤ مثلا في تخصص الهندسة المدنية، حط ببالك أن فيه ١٠ آلاف (حرفيا ١٠ آلاف) مهندس بنفس مؤهلاتك بالضبط وبعضهم عنده خبرة وأنت لا. هل تتوقع أنك تقدر تتفوق على ١٠ آلاف من أقرانك؟ الجواب غالبًا لا.
كخريج من جامعة البترول، أنت مختلف عن البقية قي نظرك وراح تبقى هالنظرة ملازمة لك وقت طويل لأنك عارف ومستوعب حجم الضغط اللي مريت قيه مقابل خريجي الجامعات الثانية. الخبر السيء أن سوق العمل مايهتم كثير لهالمعلومة وقرر يختزل مسيرتك الجامعية كلها في رقم مجرد اسمه GPA.
الحين بنقل لك تجربتي الخاصة اللي ماتعد حكم نهائي لقرارك لكن هي تجربة لازم تسمعها، وأنا بعمرك تمنيت أحد يقول لي هالكلام.
تخرجت بأغسطس ٢٠١٩ تخصص هندسة كهربائية من جامعة البترول بمعدل ٢،٨٨/٤، قدمت على شركات كثير يدويا وعبر الشبكة او عن طريق لنكدن وبيات، قدمت كثير لكن مافيه رد وزملائي ايضا واجهوا نفس الاشكالية، توقعت أن المشكلة في طريقة التقديم او السيرة الذاتية، راجعتهم كثير وطورت فيهم لكن المحصلة واحدة! اغلب برامج تطوير الخريجين المنتهية بالتوظيف من الشركات الكبيرة تطلب معدل معين كشرط اساسي للقبول بدون ادنى اكتراث لحقيقة انك طالب مختلف من جامعة مختلفة! (او هذا على الاقل اللي زُرع فينا من وحنا اوريات سواء من قبل المجتمع او من منسوبي الجامعة نفسها)، بعد فترة ٦ اشهر -وبشكل لاشعوري- بدأ الاحباط يتخللني، وصار تعدي علي اعلانات توظيف ولا اقدم عليهم لان عارف ان مابستفيد شي، تحطمت كثير وحزنت كثير لاني اعرف اني مااستحق كل هذا لكن الحمدلله، اشتغلت بعدها بمرسول عشان اغطي مصاريف يومي مع الاستمرار في التقديم، استمريت على هالحال ٨ اشهر تقريبا ( الان مضت ١٤ شهر منذ تاريخ تخرجي) الى ان وصلني رد مقابلة لوظيفة نسيت اصلا اني قدمت عليها (من كثر الشركات اللي قدمت عليها) قعدت احوس بالايميل وادور لين لقيت انهم مستودع تخزين معدات ثقيلة وانا قدمت عليهم قبل ٣ شهور و٣ اسابيع على وظيفة مشرف سلامة براتب ٥٠٠٠ بدون خصم Gosi يعني ٤٥٠٠ دوام ٦ ايام بالاسبوع. رحت المقابلة طبعا والحمدلله عدت على خير ووصلني بعدها العرض الوظيفي وقبلت فيه بلا تردد كون هالراتب مااقدر اجيب مثله وانا سواق مرسول. الحين لي ٣ اشهر تقريبا في هالوظيفة اللي لاتمت لتخصصي ومؤهلاتي وقدراتي بصلة… تعدي علي اوقات وانا بالمستودع واتذكر كم ليلة ميجر او فاينل مانمت فيها وقعدت اذاكر واخرتها هالنهاية… هالشي مضيق صدري كثيير ومسبب لي ازمة مااتوقع بتعافى منها في الوقت القريب… طبعا باقي زملائي بعضهم ماتوظف للان ومعظمهم تعسكر في الامنية وايضا بعضهم توظف لكن بوظايف مشابهة لوظيفتي واخيرا فيه نسبة ٥-١٠٪ توظفوا بمكان يليق بهم. الحمدلله على كل شي، انا اعرف ان هذه مب النهاية وماراح اظل بهالوضع المزري للابد لكن الحين قربت تعدي سنتين راحت عالفاضي وهذه محد مسؤول عنها الا انا واختياراتي غير المدروسة!
ما اقدر اقولك اذا الطب هو الحل، لكن اللي متاكد منه ان الهندسة مهي الحل. شوف لك تخصص انت فاهم فيه وتقدر تجيب معدل ٤/٤ يصير حتى لو ماتوظفت فيه تقدر تنقبل في برامج حديثي التخرج.
هذه تجربتي باختصار، ونصيحتي لك دامك باقي مادخلت ٢٠ سنة حتى، اطلع… غير تخصصك لان فيه احتمال ٩٠٪ راح تتعب حالك على الفاضي…
اغلب خريجين الجامعة المهندسين على مر الزمان ينجحون ويلقون التقدير اللي يستحقونه , احنا نمر بفترة صعبه اقتصاديا على العالم كله وكلامك كلام شخص محبط ويائس من هالفترة الصعبه فقط
مهنة الهندسة بجميع تخصصاتها مطلوبه وتبقى مطلوبه دايما , اتمنى لك ولكل شخص يقرا النجاح والتوفيق
بصراحة اخي ما أعرف ايش الغرض من فتحك لموضوع مثل هذا
مافي اي تخصص جميع خريجينه يتم توظيفهم ومثل مافي ناس للأسف يجلسوا سنه وأكثر بدون توظيف في ناس تتوظف بعد عدة شهور وايضا ممكن تلاقي اثنين بنفس المعدل تقريبا ونفس التخصص وواحد يتوظف بدبل راتب الثاني لأن الأرزاق بيد الله سبحانه وتعالى وما في احد عارف فين نصيبه لنفرض شخص عنده رغبة قوية يدرس هندسة وحاب التخصص ومستمتع فيه هل يعقل يتركة ويدرس مثلا ادارة لانه قرا شخص او اكثر كاتبين انه التوظيف في هذا المجال صعب؟ وخصوصا انه بيتخرج بعد سنوات يعني كل الاحتمالات وارده.
النقطة الأخيرة اللي بأضيفها انه اذا بتبحث عن السلبيات والنظرات المتشائمة بتلاقي واذا بتبحث عن الايجابيات واشخاص تجاربهم ناجحة لنفس الموضوع بتلاقي فالموضوع يعتمد عليك انت.
ركز على الأمور اللي تساعدك في تحقيق هدفك واترك عنك كلام الناس ولا تبني رأيك عليهم وعلى تجربتهم.
مهنة الهندسة عليها طلب والجهات والشركات لم يطلبوها شفقة ورحمة بالباحثين بل لأنهم يحتاجونها . الأرزاق بيد الله يا صاحبي وحتى من أتو بمعدلات عالية أو منخفضة لم يضمنوا مكانهم ١٠٠% والعبرة في جائحة كورونا . لا أخفيك علماً بأنني وشريحة كبيرة من الزملاء محبطين لتخرجنا في أزمة كهذه لكن ليس أمامنا سوى الإستمرار في البحث . فلا فائدة من قراءة تعليقات كهذه وغمس نفسك وغيرك في دوامة من اليأس والاحباط .
الازمة اللي قاعدين نعيشها أثرت على كل شي مو بس الوظايف وفي كل أنحاء دول العالم.
الشي الثاني: أكبر غلط انك تحط في بالك انك شخص مختلف عن غيرك فقط لانك متخرج من جامعة معينة! ممكن يجيك شخص ثاني من جامعة اخرى تعب على نفسه ويقرأ ويحاول ينمي معلوماته سواء على مستوى تخصصه او خارج تخصصه، ويكون افضل منك. اسم الجامعة يحدد وظيفتك او مجال عملك هذا اكبر خطأ.
مجال الهندسة هو مجال وااااسع وعليها طلب بشكل كبير.
الشي الاخير: مريت بفترة بسيطة قبل التوظيف وبالعكس ماكنت متحسف لدراستي او اختياري الهندسة. حطيت عندي خيارات ثانية مثل اكمال الدراسة. وطبعا وقتها كنت اشتغل كمدرس خصوصي اونلاين منها احصل فلوس وقاعد استخدم معلوماتي اللي درستها.
مهنة الهندسة مرغوبة والان قرارات توطين وأقل وظيفة مهندس ب 7 الاف ريال …
صح هناك ظروف اقتصادية صعبة نمر بها وأزمة … لكن بإذن الله الوضع يتحسن .
ونعم ال GPA مهم جدا وكل ماكان عالي زادت فرصتك واللي اعرفه ان جامعة البترول صعب تجيب معدل عالي او حتى جيد نظرا لصعوبة الدراسة بالبترول عكس الجامعات الاخرى … هنا المشكلة .
نظرا لصعوبة الوضع حاول تقدم حتى لو على غير تخصصك بالاخص اذا راتب عالي روح مو لازم التخصص … روح حتى لو شركات الكونتراكت او smp فني اللي راح يكون عليها توطين ماهي مشكلة اهم شي تكسب خبرة ويكون عندك مصدر دخل .
بالنسبة للتخصصات الاخرى مثل الطب انا ما انصح فيه الا للي يحب هذا المجال فقط .
لان الهندسة مقارنة بالطب موية … الطب راح تنكرف كرف وتجنن جنان عمرك ماشفته بحياتك .
فيه تخصصات حلوة مثل اداراة الاعمال - القانون - الموارد البشرية - الأمن السيبراني - علوم الحاسب ( هذي لها مستقبل ضخم ) والهندسة كمان مرغوبة .
بالبداية حاب اقول الله يرزقك بالوظيفة الي تتمناها قريب. نعم انت كخريج هندسة من جامعة البترول (بغض النظر عن المعدل) تقدر تتفوق على الكم الكبير من الخريجين ولا تشيل هم. بعض النصائح:
- اهتم بفهمك للتخصص. لما تكون مهندس كهربائي وتدخل مقابلة لازم تعرف ايش ال transformer a وانواع ال motors. والاساسيات بتخصصك.
- اهتم بلبسك وقت المقابلة. اذا بتلبس ثوب وشماغ قفل الازرار الي فوق (ما تتخيل قد ايش هالشغلات مهمة). اذا بتلبس لبس كاجوال خليه مرتب.
- اهتم باللغة الانجليزية شوي.
- شد حيلك بالمواد. حاول ما تقل عن 2.5 وحتى لو كنت اقل فيه فرص ان شاء الله
- قدم قبل لا تتخرج! لا تنتظر لين اخر فاينال اقزام.
- خلك مرن باماكن العمل.
في السعودية مافي شي اسمه تخمه وخريجين كثييير والدليل ان بلدك فيها 13 مليون اجنبي! انت موظف عواطلية دول الجوار وبعضهم برواتب حلوة
وعدد العاطلين عندك مليون او 2 مليون بسس طبعا لو حسبنا الي منتيه اقاماتهم والمتخلفين العدد بالراحة يوصل 17 مليون اجنبي!!
عدد المهندسين للحالهم 300 الف والسعوديين منهم مايجي 10% يعني لو سعودنا كل وظايف الهندسة راح نضطر نستقدم مهندسين من برا
انا اشتغلت في اكثر من شركة بشوف اجانب بدون شهادات مسجلين بالهيئة بمسمى مهندس ورواتب اساسي 20 الف! هنود ولبنانيين ومصارية
ولاحد يقول فيه تدقيق مافي اي تدقيق واذا انكفشوا يقولولهم غيرو المهنة لفني…
بس المشكلة من فوووق
طبعا يجيك شايب اتخرج في ال70 ويوم اتخرج اعطوه ارض و50 الف (تسوا 500 الف حاليا) والشركات والحكومة كانت تقوله تعال فين تبغا تتوظف واختار…
يقولك والله لو طيرنا الاجانب مافي سعودي يشتغل عامل نظافة او سواق او بناء وغيره
حبيبي محد قال نطير عمال النظافة لان عددهم كلهم على بعض مايجي مليون او 2 مليون! باقي الاجانب فوق حاجتنا وبالامكان الاستغناء عنهم واحد المسؤولين كم مره صرح وقال بالامكان التخلي عنهم بس شكله بياع كلام…
فوق ماهم راضين يصدروا قرارات قوية لصالح الشباب الي يشكلوا الاغلبية
شباب بدأو يدخلوا سن ال30 بدون اي خبرة ولا وظيفة وبالتالي بدون زواج وتكوين عائلة
بعد 10-20 سنة راح نشوف كارثه…
المحزن المضحك المبكي ان خلال فتره كورونا لحالها وزارة العمل اصدرت مليون فيزا عمل!
ويقولك والله ازمة اقتصادية ومدري ايش!
يعني مليون وظيفة تم توفيرها لعواطلية وضحايا كورونا وانت ياسعودي يالي تعليمك احسن من باقي جامعات دول الجوار اذا اتكلمت تشوف هجوم وتخوين وقذف…
----------
ثاني شي صاحب الكلام الاصلي كل كلامه البترول البترول يحسسك ان خريجي الجامعات الثانية متخرجين من منصتي ودارسين اونلاين. الكل تعب وشقا عشان الشهادة… الله يرزقك ويوفقك وان شالله الفرج قريب.
ما قريت الا بداية كلامك لكن اقول لك كله كلام فاضي… اشخاص معدلات اقل من العادي من جامعات مغموره حصلوا شغل. اللي كتب ذا الكلام منضغط نفسيا ماهو واقعي ابدا… وترى من الحين مسؤولية انك تحصل وظيفة هي عليك انت شخصيا كل شيء في الدولة مهيأ انك تحصل شغل من نظام توطين وسعوده القطاعات وانشاء مشاريع في كل ديره… “الهندسة مالها مستقبل في السعوديه” الهندسة لها حاضر حاليا وان شاء الله مستقبل افضل… لكن هي مسؤوليتك انك تحصل وظيفه ولو تروح يدوي او ترسل SMS غصب بتحصل.
أنا أتوقع سبب سيطرة الأجانب على الوظائف الكبيرةمثل القطاع الهندسي و الصحي انو لو ترجع قبل 40 سنة تلاقي السعوديين عندما يتخرجو مباشرة يذهبو للقطاع التعليمي كونه أسهل دراسة و يصير مدرس يعني مثلا 80% من الخريجين يدخلو قطاع التعليم ( اجتماعيات , لغة عربية , اسلامي ) أسهل تخصصات و يدرس بعدين في مدرسة حكومية او خاص . فصار الطلب على الاجانب يزداد كون القطاع الهندسي و الصحي يحتاج موظفين و طبعا الاجانب الذين يتزظفو يتوارثو الوظيفة تلاقي الاجنبي مثلا قبل ما يتقاعد يوظف كم شخص من أهله . القطاع التعليمي صار فيه اكتفاء من 2010 يقول مدرس قبل قدم للتعليم 32 الف و قبل منهم 8 الاف . عندي أخ كان يتدرب في شركة سعودية كان يكلمه المديرأجنبي أن السعوديين دوامهم غير منضبط و حتى شغلهم غير جيد . لكن ميزة توظيف الاجانب :
1- الاجنبي يرضى براتب قليل لانو راتب الاجنبي يجي نصف راتب السعودي ( السبب أنه يحول راتبه لبلده فيساوي هناك أضعاف )
2 - الاجنبي منضبط بالدوام حتى لو هوا مريض و عنده كورونا يداوم
3 - حتى شغله تحسه يتحمل كرف و في نظرهم الاجنبي عنده أمانة في الشغل