أعزاءي أعضاء المنتدى الغالين، شكراً لكم على دعمكم الدائم وإجابة الاستفسارات
ندخل في الموضوع على طول حبيت استشيركم ومن لديه خبره ممكن تفيدني…
كنت موظفة كونتراكتر في شركة سابك، وعملت لمدة ٨ شهور. بعدها طلعت من سابك لحصولي على فرصة افضل (مسمى وظيفي أعلى + عرض افضل 18000)
في الفترة الماضية تواصلوا معي سابك مره ثانية وتم استقطابي دايركت هاير + عرض وظيفي ممتاز.
البكج: 18000
اساسي: 13600 - بدل سكن: 3400 - بدل مواصلات: 1000
طبعاً قبلت، اولا لاني اعرف ان هذا العرض فوق القريد اللي انا عليه + مميزات سابك اللي الكل عارفها.
للمعلومية خبرتي سنة ونص ولكن اثبت نفسي بكل المقاييس وتركت بصمة… الحمدلله يارب على رزقه وتيسيره.
نجي الحين لاستفساري…
في الفترة الحالية عملت مقابلة في ارامكو دايركت هاير ومع ادارة شفت منهم كل الاحترام والاحترافية. دامت المقابلة ٥٠ دقيقة واعتقد اني تركت فيهم اثر ايجابي وانبسطوا.
استفساري المتواضع، في حال تقديم عرض من ارامكو هل في مجال للتفاوض معهم بناءاً على راتبي السابق من الشركة السابقة + الراتب المعروض من سابك؟
ولا يعطونك العرض ويا توافق يا تمسك الباب؟
اللي اعرفه اني اندرج في ارامكو تحت حديثي التخرج وفي قريد وحسبة معينة. لكن من وجهة نظري الشخصية أؤمن ان الواحد لما يكون واثق من نفسه وعارف قيمته + عنده track record انه مطلوب وقاعد يندفع له هذا المبلغ من شركات قوية فالافضل انه ما يستقل من نفسه ويتناقش ليحصل على فرصة افضل.
احتاج شوركم عشان اعرف اتصرف اذا الله وفقني وتواصلوا معاي في الفترة الجاية والشكر مقدم لكم جميعاً!
الصراحة استفسارك في محله ودقيق جدًا وأتوقع صعب تلقين الإجابة الكافية اللي تريح تفكيرك إلا من شخص مر بنفس تجربتك وجاله عرض من أرامكو أو أحد يشتغل بقسم التوظيف عندهم…
بالنسبة لأرامكو، غير سنوات الخبرة يعتمد عالشهادة إذا بكالوريوس أو ماستر بالقريد.
بالنسبة لسؤالك، أكيد راح يكون فيه مجال للتفاوض على الراتب لأنه تقريبا يحصل بكل الشركات فمابالك بأرامكو، الأفضل تمشي معاهم مرحلة بمرحلة وإذا جاء وقت العرض الوظيفي اللي عندك تذكري لهم الموضوع، يمكن يوافقون ويمكن يعطونك نفس عرضك لو هم مقتنعين فيك لأن بالأخير عندك خبرة وهم عارفين أن نادرا احد يترك وظيفته ويروح لعرض وظيفي أقل من ناحية المميزات والراتب بالتحديد. بس انتظري يمكن هم يسألونك عن راتبك أول أو يطلبون payslip وماتدرين يمكن من أنفسهم يعطونك راتب مقارب (كله إحتمالات أنا ما أعرف نظامهم).
الخلاصة من وجهة نظري: يمكن فيه استثناءات للأشخاص اللي عندهم خبرة لكن ما أعرف أي شي صراحة.
بالتوفيق.
اهلا وسهلاً، شاكرة لك ردك اخوي
حبيت اكون دقيقة عشان اللي بيرد يكون عنده تصور واضح…
ذكرت نقطتين مهمتين وهم: وجود الخبرة وخبرتي في سابك مجالها من مجالهم وبالاضافة لشرائهم حصة كبيرة فيها + ندرة ان الواحد يترك وظيفته ويروح لعرض وظيفي اقل.
السلام عليكم ورحمه الله وبركاته
كل التوفيق ي رب وفالك الافضل
سنتين خبرة تعتبر لا شيء يذكر … لا اعتقد ابدا ان في شركة راح تعطيك ربع صلاحيات موظف رسمي اذا كانت خبرتك اقل من سنتين… وتنقلك لأكثر من وظيفة في فترة قصيرة يدل على انك ما انت مستقر وتبحث عن المادة ولا يدل ان لك بصمة كما تفضلت فاستقطابك ما راح يكون ذو اهمية كبرى … ارمكوا ممكن تعطيك راتب وقريد يسبق عمرك وخبرتك كذلك في حالة وحده اذا عندك تخصص نادر وخبرة نادرة … ما عادا ذلك فانت وغيرك سواء … اذا انت رفضت غيرك راح يقبل
وكل التوفيق لك وللجميع ي رب والله يشرح صدرك ويسر امرك
كجواب على سؤالك ادخلي المقابلات مع ارامكو الين يجي العرض الوظيفي
لما يجي العرض فاوظيهم واعطيهم من الكلام انك موظفة متميزة لما بغيتي تخرجين جت سابك واعطتك عرض ممتاز عشان تحافظ عليك
عموما بعد الخرابيط هذي كلها بتشوفين, يا انهم يعطونك راتب اعلى, او ما يعطونك, في النهاية انتي في وظيفتك ومارح تتركينها الين يجيك عرض احسن, باختصار مافي شيء تخسرينه
ما يحتاج تستنين احد يعرف اذا ممكن يزودون راتب الخريج ولا العرض ثابت