انا جاني راتب ب6000 ريال في شركة في جدة وانا من سكان الشرقية
سؤالي هو شفرق بيني وبين شخص متوظف في ماكدولندز ب شهادة ثانوية ب 5500 ريال - مع كل احترامي لهم طبعا - وبين شخص دارس وكارف خمس سنين في جامعة من افضل جامعات السعودية؟؟
يعني انا من ناحيتي اتوظف في ماك جنب البيت يم اهلي موفر قيمة السكن وقيمة البنزين افضل من اقبل هالعرض.
الشركات يوم ترسل عرض مثل هذا هل هو استقلال لحديثي التخرج انو بيرضى يشتغل ب اي راتب؟ ولا لانو ما عنده خبره ولا كيف يعني؟
مقارنه لنفسك بموظفين ماكدولندز, حلوه و لكن لو نتعمق شوي بنحصل انه فرص النجاح و الرواتب العالية متاحة للعدد كبير من الناس. موظف ماك او خريج ثنوي قد يبدا راتبه قليل ولكن باتقانه للعمل و شوية حظ قد يترقى لمدير فرع, ممكن مدير منطقة, ممكن ينتقل لشركة اقوى, ممكن يوصل راتبه 10 15 20 الف واكثر. بعضنا اكيد مر عليه شخص اشتغل بشهادة ثنوي و بعد كم ترقيه صار بمنصب ممتاز وراتب عالي. قالها غازي القصيبي" (وكنت، ولا أزال، أرى أن هذا العالم يتسع لكل الناجحين بالغا مابلغ عددهم).
متى يكون راتبك عالي ؟؟ اذا انت عُمله نادره في سوق العمل. انت لازم تحدد قيمتك في سوق العمل, انت خريج فرش و بهندسة و بتخصص يحتاجه السوق, هنا انا اقولك حاول تبحث عن فرصه فوق الـ 8 الاف او 9 الاف او 12 الف او اكثر, لانك حديث تخرج و بعمر ممتاز ومرغوب لدى كثير من الشركات, لانها تقدر تتدربك و انت بنشاط شبابك و تاهلك و بعد كذا تكون موظف مؤهل للوظيفة الهندسية او الادارية.
لكن اذا مرت سنه او سنتين على تخرجك, هنا انا اقول اقبل بوظيفه تكسب فيها خبره و ترفع من قيمتك في السوق بس اهم شي يكون منصب له مستقبل وهذا فيه شوية حظ في كيف تختار الوظيفة. البعض يشغل سنين في شركه براتب 8 الاف مثلا و هو عُمله نادره في السوق ولا هو داري و ساكت وراضي, يوم يطفش من راتبه و يقدم استقاله, تقوم الشركة تعلي راتبه الى 9, ممكن 10 ممكن 14 حسب الى يستاهله. فأنا اقول حاول تعرف قيمتك في السوق, قدم على جميع الشركات طور من نفسك اشتغل و لو جاتك فرص براتب افضل فهذا يدل انك تستاهلها.
شوف ي غالي لاتحكم على الشهادة نعم الشهادة كما يقال سلاح لكن هناك اشياء اهم .
نعم ماكدونالدز ممكن أفضل وغير عنده مميزات مثل الوجبات مجانا والسكن وغير ذلك كلها ذي فوق الراتب …
أعرف خريج ثانوي ITC ارامكو ماسك منصب عالي وترقى لمسؤول القسم وهو ماعنده الا ثانوي
وخريج تدرج في سابك للثانوي والان ماسك مدير التشغيل والصيانة وعنده خبرة في الفيلد وراتبه فوق 20 ألف واعلى من المهندس بمراحل … فلا تستنقص ابدا من حقين الثانوي
فإنت إبدأ أول حياتك براتب مشي حالك ومع الوقت بإذن الله بتلاقي الأفضل إنت ترى لسع أول حياتك صح خريج جامعة قوية وكرف وكلنا مثلك لكن ماعندك خبرة تعطيك ذاك المنصب والراتب العالي
وليه تتوظف ماك أعتقد ان الشركات بالشرقية أكثر من جدة قدم عليهم ويارب يكون لك نصيب . وحصولك على عرض بالقرب من منزلك نعم أفضل لأنك بتوفر الكثير .
واحد دوامه 400 كيلو يوميا رايح جاي ومبسوط فشوف انت الافضل وهل يناسبك الأمر او لا