قبل فترة كتبت في حسابي في اللينكند حول وجهة نظري الشخصية في موضوع من تكون له الأولوية في القرار هل الحصول على الوظيفة أما اكمال الدراسة…؟! ، وخصوصا " الشهادات العليا" ،، انا اعرف ان الموضوع جدلي وقابل للنقاش.
لذلك حبيت ان اطرحه هنا بغرض ان نستفيد من بعضنا البعض من خلال تنوع الاراء والافكار.
ويسعدني طبعا قراءة أي مواضيع في حسابي والتعليق عليها ،، لان اغلبها في مجال اهتماماتنا سواء في الوظيفة او الدراسة.
بعض الاشخاص الناجحيين الى قابلتهم في حياتي كان هدفهم واضح من الدراسات العليا. يعنى مثلا يبغى يصير عالم في مجال الطاقة النووية, و هو اساسا مطلع على سوق العمل و استشار اشخاص كثير قبل يدخل هذا المجال. فمثل هذا الشخص يكمل دراسات عليا ولا يشيل هم الوظيفة, بالعكس الوظيفه تجيه لحد عنده. ولكن المشكله مثل ما قلت اذا صار اكمال الدراسة مسكن من غير هدف فعلي.
شكرا على الاضافة الجميلة ،، تخصص الطاقة النووية في الفيزياء مثل تخصص النانو في الكيمياء ، قبل 5 سنوات كان هناك تحريج وترغيب للناس للدخول في مثل هالتخصصات وكثير منهم تحمس لمسمى التخصص و لفكرة ان التخصص جديد وراح يعمل ثورة مستقبلا في مجال البحث العلمي،،
النتيجة طبعا امامنا الان واضحة ان مثل هالتخصصات لازلت عندنا خارج الطلب ( out of the order ) غير مرغوبة في التوظيف ولا أحد يعيرها أي أهمية أصلا …!؟
برأيي الشخصي انا اعتقد الخبرة أهم من الشهادة واذا اجتمع الاثنين معاً سيكون أفضل بكثير .
وحاب أضيف شيء من فضلكم لاحظت الكثير في لنكندن ينتقد أسلوب ال HR وهذا خطأ كبير بالأخص اذا كنت باحث عن عمل لا تنتقد احد أو تتكلم في أمور قد تضر فيك .
يعني يقلك لازم ال HR كذا أو مايسال عن كذا وهذا خطأ … انتبهوا من هذا الشيء .
بالتوفيق للجميع إن شاء الله وفالكم كل التوفيق والنجاح .
من وجهة نظري المفروض الشخص ما يستعجل في قرار اكمال الدراسات العليا. يجب عليه اولاً العمل لفترة من الزمن و اكتساب الخبره و معرفة احوال سوق العمل بشكل عام و ماهي التخصصات المطلوبه، ثم بعد ذلك يتخذ القرار المبني على حقائق و تجربه و ايضاً يمكن يكون لديه فرصة الدراسه على حساب الشركة فيكون كسب الدراسة و الوظيفية في نفس الوقت.
اما انه يتجه للدراسات العليا مباشرةً بعد التخرج اشوفها مخاطره و قرار خاطيء
الابتعاث مر بعدة مراحل قبل لا يوصل للشكل الحالي اللي فيه هو الان والمقصور فقط على “منح البعثات عن طريق جهات التوظيف” ،،
سابقا كان التركيز فقط على الكم،، وفتح باب الابتعاث على مصراعيه ،، ومع غياب خطط استراتيجية من قبل الجهات الحكومية
اصبحنا الان في مرحلة عطالة المبتعثين،، والسبب الرئيسي ان كم هائل من المبتعثين درسوا في الخارج بدون أمان وطيفي ، بالاضافة
ان جهات التوظيف الحكومية في ذاك الوقت تطرح وظائف اغلبها لخريجي الداخل، بعد ما خلصوا المبتعثين دراستهم ، وجدوا ان هناك
أكتفاء وظيفي وشح في الوظائف المطروحة…
المشكلة ان بعد كل هذه الاشكالية الموجودة الان ،، لازال بعض الاشخاص مصرين على خيار الابتعاث حتى من دون أمان وظيفي ،،
ولأجل ذلك نحاول ان ننبه الجميع من عواقب القرارات اللامدروسة ، والاستفادة على الاقل من تجارب الاخرين, لعل الله ييسر امور الجميع
ويحقق اماني وطموح كل شخص يتمناه.
لاشك الابتعاث لدراسة البكالوريوس حاجة جميلة و خصوصا من تجربة الشخص الاجتماعية و الثقافية لكن
بشرط التخصص متوافق مع متطلبات السوق
لدي زميل بالعمل الان يحمل شهادة الماجستير بالكهرباء ( امتداد لنفس التخصص ) كان موظف في مصنع و ثم جاء
الابتعاث فراح كمل دراسته
حاليا جالس يعاني بالبحث عن وظيفة مناسبة لشهادته لكنه استفاد من نواحي أخرى على سبيل المثال اللغة صار مميز جدا و البحث
و حتى أنه كسر حاجز الخجل
أحد أفكاري له كانت للتقديم بحذف الماجستير من السيرة الذاتية و خصوصا لديه خبرة سابقة حوالي السنتين و الان بالرابعة بعد الماستر
طبعا المجموع 6 سنوات خبرة لكنه يرفض الفكرة تماما
على الاقل ممكن كان يحصل راتب جيد يوازي خبرة الست سنوات و بعدها ممكن ينفعه الماستر بالترقية
شركتنا الحالية مستعدة تعطيك أي مسمى ولو CEO لكن بدون زيادة ريال واحد
المنشأت والوزرات صارت ماتعطي اي بدل حسب علمي لمدير الادارة لذلك صارت الناس تتحاشى الادارة خصوصا الي مشغول ولا يبغى وجع الراس الا المهايطي تلقاه يركض لها والي مايبغاها يعرضون عليه وممكن يجبر حتى ع الادارة بسبب عدم وجود مؤهلات عالية مثل الي عند هالشخص
وانا انصح بالبعد قد ماتقدر عن الادارة لأن اي طعة بتصير انت بالواجهة
انا حاليا جالس افكر في هذا الموضوع انا باقي لي اخر سنة في الجامعة ان شاء الله تخصص علوم حاسب وجلست اتكلم مع الشباب الى معايا في التخصص ما الافضل اكمل ماجستير ام ابحث عن وظيفة ؟ واحد من اصدقائي المقربين يشوف الافضل يكمل لان يشوف رواتب البكالوريس محدودة ولها حد يعني يشوف ان الشخص الى متوظف بشهادة البكالوريس راح يوقف راتبه عن الزيادة في نقطة معينة
انا عن نفسي اشوف الافضل ابحث عن وظيفة و اشتغل لان الخبرة اهم ومعرفة بيئة العمل هذا غير بعض برامج الماجستير بفلوس + ومن الممكن اشتغل و اطلع كم قرش بعدين اكمل ماجستر فا يصير عندي خبرة و دراسات عليا
لكل مقام مقال
اللجوء الفترة الماضية على الدراسات العليا كان لسبب واضح وهو الوباء.
جلوسك فالبيت اكثر من سنة بدون اي شيء يعادل حصولك على شهادة ماجستير !!!
ممكن اتفق معك فبعض كلامك اذا كنا فوقت مثالي والحياة جالسة تاخذك باحضانها اول ماتتخرج لكن الوضع للاسف كان مزري الفترة الماضية والامور بالكاد بدات ترجع لطبيعتها … فاي احد اخذ شهادة وحرص انه يطور من نفسه فالوقت الصعب هذا ان شاء الله تقتح له ابواب اكثر والله يعطيه على قد تعبه
كلام ان الراتب البكالوريوس محدودة او يتوقف عند حد غير صحيح أبدا. وبالعكس الي يروح يأخذ ماستر قبل مايتشغل حتى لو حصل وظيفة بشهادة الماستر راتبه في الغالب بيكون أقل من واحد بكالوريوس اشتغل اول ماتخرج. غير أنه ممكن بعدين في حال رغب يكمل الماستر مع الشغل.
أخي الكريم، الدراسات العليا ليست بندول تتناوله لتخفيف الالالم الاوجاع لديك… اسأل نفسك هذا السؤال ماهو هدفي من الحصول على الشهادة العليا …؟
اذا كنت تعتقد انها ستسهل لك الحصول على الوظيفية فنحترم رأيك ، ولكن رأيي يختلف من هذا الجانب…
ياغالي تحسسني ان الي اخذ الشهادة العليا تختفي شهادته الي قبل يقدر يستمر يقدم بالباكلوريوس والفرص الي للماستر يقدم بالماستر على حسب المجال وبيفتح له المجال الاكاديمي فاكيد راح تزيد الفرص لا تقارن شخص عنده شهاده باخر جالس فالبيت
انا جلست بعد البكالوريس سنتين عاطل ما جاني اي عرض و بعدها جاني فرصه اني اطلع ادرس برا؟ هل من المنطقي اني اجلس انتظر وظيفة بعد انتظار سنتين او اخذ الماستر ؟
اكيد باخذ الفرصه اللي قدامي … وعلى الرغم اني ما زلت الى الان ما عندي عمل رغم الشهادة ولكن لو يجيني فرصه ثانيه لاكمال الدراسه وانا ما عندي بديل باكمل احسن من الانتظار القاتل
يا اخوان ترا العطاله مرض ينهش جسد الانسان من كثر الهواجيس والامال والاحلام
اذا ربي كتب لك نصيب انك تتوظف بعد البكالوريس غيرك لسى ما جاه نصيبه وتوظف
يمكن ربي ميسر له موضوع الدراسه لشيء مخبيه له في المستقبل ما كان يتوقعه ولا يحلم فيه
لو كنت في بريطانيا مثلا وبتكمل دكتوراه من دون وظيفة راح اوفقك الرأي ،، لان في بريطانيا الدكتواره تعادل للشخص ك " كخبرة أكثر" ،،،
أما هنا في السعودية الدكتوراه ينظر لها كشهادة قيادية الشخص اللي يتوظف على شهادة كهذه راح تحسب حساب الميزات والراتب والمنصب
انا شخصيا توظفت بعد حصولي على الماستر من امريكا ، على نظام الخدمة “يعني منافسة عامة” ، هل تعرف كم عدد الاشخاص اللي قبلوا على
نفس المسمى الوظيفي اللي نافست فيه ،،، لم يقبل فيه الا شخص واحد " جالس يكتب هذا الرد الان" ،،
الفكرة الاساسية اللي بوصلها،،، لاتستعجل على الشهادة وتنسى الوظيفة ، واذا توظفت بمكان محترم راح تكتشف ان فرصة اكمال الدراسة
والحصول على الشهادة أسهل مما تتوقع …
