السلام عليكم ورحمة الله وبركاته
صبحكم الله بالنور و السرور
ياجماعة ابي رايكم في العرض الوظيفي.
قريد 23
البيسك 10371
بدل السكن 2500
بدل نقل 1000
over time 1500
ياليت اللي عنده خلفية عن رواتب بكتل مترو الرياض يفيدنا.
و عليكم السلام و رحمة الله و بركاته
مبروك العرض الوظيفي و ان شاء الله فالك التوفيق
بكتل تعتبر اكبر شركة مقاولات في امريكا و سمعتها جدا طيبة و دائما تمسك مشاريع ضخمة
الخبرة فيها جدا قوية و اشوف الراتب ممتاز
طبعا فيه نقاط مهمة مثلا الدوام هل 5 او 6 ايام في الاسبوع؟
ايش الوضع بعد ما ينتهي المشروع ؟ بمعنى آخر كيف الأمان الوظيفي؟
اعتقد هذي نقاط لابد تسأل عنها ، و لكن بشكل عام شركة ممتازة و مميزات ممتازة و اعتقد عندهم برنامج تملك بيوت (بكتل الجبيل) ما ادري عن مترو الرياض
هذا والله اعلم
بالتوفيق
ماشاء الله
الف مبروك بكتيل من اقوى الشركات في العالم
عندي سوال كم يوم اخذ لين ما رسلولك العرض بعد الانترفيو
والله تقريبن من اسبوعين الى ٣
راتب قريد 23 المفروض اكثر من كذا
عطوك مميزات قريد 22 وليس 23
ممكن تفيدني كم رواتب القريد 23 يعطيك العافية
فالك التوفيق اخ اياد الشركة جدا قوية وعالمية
الشركة بديت الاحظ انها بدت تأخذ بشكل كبير مهندسين سعوديين سواء ب خبرة او فرش
وباذن الله الخير مقبل
اهلا وسهلا،
انا جيت على قريد 23
لكن ب بيسك اعلى
وجاني قريد 24 بعدها
بيكتل حلوة بالجبيل بسبب مسألة السكن بيت وبرنامج تملك بيوت وموتر من الهيئة مدفوع التكاليف بنزين صيانة.
الدوام طوييييل جدا من ٧ لين ٦ خبرة بطلة.
اكن عيب الجبيل مافي مناصب عكس الرياض تحصل مناصب حلوة.
طلعت من عندهم لما كبرت وصرت لازم امسك مدير.
للاسف البونس الصح يبدأ من قريد 25 راتبين وانت طالع. بالنسبة لقريدك البونس يسمى SFS ويكون ثابت اقل من 3000 ريال.
كمرحلة من مراجل الحياة تعتبر بيكتل حلوة.
لكن بعدين تصير مكان عادي جدا، للاسف شركة للامريكان والبريطانيين السعوديين مو محصلين فيها شي الا واحد او اثنين دور بلنكد بتحصل ال PDM سعودي ومختارينه اختيار.
عيبها اذا طبيت بسوبر فايزر خايس، يلعب بزيادتك لعب
زمان بيكتل كانت عز ايام ٢٠٠٥ وحولها بعدها وضعهم صار خايس.
اي استفسار حاضرين.
الله يجزاك خير على المعلومات القيمة عندي استفسار هل فيه علاوات سنوية وزيادة في الراتب وكيف طريقة الصعود في القريدات وسؤال اخر ايش افضل قسم تشوفه ك راحة عمل واقل ضغوط<—————- اخوك جاله عرض منهم ويدور الراحة 
جميل جدا، الله يبارلكلك ويسهل امرك، الزيادات سنوية نعم تجيك حول ٢ او ٤ بالمية، القريد بتطلع روحك و بالسرا، لازم احد يكون بقريد اعلى منك يطلع عشان تاخذه تخيل بس.
امر اخر بعض السوبر فايزر الخايسين طبعا يقلك اذا ماداومت من بداية السنة ١يناير مالك زيادة لكن البعض الاخر ماعنده مشكلة عادي يمشيها، البونس عادي الى ابريل او يونيو الظاهر ينزلك ماعندهم مشكلة.
انا كنت بإدارة المشاريع اشتغل مع ادارة الانشاءات. الشغل كان جميل جدا جدا بتجيك اوقات صعبة و اوقات رخى لكن صدقني لمصلحتك وحتنبسط وتكون خبرة قوية جدا وتصير تطقطق برا.
ادارة الانشاءات فيها شغل كبير جدا و تكون قدام تحديات جميلة وبتتعلم.
ادارة المشاريع بتكون شغال في اعداد المشاريع و الجدولة و التحكم مهو ضغط كبير
الادارة الهندسية بتكون شغال تصاميم بشكل بحت و ماعرف عنهم الكثير لاني ماشتغلت عندهم ابدا بالهيئة.
اذا ودك ترتاح، ركز على قسم الخدمات او المدارس مروقين عالاخر
راس الخير خبرتها حلوة، لانها جديدة وفيها مشاكلً كثير وبالمناسبة الرئيس التنفيذي كان يدرس ماستر ايام كنت انا بكالوريس الرجال صاحي وشغيل وماينسى ماشاء الله تبارك الله.
الجبيل اكبر مشاريعها الجامعة وهاذي فيها تحديات كبيرة ان شاء الله تكمل من بعدي و تسلمها على اخر ماوضعت يدي عليه
فغالبا انت بتكون انشاءات ويعتمد الكرف على قسمك او بتكون مشاريع تشتغل في الانشاءات وبرضو يعتمد على القسم او كور تيم بتروق او الادارة الهندسية و غالبا مروق مافتكر عندهم كرف لكن خبرتها حلوة.
عندهم اجازة رأس السنة و يوم الكريسمس اوف حلوة تروق او تسافر تكون مشبوكة بالويكند يعني لونق ويكند.
اما اذا كنت رايح ريسك او موارد بشرية او تطوير او مالية ف والله علمي علمك لكن ادعي لك بالتوفيق في كل الحالات. ودائما اعرف بينقط عليك الشغل لانك انت بيكتل و الهيئة بتجيك تقلك “ها خلصت؟”
كم رينج الرواتب حق قريد 24؟
ماعرف، واللي يعرف ماتوقع حيقول لان المنتدى صاير نايم بزيادة
اساسا اغلب الخبرات ماتجي هنا، اكبر مهندس يشارك بأرقام وتواريخ دقيقة جدا و يشارك بشكل كبير و احييه و اتمناله التوفيق اخونا هموم مهندس.
هذا من كبار المنتدى الله يقويه ويسهل امره
كفيت ووفيت في الشرح يالغالي والله يباعد بينا وبين الانشاءات اذا فيها اختلاط واجتماعات مع المقاول المنفذ للمشاريع وصداع الراس
كم المدة المتوقعه لرد بعد المقابله؟
ياخذون من اسبوع الى ٣ اسابيع
يعطيك العافية اخوي
ممكن تقولنا ايش الفرق بين بكتل الجبيل وبكتل الرياض ، واذا عندك علم عن قسم testing & Commissioning كيف وضعه فالشركة ياليت تفيدنا .
بيكتل الجبيل مع الهيئة الملكية للجبيل وكل مميزاتك مرهونة بالهيئة وشغل شلليات عشان تمشي امورك
بيكتل الرياض ماعرف عنها شي لكن قوية اشوف مدراء مشاريع كثير من عندهم بعكس الجبيل حدك تسوي شغل رئيس القسم اللي مو فاهم شي ويطفشك ها خلصت
انا من يوم قالو لي العرض الوظيفي الا الان ٣ اسابيع لهم هل اجرائاتهم بالنسبة للقبول وارسال العقد الرسمي تطول بالعادة حبيبنا؟
مقدر اقلك يعتمد، الحبيل بموافقة الكلاينت الرياض ماعرف والله اش وضعهم
غريبة اللي دقو علي من الرياض وقالو عرضنا كذا وقبلت فيه