السلام عليكم ورحمة الله وبركاته الله يمسيكم بكل خير أعضاء هذا المنتدى العظيم ، أنا مهندس كهربائي لي سنة متخرج ووضعي ماش ، توظفت في مكتب استشاري هندسي سعودة وطلعت والحين في شركة مقاولات وتعرفون وضعها ما يحتاج ، المهم قدمت على كل برامج الخريجين وما كتب الله لي نصيب فيها ولا دخلت ولا مقابلة فيها ، سويت مقابلة وحدة مع شركة الكهرب قبل 6 شهور وما تم الإفادة إلى الحين سواء بالقبول أو الرفض ، وقدمت على الكليات العسكرية جاني رفض في الامنية والحرس ، والدفاع جاني قبول نهائي فيها واحتري رسالة التوجيه إلى أي قوة تم قبولي فيها ، والصدق محتار أنا ودي بشركات مثل stc أو الكهرب أو التحلية او الهيئات الحكومية وودي استقر بالرياض بس للأسف ما تيسرت لي إلى الحين ، وش رايكم لو أنكم مكاني تضيعون الفرصة هذي على أمل مستقبلا احصل فرصة بالشركات الحكومية أو الهيئات ؟ ، شوركم لأخوكم الصغير 
وعليكم السلام ورحمة الله وبركاته .
والله يا الغالي يقولك المثل مايحس بحرارة الجمر الا رجل واطيها , وعصفور في اليد ولا عشرة على الشجرة .
طبيعي انت متخرج مهندس كهربائي وودك تشتغل في مجالك متفهم هالنقطة انا بس شوف الميكانيك والكهرباء بكل مكان حتى بالعسكرية بشكل كبير .
فما اتوقع انك بتبعد بشكل كبير عن تخصصك . المسألة هنا هل انت شخصيا تشوف نفسك كويس بالسلم العسكري وبتقدر تأدي مهامك وتعيش براحة؟
طبعا مايحتاج اقولك العسكرية اريح بكثيييييييييييييييير من القطاع الخاص . انا مهندس في قطاع خاص بشركة كويسة الحمد لله وخويي ساكن معي ضابط بالدفاع , فعلا فرق السماء عن الارض هو يومه كامل له يداوم 4 ساعات او حولها ومستقريين ورواتب ممتازة ز شخصيا انا بقطاع خاص اداوم يوميا 9 ساعات مع الطريق روحة ورجعه 11 ساعه , خويي الضابط يداوم تقريبا 4 ساعات او 5 وايام يداوم ساعتين ويطلع والخطوط تكون شبه فاضيه لا وقت خروجه مايصادف وقت ذروة. القطاع الخاص الشركات الكبيره ممكن الراتب مستقبل يكون افضل بعد سنين لكن المشكلة تكمن في الوقت بيكون وقتك حرفيا شغل في شغل في صداع مابيكون عندك فايض وقت لاهلك ولحياتك الخاصه . ماراح يكون عندك وقت لو تبي تسوي بزنس بالمستقبل انسى . ف بالاول والاخير تعتمد عليك تفضل الراتب الكويس والوقت الشخصي ولا تفضل راتب اقوى بالمستقبل بس وقتك مش لك ولاهلك .شيء اخير انت رجل نضجت وتخرجت من الجامعة وجاء الوقت اللي تتقبل انك تصير عزوبي ومو شرط تعيش عند اهلك ف قرار انك تنتقل من مدينتك تراه مش صعب راح تتعود بعدين وبترتاح صدقني وشيء اخير ممكن بالمستقببل تنقل للمدينة اللي بخاطرك ف ماشوفها عذر عشان ماتقبل
بالتوفيق ولو اني بمكانك ماراح اتردد اني اوافق واصير ضابط .
والله أشكرك بشدة على نصائحك
الله يوفقك يا غالي
باقي الاستخارة و ربي يوفقك
أمسك في حاجة أزين لك و خليك جاهز لأي فرصة إذا نويت تخرج لاحقا
أنت تتخرج ضابط و هذه نعمة كبيرة و استقرار مهني و نفسي و حتى عاطفي إذا بتتزوج 
ادخل وبقوة ولا تفرط بها،
راتبك راح يكون مبدئي لا يقل عن 18 الف.
انا انقبلت بالدفاع والحرس وسحبت عليهم كنت ابغي مثلك وللحين بشركات زفت.
ولو يرجع الزمن دخلت كان الحين انا رائد.
ادخل ولا تشاور
الله يجزاكم خير ، بإذن الله بروح لها والله ييسر الأمور ، شاكر لكم بشدة على النصائح ومنكم نتعلم ونستفيد والله يرزقكم أفضل الفرص