الي والدي العزيز (الجزء الثاني)
السلام عليكم
كيف حالكم يا شباب …والله وحشتونا … بصراحة انا ما توقع القى هذه الاستجابة للرسالة الأولى وكانت فوق الممتاز وهذا مما يشجعني على الاستمرار…
اتابع الموضوع عن الثغرات والسلبيات :
1- النواحي الأكاديمية:
*نعرف ان الطلاب مجبرين على حضور الدوام والكل له اسبابه …يعني ممكن واحد مجبر على الحضور علشان ما ياخذ DN وواحد مجبر علشان ما تضيع الماده منه وغيره علشان ابوه يبغاه يروح والمحصلة انو الطلاب يحضروا لكن ليش لما ما يحضر الدكتور محد يزعل ( محد يكلمه) ممكن علشان هو دكتور؟
انا من هذا المنطلق ارى انوا الدكتور لو تأخر 10دقايق الطلاب مجبرين على ترك محاضرته زي مهم مجبرين على حضورها وياريت في نظام يوضع للحد من هذه المشكلة وتكون بمثابة جزاء للدكتور.
*الحين المواد الاسلامية والعربية احنا مطالبين فيها وكذلك جامعة عبد العزيز قسم الطب ولكن الفارق هو انهم مطالبين بنجاحها وفقط (مش داخله في المعدل) بينما نحن الغلابه والمساكين نكرف على الفاضي وياليت نلقى الى يريحنا …ياليت ينظروا في الموضوع هذا.
*بعض المواد كمها يكون كبير …طيب ليه الضغط على الطالب ؟ يرودوا ويقولوا :انها لابد لدى الطالب انو يعرفها . اعطيكم مثال EE203مادة ممتعه بس مواضيعها كثير وهذا بشهادة الدكاتره أنفسهم الي يقولوا الترم يدوب يغطي المادة ومافي مجال لمراجعتها …الحل بسيط بدل ماناخذ الماده مره وحدة قسموها مادتين وريحوا الخلق وهذا الحال مع كثير من التخصصات.
*ليه المسؤولين ما يسألوا انفسهم هذا السؤال:
ليه بعض الدكاتره محد يسجل عنده الى القليل بخلاف الغير؟
الجواب بسيط : لو انت رايح تشتري بضاعة من عند تاجر معين وجيت وقلتلك انوا هذا التاجر سئ ممكن يغشك وممكن يضحك عليك وممكن يبيعك بضاعة خربانه … ردك الطبيعي انوا يا اما تتجنب هذا التاجر او تتأكد ولو اخترت انك تتأكد حتسأل غيري ولو قالولك الأغلبية انوا تعبان النهاية انك تبعد عنوا
هذا السيناريو يحدث تماما لحظة اختيار الدكتور ولكن لما الجامعة تعرف انو محد يسجل عنه لازم تشوف قصته ( تتحقق من الهرجة) يعني هل هو سئ في الشرح او في التصحيح او في الأخلاق او كلها ويا حسرة شفنا دكاتره جدا مش في المستوى المطلوب ولازالوا …صحيح هم وضعوا تقييم الدكاتره عن طريق النت بس مو كفايه…مو كفايه والمتضرر الأول والأخير الطالب …
2- مواضيع أخرى:
* الأمن وما ادراك ما الأمن …كلنا على علم ان الهدف الأساسي للأمن هو الأمن …ولكن في الجامعه الهدف هو تحرير المخالفات …تخيلوا معي كم مخالفه يتم تحريرها كل شهر ؟10…100…1000؟؟؟الله أعلم لكن لو احنا نفكر صح الفلوس الى تروح من الطالب الغلبان ممكن تكون ثروة بفرض انو في الشهر عدد المخالفات المحررة = 1000مخالفة (ممكن تكون في الشهرين)
المبلغ المقطوع لك مخالفة = 100ريال
الناتج : 1000*100=100000 ريال ينطح ريال لو هذا المبلغ تم الاستفاده منو لكان عندنا أمن ولا الى في لوس انجلوس…ولكن يا حسرة.
أرجع للأمن …ترى الأمن عندنا رايح فيها والدليل ما حدث في حادثة الحريق التي جلبت العار للجامعة.وغيرها وغيرها من المصائب.
*الحب رابطة قوية من أسمى الروابط ( شوف حال العشاق) تخيلوا انو احنا نحب الجامعه ما كان احد تذمر و تبكبك …المقصد انوا الجامعه لازم تلبي حاجات الطالب علشان يقدر يحبها وفي الأخير يقدر ينتج
*مطعم الجامعه … والله حاله اليوم رايح للمطعم ويوم وصلت وشفت الأكل المكرر المكرر المكرر رحت عند كنتاكي وضربتلك هذيك الوجبة الي يحبها قلبك … يا جماعة لابد من التغير والتنويع والتبديع هذا أكل مو لعبه ولا المكرونه لاصقه مثل العجين ليش علشان ما يحطوا شويت زيت تفككها والله عجيب .
والى هنا نهاية الجزء الثاني وان شاء الله في الجزء الثالث والأخير واشكركم على الاستجابه المميزة والله معاكم
