الســــلام عليكم و رحمة الله و بركاته
اولااااااااا احب اقول كل عااام و انتو بخير …
بعد ما تقرا السالفه هذي راح تستنتج انه فيه غلط صاير لكن الي انا للان ما قدرت اعرفه هل هو غلطتي ام غلطه الجامعه !؟ و الي مطلوب من كل شخص يقرا (( فضلا لا امرا )) يعطيني رايه مع انه ما راح يغير في الموضوع شي و لكن لمجرد ايضاح ماتم نسيانه…
نبدا من اول و انا انصح انه كل واحد يجيب له كوب شاي و لا قهوه و يقرا على رواقه .,.,.,.
بدايه البدايه كانت السنه الماضيه حيث قمت بالتسجيل في الجامعه على دفعi التوكس و بعد ما درست فيها لمده اسبوعين كلموني شركه ارامكو لاني كنت على الوايتق و قالولي ولكم و انا رحت لهم بحكم انهم يعطوني مرتب احسن << شوف الفلوس وش تسوي
ولكن كان اتفاقي معاهم انه يتم ارسالي للدراسه في جامعه البترول بحكم انها كانت رغبتي الاساسيه و انه ما فيه اي تعارض بين رغبتي و هدف ارامكو ((استثمار في الطالب حتى يصير مهندس و يرجع لهم)) فوافقو و اكدو لي انه شي بسيط و انهم يرسلون اكثر من طالب للبترول سنويااااا
الجزء الثاني - روح عب الكوب و ارجع - بعد ما خلصنا الدراسه و نجحنا ارامكو غيرت رايها و قالو تمشي على امريكا و حصل بيننا خلاف و في الاخير قررو انه انا مجرد شخص زياده عندهم و تم الطرد … اخذت اوراقي و انا واثق انه الجامعه بيقبلوني بإذن الله بحكم معدل ارامكو 2.5 و شهاده التوفل 550 و غيرها من الشهادات … كلمت عماده القبول و التسحيل و سألتهم عن المتطلبات و قالو لي معدل 2.5 و تعبي طلب تحويل … و جيتهم طيرااااان و كلمت الفورم و خلصت كل شي على منتصف الاجازه الصيفية تقريبا…
الجزء الثااالث … خلصت الاجازه و انا كل يوم او يومين اما اروح لعماده على شان استفسر او ادق عليهم تلفون و نشوف وش صار علما انهم عطوني موقع نتائج التحويل بس لزياده حرصيا و حبا لاظهار اني شخص (( ناويها جـــد و معزم )) … طبعا من هذاك الوقت الى الساعه العاشره صباحا من ليله 8 سبتمبر (( ايه يعني امس )) و انا في انتظار الرد و فجأه تذكر الشخص الي في العماده انه الاسم هذا مر عليه من قبل و قالي ايه ترا تم قبولك بس تعال و جيب الشهاده الاصليه (( مازال الموقع مكتوب فيه - موضوعك مازال قيد الدراسه )) و لا احد يقول لي يمكن يبغالك تسوي تحديث لاني سويت مليون مره و استخدمت اكثر من جهاز … الحاصل رحت لهم و قالي على البركه قبلناك على السنه التحضيريه (( الـــتـــحـــضـــيريـــة)) ياليت تركزون فيها هذي … قلت له شهاده ارامكو توازي الاوريا و قالي ايه بس في بعض الاحيان قلت وش هي بعض الاحيان هذي قال لما يكون المعدل 2.5 يعني نفس الي انا جايبه !!!! بس بعد اخذ و عطا و طلبات قالي بالحرف الواحد (( هذا الي موجود و اذا ما تبغى بكيفك )) يعني انا جاي بقاله و لا رايح اتسوق على شان تقولي هذا الي موجود !!!!
الرابع و الاخير- ان شاء الله- كان فيه واحد في الانتظار في المكتب و قالي رح للعميد و شرح لي انه شخص طيب و راح يتفهم … و انا رحت على شان اقابل العميد و كلي امل ان يفهم الموضوع و يساعدني بس للاسف حاولت اكلمه بكل هداوه و اترجاه انه يدخلني فرشمان والحق اخوياي الي جايبين نفس شهادتي بس الفرق انهم مازالو في ارامكو و انا لا!!!! بس في الاخير اخذ اوراقه و طلع من المكتب بدون اي كلام يعني بكل بساطه طردني بس بطريقه مبتكره ومهما كلمته مازال يتجاهلني …
هذي هي القصه و الفكره فيها انهم اخذو شهاده ارامكو الي اخذت فيها سنه و انا اجتهد و احاول ارفع درجاتي قدر المستطاع … لكن في الاخير طلعت من ارامكو لاني بكل حماقه فضلت البترول على جامعات امريكا و بريطانيا … فانتو كطلاب و كمسئولين -يمكن- علموني هل استاهل الي حصل لي بس لمجرد اني بغيت ارجع للجامعه الي تمنيت ادخلها من ايام التخرج و هل استحق الرد العجيب و الغريب من جهتهم
على العموم اعتذر على الاطاله و ادري كل واحد الحين عينه كنها اشاره قف الي عند زاويه بيتنا بس استحملوووونا و بالتوفيق لكل الطلاب
انا اقول كان المفروض عليك تروح امريكا … يعني ما دمت درس بارامكو و هم قلولك علي امريكا قول ان شاء الله
بعدين كيف طردوك من ارامكو … اكيد انت اللي طلعت لان خبري انهم ما يطردون … يخيروك وانت اللي تختار.
انا ما ابغا احطمك لكن ما في شي في جامعة البترول انك جاي من ارامكو أو غيرها كجامعة امريكية و تدخل فرشمن…الدنيا قانون … علي الاقل دخلت الاوريا و اخذت برموشن و مشيت ما اعتقد بمانعوا-لو انا منك سويت كذا-… وانا استغرب اعظم كيف اصلا اعيد قبولك …هو مافي نظام كذا حسب علمي …
شوف انا الي اعرفه انه يكون فيه مقارنه مع مواد البترول مع مواد الجامعات الثانيه…اما انك نجحت من الاوريا من البترول فهذا الشي مررره غريب انو ما انقبلت فريش…انا معاك بس في الكلام اللي كتبته
ماتستاهل اللي حصلك، اتفاقك كان من البداية مع أرامكو إنك بعد ماتخلص السنة التحضيرية تكمل في البترول وبعدين أرامكو أخلفت الاتفاق معاك.
لو أنا محلك، ببدأ من البداية والدنيا يبغالها صبر، وبعدين الدروس بتكون سهلة بالنسبة لك خاصة إنك أخذتها في أرامكو.
كان لي زميل حالته تشبه حالتك، الحاصل إنه دخل البترول وبدأ من 002 لأنه أخذ برموشن في الأنجليزي 001. أما في الماث فماأذكر وضعه بالضبط.
وبالتوفيـــــق…
اخوي 242424 لو كان عندي شك ولو واحد في الميه انه راح يكون رد الجامعه كذا كان سويت الي يبغون ارامكو حتى لو على المريخ اما بالنسبه ((ما في شي في جامعة البترول انك جاي من ارامكو أو غيرها )) فخلينا ننسا اني كنت طالب ارامكو و نقول اني طالب في كليه المجتمع ( كورساتنا نفس اذا ما كانت اقوى من كورسات المجتمع و هذا شي معروف )) طيب جيت بشهاده المجتمع و قدمت تحويل هل تتوقع ردهم بيكون نفس الرد ؟؟ المعروف انهم يقبلون طالب المجتمع اذا كان جايب C اضن في الماث و الانقلش طيب انا جايب اكثر من C او حتى C+ … اتمنى انك فهمت قصدي وهو انه الطالب المحول ما يهم من فين جاي طالما انه عدا كورسات التحضيريه بالمعدل المطلوب … في انتظار ردك يالغالي
اخوي Al Otaiby مشكور على مرورك و النصيحه و للمعلوميه انا قدمت الان على ابتعاث الوزاره يعني في الاخير راح نطلع و ندرس برا و السبب !!؟؟!! مادري سبب مين بس الي صار صار و نشوف وش بيصير بعده
---------------------------------------------------
اخوي koke انا كل الي بغيته هو المقارنه هذي الي للاسف ما فكرو حتى فيها و قررو ضرب شهاده ارامكو بعرض الحايـــط شاكر لك مرورك و الرد يالغالي
---------------------------------------------------
اخوي الاسير للاسف اختبار البروموشن كان الساعه 6 من نفس اليوم الي انقبلت فيه … يعني ما ادري نحس حظ و لا مجرد صدفه
في مثل يقول “اللي يبغى الدحة ما يقول أحا”
المهم
هذا شيء طبيعي جداً، يعني انت مو اول و لا اخر واحد تسير فيه هدي الحركة. و هدا كله بسبب الأنظمة المتحجرة، أنا عندك مثلاً جيت من جامعة الملك عبدالعزيز بعد ما خلصت سنة كاملة، بما فيها مواد الفريشمان و درست الأوريا. و أزيدك من الشعر بيت، واحد جا من الجامعة الأمريكية في بيروت و نفس الحركة بس انه كان ياخد ماث 201 في الجبل و بعدها عنده كلاس 002 في الأوريا، فيعني لا تشيل على خاطرك كثير.
معك شهادة ارامكو او لا!!