بسم الله الرحمن الرحيم
السلام عليكم ورحمة الله وبركاته… أما بعد
الجميع من الطلاب لا ينكر جهود الباصات ونقلهم للطلاب من العمائر والمواقف الجديدة الى مبنى 5وكذلك حركة الباصات من مبنى 5 الى المواقف واخرى العمائر
ولن ننسى تعبهم من أجل راحة الطلاب ي ايصالهم لمبنى 5 والعودة للعمائر والمواقف
ولكن مما واجهته في الاونة الاخير خلال حركة الباصات بعض الامور في وقت الذروة(( من 7 الى 8 ومن 11:50 الى 12:10)) هي الاتي:
1- يوم الاثنين كنت انتظر الباصات من العمائر من عند عمارة 23 الساعة 7:30
وانتظرت ثلث ساعة ولا جا أي باص الى العمائر
والكل ينتظر ويزداد عدد الطلاب ازديادا ملحوظا مع وقت الدوام
فقررت انا اني ادقها كعابي لمبنى 6
وانا رايح للجبل من جهة عمارة 816
الا اشاهد ثلاث باصات جاية مع بعض
ويوم اشرت لهم ابيهم يوقفون
ما احد عطاني وجه(( ما عليه تصرفهم سليم لان نقطة التجمع 23 وحواليها ))
فقلت خلني اكمل طريقي ابرك لي
عالعموم وصت الكلاس عند رنة ساعة الجامعة يعني 8:00 صباحا بتوقيت السعودية
المهم
انا دام اني في رمضان خلني اسامحهم واحتسب الاجر
2- يوم الاربعاء وتحديدا بعد الساعة 11:50 وقت الذروة
رايت اربع باصات
واحدة للعمائر وتحمل رقم 180
وثلاث منهم رايحه للمواقف ومن ضمنهم السواق اللي شنبه وصل لدقنه 181 والثاني الملتزم الثالث الهندي اللي عنده رقم 12
الزبدة في الموضوع
ان باص رقم 180 توجه للعمائر ولم يعد
والثلاث باصات المتوجهة للمواقف راحوا ولا عود منهم الا الهندي صاحب الباص رقم 12
المهم الهندي جا وشال طلاب من جديد للمواقف
وتقريبا 40 طالب يبون يروحون للعمائر ومتلطعين في عز القايلة(( بس ما قصروا حطوا مظلات))
علي بابا(( اللي هو انا)) وال40 طالب ينتظرون باص يجيهم ولا جاهم أحد
الا الهندي نفسه يعود لنا
الشباب فرحوا
وقالوا خلاص فرجت
الهندي يبي يتكسب اجر منا وحنا صايمين
الا ويصرفهم تصريفة حمير
ويقولهم
(بابا ان بس يودي باركينغ مافيه يودي بيت انت)
والشباب متطلعين ومعصبين عليه ليش ما خذهم معنا
المهم كلمناه وقلن له دق على اي واحد يوصل للعمائر وقله يجينا
قام يهذر بالهندي ولا احد فهم له ومشى
يوم جات الساعة 12:17 بتوقيت السعودية
جانا باص 180(( والكل يعرفه انه ما يشيل ذاك العدد))
فمالقيت لي رجل في ذاك الباص وقررت اني اطلع لمبنى 4 وانزل من الدرج الين ما اوصل عمارتي
ولله الحمد والمنة وصلت عمارتي في تمام الساعة 12:25 بتوقيت السعودية
وانا شايل على قسم الحركة وقاعد ادعي عليه في ذاك الوقت من دعواي الشيبان والشيبات
هذي السالفة وما فيها
طيب انا عندي اقتراح
ليه مايكون كل باص له فترة معينة يلتزم فيها عشان يشيل الطلاب من والى العمائر(( واستشهد بكلامي بسالفة رقم واحد))
وكذلك يطبق الكلام في السالفة رقم 2
لان اغلب الطلاب يكون عندهم بريك في الساعة 12 ما عدا اللي عندهم لاب في فترة الظهيرة
والباصات اذا كان واحد من العمائر مو موجود
وكان في نفس الوقت باص يودي للمواقف وفاضي ما فيه احد
ليه ما يتصدق علينا ويودينا<<<< ترى ريحة الصنان فاقعة و الجو ما يسر ومحمل بالتربة
واسمحوا لي يا شباب على كتابة الموضوع
تراني كتبته على عجاله
والكثير من اصحابي ينتظر رؤية هذا الموضوع في منتدى الجامعة
عل وعسى يوجد حل يفكنا من هذي المشكلة
واترك لكم حرية الراي والحوار
