يالله يحيي كل من بيمر بموضوعي وشلونكم ياعيال عساكم ماشين في الدراسة !؟ ماحد وده يدردب ( هع ) يا أخوان كان يا ماكان في سالف العصر والاوان كان في شخص يطلق عليه " هجراوي " دخل الجامعة وكان موب متأسس صح في الثانوية وعدى الاوريا لكنه ما طلع بالفائدة المرجوة اللي كان من أجلها انه يدرس عشانها صار أوريا جبل ودق بصدره ونفخ قدام جماعته ونزل الثلاثي المرح ( ماث + كيم + فيز ) 101 واسلامية ! الرجال هذا ما عنده خبرة في طريقة المذاكرة وكانوا بعض الدكاترة سيئين في الشرح من البداية ( زي ايساب ) وصادف ثاني اسبوع من الدراسة رمضان واستمرت 3 اسابيع فكان الحال يشكو وقتها ! يعني 4 أسابيع دراسية راحت بدون ما نستغلها او نفهم بالاصح شيء منها !! الشاهد يا أخوان اني اعتمدت اني اذاكر من نوت " ملخص " وفكرت هذي سياسة الجامعة ! لاني في الاوريا كنت اذاكر من النوت المدرس وجبت درجة ما حلمت فيها في حياتي وخصوصا في الماث ! عموما رحت الجمعية واشتريت كذا نوتات حق الماث والكمستري والفزكس ! طبعا انا ما بعد اطيح في التكنولوجيا ( سلايدات وغيرها !!! ) فصرت اذاكر من هالنوتات فللاسف اني ما ني فاهم الدروس مع المدرس اصلا فبكيف تبيني اذاكر من جهدي وتعبي ومن نوت لا يسمن ولا يغني من الجوع!!؟؟ المهم صرت اتردد بين هالنوتات والكتاب وكان على وقتي الكتاب طوييييييييييييييييييييييييييييييييييييييييييييييييييييييييييييييييييييييييييييييييل بالموت تقراه هذا غير الترجمة اللي يبي لك تترجمها ( لاني ماعندي خلفية لغة انجليزية في الاوريا تخبرون مجلات ميكي !! ) اللي يشوف الكتاب يقول كنها تحليل لمباراة الهلال والنصر والي كاتبها صالح الحمادي هع ! بعيدا عن الطرفة خويكم راح فيها زي ما تقولون وما صرت أعرف اذاكر من وين ! بس الحمدلله اجتهدت من نفسي وتعلمت لي كذا معلومة ودخلت في ميجر 1 وجبت العيد في 2 الفيز والكيم فقلت لازم ارتب الاوضاع واعيد تصحيح بعض الثغرات لاني محتاج مدرب برازيلي بس الحالة المادية ما تسمح فاستعنت بمدرب وطني لكنه رفض ويقول ما يصلح لي هالعرض !! فقعدت بنفسي أذاكر وصرت اذاكر من الكتاب !! صدق ان الدرس الواحد اللي ياخذه ياخذ تقريبا 3الى 5 صفحات يوميا يعني يبيلك من ساعتين الى 4 ساعات لليكم أو الفزكس!! فكان وقتي يروح في ذي الحالة فصرت اخلي يوم فزكس ويوم كمستري والماث متى استحسن الوضع اشتغلنا فيها كورقة رابحة واستعنا بها في المذاكرة ! اما الاسلامي فهذي ما فكيت كتابها الا مرتين الفاينل وميجر 2 !! والحمدلله جبنا فيها قريد كويس !!! نرجع لموضوعنا ! فصرت احتاج فوكاب وتمرس في اللغة ومخ صافي حتى اذاكر من الكتاب واستنبط كذا معلومة من جهدي فكنت ابذل كامل طاقتي فيها عشان اقرأ من الكتاب !! لان مافي بديل ! نوت مكي كان جيد لكنه غير مرتب والخط غير واضح ! والكمستري سلايدات وانا على وقتها ما كان عندي كومبيوتر ( لسا ما يعرف التكنولوجيا !! ) فالحمدلله مشيناها في ميجر 2 وتحسن الوضع في الفزكس والكمستري , اما الماث فيا قلب لا تحزن ! عموما قبل نهاية الترم صرت استخدم كومبيوتر روميتي عشان ادخل النت وغيره فكان هو ينام وأنا اكون صاحي الى اليوم الثاني وهكذا ! كل واحد متعفس نومه ! المهم اخر التشباتر حق الفزكس ما اشتهيت اذاكر من الكتاب !! ( لاني جيت من اجازة عيد الاضحى ! ولاني حول الدفرة ! ) بينما الكمستري رضيت بالوضع لانها مادة تبع التخصص فقلت لازم اذاكرها بيومها ! فطاح في يدي وانا اتصفح النت سلايدات فزكس حقت الدكتور الكبير عبدالعزيز الجلال فقلت جيت وجابك الله وينك عني من زمان ! وسبحان الله كنت اذاكر تشابتر كامل خلال 4 ساعات تقريبا !! شفتوا كيف ؟ ! واول كنت اذاكر درس واحد من الكتاب ياخذ مني 2الى 4 ساعات يوميا !! عالعموم شديت حيلي و ذاكرت منها وحليت اولد اكسامز اللي على كل تشابتر وطلعت بقريد كويس في الفاينل ! والكمستري والماث ربك يستر !!
^^^^^^^^^^^ اللي فوق هذا ماعليكم منه هذي قصة حياتي في الفريشمان والاوريا :
=== عموما انتهى الترم وطلعت بمعدل عكس ما كنت اتوقعه بكثير ! وتحطمت بسبته ( وقلت ليه انا اللي ذاكرت وتعبت وشقيت في الاخير اطلع بهذا المعدل ؟؟!! ) جلست جلسة مع نفسي وصححت الأوضاع واتعظت من هالموقف وقلت لازم اصحح اوضاعي وشريت لابتوب حق الترم الثاني فعدلت الاوضاع في الترم الثاني وهذني راح أعطيكم النصائح والخبرة اللي عملتها في ذلك الترم ! وقمت بالنصائح التالية :
بالنسبة لمادة الفزكس : أول حاجة افهم مع مدرسكم ! لان اذا فهمت راح يطيح عنك نصف الجهد حق المذاكرة في الغرفة ! وبكذا راح تكسب وقت ثمين راح تستتغله في أشياء ثانية انت اعلم بها ! وحتى لو مافهمت ( مثلي !! ) روح البيت وافتح الكومبيوتر ونزل سلايدات الجلال من موقعه ! وافتح السلايد وخل جنبك الكافي او الشاهي عشان تصحصح اكثر لان هذي مواد يبيلها فهم اكثر من الحفظ ! اقرأها سلايد سلايد وبتعمق ! ( يعني مو كل شوي تدق التالي أو نيكست وتروح للنقطة اللي بعدها ! لأ , لا تعدي النقطة الا اذا فهمتها مزبووووووط ) للمعلومية ترى سلايداته هي شاملة للكتاب بل الكتاب نفسه ! لكنها باسلوب مختصر وسلس وسهل الفهم على الطلاب ويختصر عليهم الوقت !والامثلة اللي تقعد تحفر فيها في الكتاب راح تشوفها بالسلايدات باسلوب مبسط وشيق جدا جدا !! لا تنسى تطبع الفورمولا شيت !! عالعموم انت لا ذاكرت درس معين من السلايد ! روح فك اسئلة الريستيشن حقته !! لانها اولد اكسامز عن كل تشابتر ولا تقدر تفهم الفزكس وتبدع في المياجر الا اذا حليت اولد اكسامز او براكتيس بروبلمز ! خلاص انت حليت اسئلة الجلال ( الاولد اكسامز ) حقت ذاك الدرس ! انتظر الين ما ينتهي بك التشابتر اخر الاسبوع ! روح ذاكر السلايدات على السريع وسجل جميع القوانين الموجودة في السلايدات في الفورمولا شيت ( الا اذا كانت موجودة من الاساس فمايحتاج تنقلها ! ) , الحين روح احفظ القوانين المتعلقة بهذا التشابتر واللي مسجلها في الفورمولا شيت ! وابدأّ حل اسئلة نقفي على كل تشابتر ( يفضل تطبعها من اللابات ) وتحل اول صفحة فيها ويكفي لان اسئلة نقفي شاملة لكل الاسئلة السابق ذكرها في المياجر القديمة فتشوف يعني نصهم مكررين بعد الصفحة الاولى واعتبر هذا البراكتيس هومووورك لك عشان تكتشف قدراتك واذا طلع الجواب النهائي نفس اللي موجود بالصفحة اذا حلك سليم لكن اذا فيه خطا راجع حلك وتأكد واذا مررررة ما عرفت الحل روح عند أي مدرس عنده اوفيس اورز خليه يشرح لك ذا السؤال بالنسبة لهومووركات الفزكس ( اللي موجودة باخر كل تشابتر ويطالبون بعض المدرسين بتسليمها ) ما انصحك تحلها لانها مضيعة وقت !! صدقني مضيعة وقت وتخلي الفاهم مو فاهم كيف ما تجي !! خلاص قرب الميجر حاول تراجع السلايدات على السريييع ومن ثم تسجل القوانين الناقصة اللي مو موجودة في الفورمولا شيت ! واحفظها بعد ما تخلص ! الحين تصفي ذهنك وتستعد وتروق وتبدأ تختبر قدراتك وتحل لك اخر ميجرين على الاقل ( 072 و 071 ) وتخصص وقت ( ساعتين ) لكل اختبار وحل اللي تقدر عليه وان شاء الله مو اقل من 15 من 20 راح تجيبها في الاولد اكسامز ! واذا سؤال دقر معك روح اسال خويك لانه الاقرب وتناقش معه او اسأل مدرسكم في الريستيشن هم دايم يخلون محاضرة او اكثر قبل أي ميجر يحلون اسئلة مياجر قديمة ونفس الوقت مراجعة واللي عنده استفسار وان شاء الله تلقى الحل في يوم الميجر حاول تريح بدنك وجسمك وترخي اعصابك وتداوم بهدووؤ وببرودة واول ما ينتهي بك الدوام تغدى وخذ لك قيلولة ساعتين على الاقل قبل الاختبار , واذا جلست روح خذ لك كافي وفطيرة لوزين غذ جسمك وعقلك وادخل الاختبار وانت مروق وبدون شد أعصاب !! والحين الباقي عليكم سووا اللي تقدرون عليه
الكمستري : طريقة مذاكرة 101 زي 102 لكن 101 بدايته و تشابتر 9 و 10 فيهم حفظ كثيييير والباقي نفس الطريقة استخدمها بسم الله المدرس وخلصنا منه جاء دورك عشان تذاكر . اذا كنت 101 ذاكر من سلايدات ايساب واذا 102 عندك سلايدات مرسي وكلاهما يفوون بالغرض ! حلو الان يبيلك تذاكر الدرس اللي خذته من السلايدات وترجع للكتاب وتحل الاكساملز ( الامثلة ) اللي متعلقة بهذا الدرس ! بعد ما تفهم الامثلة تشوف فيه خانة صغيرة تحت في اسفل المثال يقول لك : see exercises X, Y & Z روح عند هذي التمارين اللي يقول لك عليها لانها متعلقة بالمثال نفسه اللي حليته قبل اشوي ! حله واجتهد فيه واذا كان الحل للسؤال الفردي فيتوفر في الجمعية المانيوال سوليوشن حقه اشتره ولا تفوته ! قارن حلك بالحل اللي موجود في السليوشن اذا اوكيه حط علامة صح على السؤال يعني السؤال فاهمه تمام 100 % , اما اذا كان بوه ( يقلد اهل القصيم ! ) بلى فقارن الخطوات وصححها واعرف ويش طحت وحل اكثر من سؤال على نفس هذي الشاكلة عشان تتمرس الفكرة وتكون قادر على فهم الاسئلة اللي على هذا الشكل واستمر على هذي الطريقة واذا جاك اسبوع فيه كوز فروح راجع التشابتر كامل من السلايد وحل فقط الامثلة ( لانك متمرمس اكثر سابقا من خلال حلك لأسئلة الكتاب فمايحتاج تعيد حلهم من جديد ! ) وذاكر أي شيء فيه حفظ او ثوابت قبل الميجر سو الطريقة اللي سويتها عشان الكوز بعدين روح افتح لك ميجرين وعود نفسك عليهم ووقت المنبه على ساعة وثلث كوقت نهائي للميجر اللي تحله استمر على هذي الحالة الى الفاينل وبعدها راجع جميع الدروس مثل ماتراجع للمياجر والكوزات واهم شيء يا أخوان في الكمستري الامثلة اذا مافهمتها فما كانك فهمت الدرس بتاتا ! لان الدرس عبارة عن نظري وتطبيقي ! النظري هو الحشو والمعلومات اللي استقيتها ! والتطبيقي هي حلك للامثلة وفهمك لها وحل التمارين اللي بنهاية التشابتر !
نجي الماث : ما أنصحكم بنوت ! لان نص النوتات اللي موجودة او اللي يكتب مع مدرسه هو نفسه أمثلة الكتاب ! يعني كوبي بيست ! فاللي ابيه منكم انكم تركزون مع المدرس قدر الاستطاعة ! ولا تكتبون معه نوت الا اذا حسيت ان السؤال فيه فكرة او توضيح او مسألة غريبة عليك وانك تبي تتمكن منها ! فهنا اكتبها وفالك التوفيق نجي للمذاكرة انت سواءا فاهم مع مدرسك ولا لا, فك الكتاب واقراء الدرس اللي خذته ( وترى القراءة بسيطة لان الماتريال سهل وغير كذا نص الكتاب رسومات وفيقرز !! ) وابدأ بقراءة الدرس ثم اذا فيه بروف ( اثبات ) اقرأه لانه مفيد ويرسخ الفكرة في الذهن ! ويعلمك كيف جاك هالقانون او النظرية ! بعدها روح للنظريات او القواعد او الملخص ( اللي يجيك غالبا في مستطيل احمر او مظلل بلون معين ) عموما هذي زبدة الدرس ولازم تفهمها وتحفظها مزبووووط الحين روح حل الامثلة على الركادة ! حبة حبة الين ما تلم بالدرس كله اذا خلصت من درس اليوم لازم تختبر مهاراتك وتستكشف نفسك هل انت فهمت الدرس صحيح أو لأ ؟ عموما روح حل اسئلة الهوموورك المتعلقة بالدرس اللي ذاكرته ( سؤالين الى 4 اسئلة تقريبا ) ما تاخذ منك من نص ساعة الى ساعة هنا تشوف حلك وتقارنه بالمانيوال سوليوشن اذا نفس الخطوات والحل فاجابتك سليمة 100 % اما اذا لا فحاول تستكشف اخطائك وتعرف وشو اللي فرق عن حلك في المانيوال !وتبدا من هنا تفكر الين ما تعرف ايش اللي خلاك تخطئ عشان ما تعود له مرة ثانية استمر على نفس هالمنوال الى ان يجي الاختبار . اغلب الشباب يحلون اولد اكسامز على بالهم ان الاختبار راح يجي منه ! انا اريح دماغك واقول لك الاختبار يجي بنسبة 90 % من أسئلة الكتاب ( الهوموورك والريستيشن واللي حواليها ! ) فاللي عليك انك تتدرب على الدروس اللي تكون فيها افكار اشتقاق وتكامل وحجوم ومتسلسلات فحاول تحل اكبر قدر ممكن من الاسئلة اللي تكون فيها افكار واجد او جديدة عليك ! ( يعني فوق اسئلة الهوموورك والريستيشن !!!! ) ابيك تشغل مخك وتنقي بين كل درس وش اكثر الاسئلة اللي تحس تتردد فيهم الافكار او لها فكرة فريدة او شكلها جديد عليك فحله ! واذا ما عرفت تحله المانيوال سوليوشن قدام عينك انظر للحل على السريع وروح للأسئلة والدروس اللي بعده ! الحين اذا خلصت من كل شيء حاول تتحدى عامل الزمن " الوقت " غالبا في اختبارات الماث عامل الوقت يكون هو سبب الحصول درجة متدنية من الاختبار او يجعلك مستعجل او اكثر ارتباكا اثناء الاختبار فهنا اغلب الشباب اما ينتهي الوقت وهو ماوصل للأسئلة الاخيرة او انه وصل للاسئلة الاخيرة لكنه باستعجال فاللي ابيه منكم هو انكم كيف تحلون مسألة معينة في الكتاب في اسرع وقت ممكن !! يعني مسألة حلها ما ياخذ 3 دقائق لا تضيع فيها 5 دقائق وأكثر !! حاول تكون متعود ومتجهز لهذي الأسئلة ! عالعموم طريقة استعدادكم وتهيئة الجو النفسي وانبساط الاعصاب قلتها في كلامي عن مادة الفزكس اطلع فوق لو سمحت
بعد كل هذا : أي ميجر تطلع منه وتشوف اسألتك فيها غلط أو حلك فيه بلا حاول تتأكد من حلها مرة ثانية او اسأل مدرسكم عنها وهو ان شاء الله يجاوبك !! بس انتبه تغلط في فقرة ولا تصحح وضعك فيها !! لازم تتعلم من أخطائك ( try to learn from your errors otherwise you will not pass successfully !! ) لازم تصحح وضعك فيها وتكون قادر على حلها اذا صادفتك نفس هذي الفقرة فيما بعد !!
الحين نروح للفورتران 77 – حاسب 101 بسم الله اولا انا كنت في الكلاس كله نوووم ( تخبرون السلايدات وماتسوي !!! ) واطلع من الكلاس ولا ادري عن ويش هم يتكلمون بس اهم شيء التحضير هع ! المهم اطلع من الكلاس واروح افك الكتاب واذاكر كل درس بيومه !! والدرس في بدايته يجيك فيه شرح كلام طويل ومن ثم امثلة بسيطة وبعدين امثلة كاملة ! افهم الدرس اولا ثم هذي الامثلة البسيطة ثمن تعمق في الامثلة الكاملة !! اذا جيت تحل الامثلة لا تطالع للحل !!!!روح افتح جهازك واشتغل على البرنامج وسو البرنامج على جهازك ( يعني باستخدام الفورتران نفسه !!! ) وحاول تحل وتزبط وتبرمج الين يقول لك نو ايرورز ! بعدها سوي كومبايل بعدين اكزكيوت عشان تشغل البرنامج اللي سويته وفي الانبوت العب على كيفك وسو اللي بالك ! الحين اذا ضبط البرنامج روح قارنه بالحل اللي بالكتاب وشوف هل هو نفس حلك او فيه فكرة ناقصة/ زائدة عن اللي كتبته حاول تتعلمها ومن ثم تنقل للمثال اللي بعده ! بعد ما يخلص بك التشابتر روح حل اسئلة الكتاب ( التمارين اللي تجيك اخر كل تشابتر ) وما يحتاج تحل على الكومبيوتر لانك فاهم من الاساس من خلال الامثلة والدروس اللي ذاكرتها قبل والتطبيقات اللي باللاب بس اهم شيء طلع الاوتبوت صحيح وحل كل الاسئلة حتى الكلامية ! كلها تقريبا تاخذ لك 4 ساعات خليها في الويك اند ! شالمانع !؟؟؟ والسؤال اللي ماتعرفه روح طبق على الكمبيوتر فيه وجرب تضيف وتحذف عبارات وخانات الين ما تفهم السؤال ! واذا ما فهمته الله يعينك روح عند مدرسكم في الاوفيس اور او مرة وحدة خليه في اللاب عند المدرس اللي يدرسكم الاب ! وقبل المياجر والفاينالات حل الهومووركات اللي تلقاها على الوب سيتي ومن ثم حل لك الميجرين ايضا اللي يكونون في الوب سي تي ! واذا ما عرفت حل هالمياجر ( اصلا هي محلولة !! ) مدرسكم راح يحلها في الكلاس( في محاضرة يسموها بروبلمز سيسون ( يعني مرحلة حل المسائل ) ) وانت سجل الحل عندك بعدها قبل الميجر ذاكر امثلة الكتاب على السريع وان مداك تحل اولد اكسامز فبورك فيك وان شاء الله تجي الاختبارات وانت واثق من حلك ومتمكن منها ! للعلم اختبارات الحاسب تكون ريتين ( كتابي ) فيعني الاخطاء ما راح تكون عويصة دائما فهم يحسبون على الفقرات ! بس انتبهوا من الاسئلة اللي تقولك فايند ذا اوتبوت !! خلوكم حريصين وتأكدوا من الاشارات والارقام ولا تضيعون ! ترى فقرة وحدة تضيع اعرف ان 5 % من الاختبار راح تروح باردة مبردة !!
======== وفي الختام ان شاء الله مع تطبيق هذي النصائح ولو جزء يسير منها انكم تطلعون فاهمين لهذي الكورسات وبدرجات عالية وفالكم الاونر ان شاء الله
======== نصيحة أخيرة ومهمة !! لا تهمش الكتاب لازم تعود نفسك على القراءة من الان ! لانك راح تحتاج الكتاب كمرجع رئيسي في المذاكرة لمواد التخصص !! لكن لا مانع من ايجاد طريق بديلة توفر عليك الوقت والجهد وتغنيك عالكتاب !! وهنا مربط الفرس ! بس لا تنسى انك ترجع لأمثلة الكتاب تراها مهمة جدا جدا جدا
======== للعلم انا سويت هالطريقة وطبقتها الترم الثاني وطلعت أعلى بقريد و قريدين بين مواد 101 و 102 بفضل الله ثم بجهدي وبتعبي ودعاء الوالدين !! واللي ما نفعت معه هذي النصائح اللي قلتها الله يعينه وماله الا الكتاب !! أو في أحد عنده نصائح اخرى بينصح الفريشمان فليضعها هنا والله يجزاه خير
حرر في 20 اوكتوبر /2008 بواسطة واصل طالب سفومور دفعة 26 !
والله أنك رائع يا واصل … اجمل الكلام والنصائح التي تأتي عن تجربة …
كلامك صحيح وجميل وما جاء من فراغ …
أنا مأخر الكمستري وما أخذتها الا هالترم , وأبطبق كلامك ونصائحك فيها ان شاء الله …
وبدينا نحمل سلايدات ايساب ولو اني ما اداني السلايدات …
واصل والله لو كل الناس يخدمون غيرهم زيك كان جامعتنا فووووووووووووووووووووووق
ما شاء الله عليك , عيني عليك باردة …
الله يوفقك ويوفقنا وياك … واذا حسيت ان فيني شدة بأكتب نصائح بعدين …
الله يعافيكم جميعا ومشكورين جدا جدا على الثناء وشكر خاص للمشرف أبو عزووز اللي ثبت المواضيع بأربع مسامير
بالنسبة لتطلي : أنا في الاوريا كنت اسجل نوت مع مدرسنا واذاكر منه بس للاسف النوت طلع موب شيء ونجحت فيه على الحفة فما أقدر افيدك فيها
بالنسبة للي مستقبله انتهى : انا ماعندي خبرة في اللابات لكن اتوقع تلقاها موجودة في الجمعية ! بس مافيه فائدة انك تشوف الريبورتات قبل اللاب لان التجربة راح يوريكم اياها المدرس وانتوا تطبقون وراه والخطوات نفس اللي في الكتاب اتمنى غيري يفيدك !
