السلام عليكم ورحمة الله
سؤالي للطلاب المتخرجين من الثانوي أو اللي دخلوا cpc ارامكو …
كيف يكون اختيار التخصص ؟ هل آرامكو تعطي الحرية للطالب في الإختيار ؟ هل بالمفاضلة ؟
كيف ؟؟؟؟ !!!
شكرا لكم …
نواف ,
وعليكمـ السلامـ ورحمة الله وبركاته
هلا أخوي
اللي أعرفه عن إبتعاث أرامكوا انهمـ يعطونك تخصصات معينه اللي تحتاجها الشركه
وماأعرف كثير عن أرامكوا ولكن أخواني اللي يعرفون راح يفيدونك إن شاء الله
وبالتوفيق ياربـ لنا ولكمـ …!
أشكرك أخوي على تفاعلك …
كلامك ماحد يختلف عليه … التخصصات التي تحتاجها آرامكو تقوم بطرحها … لكن …
ميولي مثلا هندسة كهربائية … ثم … ثم …
سؤالي … كيف يتم إختيار التخصص … ؟ إجباري من الشركة ؟ إختياري ؟ هل قدرتك على إختيار التخصص تكون بالمفاضلة ؟ يعني الطالب اللي درجاته زينة يقدر يختار تخصصه بأريحية ولا كيف ؟!
تحيتي لكم … نواف ,
انا احد طلاب السي بي سي المتواجدين حاليا في امريكا
الطريقة هي الاتية:
تطرح الشركة التخصصات اللي تحتاجها اداراتها
ولما يقدم الطالب يحط رغباته يعني الرغبة الاولى:هندسة كيميائية ثم بترول ثم ميكانيكية وهكذا
ثم ارامكو تعطي الرغبة الاولى لافضل طالب والرغبة الاولى لثاني افضل طالب وهكذا الى ان ياتي فرضا
عاشر افضل طالب على سبيل المثال ورغبته ميكانيكية وكل المقاعد المخصصة للميكانيكية نفذت يعطونة رغبته الثانية
واذا خلصت رغبته الثانية يعطونة الثالثة وهكذا
طبعا يمكن احد الطلاب يجي ويقول انا قبلوني في الدفعة الاولى وما عطوني التخصص اللي ابية و واحد قبل في الدفعة الثانية او الثالثة
وعطوه التخصص اللي انا ابيه طبعا الجواب على ها السؤال هو ان فيه واحد درجاته افضل منك عطوه تخصصك بالدفعة الاولى
بس هو اعتذر يعني راح البترول او الطب او سابك فعطوا التخصص لواحد بالدفعة الثانية
نصيحة: لا تفكر او تقول بنفسك بس بحط 4 او 5 رغبات عشان اجبرهم يعطوني احد ها التخصصات
ارامكو ما راح تهتم اذا خلصوا ها التخصصات راح يعطونك التخصص اللي هم يبونها
انا عن نفسي عبيت كل الرغبات وفيه ناس عبوا 4 او 5 رغبات وانتكبوا وارامكو عطتهم تخصص مب من رغباتهم
انا شخصيا عطوني رغبتي الثانية
رغبتي الاولى كانت هندسة صناعية ورغبتي الثانية محاسبة والثالثة مالية
ومن جد ما كان ودي يعطوني تخصص غير ها الثلاثة والحمد لله عطوني محاسبة
والحمد لله انا مره مرتاح بالتخصص واحس انه يناسبني
وفي الاخير شد حيلك اخوي بالثنوي والله يكتب لك اللي لك فيه خير وصالح
تحياتي
كفيت ووفيت أخوي spyman
اضفتك عندي ان ماكان عندك مانع … حاب أستفيد منك بما إنك في الـcpc لإني مازلت طالب ثانوية عامة …
شكرا لك …
طيب آرامكو على ايش تعتمد في المفاضلة … إختبارها الإنجليزي والرياضيات … ولا الثانوي والقدرات ولا كلهم ؟؟
نفرض هذه الدرجات المثالية (أقول نفرض على سبيل المثال 
):
الثانوية:99%
القدرات:95%
إختبار الرياضيات لأرامكو :: جميع الإجابات صحيحة. 100%
إختبار اللغة الإنجليزية لأرامكو :: جميعها صحيحة 100% بالإضافة إلى إنه الطالب حاصل على درجة عالية في التوفل.
وش رايكم … يرتاح بإختيار تخصصه … ؟! 
طبعا أنا أسال هل يرتاح … يعني هل أكثر المتقدمين لديهم مثل هذه الدرجات المثالية ولا قليلين بحيث إنه الواحد يكون مميز بينهم …؟!
أتمنى إنه يرتاح … 
طبعا هذه الدرجات في الأحلام الوردية التي يعيشها أي طالب في الثانوية العامة … 
شكرا لكم … نواف بن مصلح آل شيبان ,
طبعا الاخ spy-man كفى ووفى لكن انا ابغى اقلك انه لو قبلت بالدفعة الاولى واعطوك تخصص ما تبغاه فانك تستطيع تغييره لان فيه ناس ما يبغون ياخذون التخصصات هذي او غير كذا
لكن السؤال هو كيف تغير التخصص؟
طبعا اذا اعطوك التخصص راح يطلبونك توقع اوراق موافقة على التخصص والادارة
وراح يمثل عليك الموظف انه ما يقدر يغير لك التخصص ولكن هو قادر
بس انت لازم يكون عندك واسطة
او - وهذا هو الاهم - تكون نشبة من الدرجة الاولى بحيث انك تروحلهم ديم وتطالب بالتغيير - وهذا في البداية - يعني قبل الدراسة
وبالتوفيق
لكن دايم لا تتوقع ان ارامكو بيقبلونك لانه تقريبا سنويا يتقدم 6000 ويقبلون من 250 الى 350
فشد حيلك والله يعينك
أشكركم على تفاعلكم مع الموضوع …
لكن دايم لا تتوقع ان ارامكو بيقبلونك لانه تقريبا سنويا يتقدم 6000 ويقبلون من 250 الى 350
طيب أخوي … أنت قلت إنه المتقدمين كثييير 
لكن :
==========================================
نفرض هذه الدرجات المثالية (أقول نفرض على سبيل المثال ):
الثانوية:99%
القدرات:95%
إختبار الرياضيات لأرامكو :: جميع الإجابات صحيحة. 100%
إختبار اللغة الإنجليزية لأرامكو :: جميعها صحيحة 100% بالإضافة إلى إنه الطالب حاصل على درجة عالية في التوفل.
==========================================
وش رايك في هذه الدرجات … وين مركزها بين الـ6000 طالب … هل الطلاب أصحاب الدرجات المثالية
مثل اللي فوق … قليلن عند آرامكو ولا كثيرين ؟ يعني مافي أمل أختار تخصصي بالراحة …
شاكر لكم …
نواف بن مصلح ,
هلا والله اخوي نواف
العفو اخوي هاذا من واجبنا
طبعا ارامكو تركز على كل ها الاشياء نسبة الثنوية ونسبة المواد العلمية في الثنوي واختبار القدرات واختبار ارامكو في الرياضيات
والانجليزي واذا فيه واحد زي الدرجات اللي انت قلتها ان شاء الله ما يكون عنده اي مشكلة
ان شاء الله يقبل ويعطى اذا مب رغبته الاولى الرغبة الثانية الامر كله يعتمد على ادارات ارامكو كم واحد تبي من ها التخصص
يعني دفعتي كان فيه ١١٥ واحد تخصصهم هندسة بترول والدفعة اللي بعدها ( دفعة السنة هاذي ) حوالي بس ستين طالب هندسة بترول
وزاد عدد طلاب الهندسة الكيميائية والكهربائية
وفي النهاية انت شد حيلك وبالدرجات اللي انت قلتها ان شاء الله بيعطونك التخصص اللي انت تبيه او الرغبة الثانية بالكثير ان شاء الله بدون مشاكل
طبعا عدد المتفدمين على البرنامج اكثر من عشر الاف يعني فيه منافسة شديدة بس ماشاء الله الدرجات زينه ودرجة التوفل عالية ان شاء الله
ما راح يكون عنك مشكلة
وفي النهاية اذا عندك اي سؤال تقدر تسالني بالمسن او ترسلي ايميل الحين ايام اختبارات وريسيرش هنا بالجامعة بامريكا
فاعذرني اذا ما شفتني كثير بالمسن او تاخرت اشوي بالرد عليك بس اذا عندك سؤال لا تتردد انا يوم كنت مكانك كنت ادور على واحد
اساله بس مالقيت
تحياتي