شباب احد عنده معلومات عن شركة بيكر هيوز؟ ( كو أب )
كم يعطو ؟ كم ساعات العمل؟ اي معلومات عن المقابله او اي شي يتعلق بالشركه والكو أب.
لأي تخصص هالشركة ؟؟
راح يعطوك 2500 - 3000 ريال
ساعات العمل من 7 ص الى 4 ونص
انا موظف في الشركة من سنتين وخريج البترول
نصيحتي لك
اذا كنت ميكانيكل انجنير وماعندك نية تشتغل في احد هالشركات ( بيكرهيوز, هاليبورتون, شلمبرجير) لا تجي بيكر لانك راح تضيع وقتك في حاجة مراح تفيدك لا الحين ولا بعد التخرج
انا ميكانيكل وشغلي الحين لايمت بصلة للتخصص بس عاجبني الفيلد
اذا كنت بتروليوم راح تكون مررررة ممتازة بالنسبة لك
لو حبيت تعرف اكثر راح احاول اساعدك
بما أنك تشتغل في بيكر هيوز ودي أسئلك. الشغل في المكتب ولا في الفيلد؟ وإذا في الفيلد كيف نظامهم… شهر شغل و 14 يوم أجازة ولا كيف؟ وكم كان الfull package offer (اقصد الراتب كامل) مالهم أول ما تخرجت أو الحين؟
بالنسبة للكو أب
بتشتغل من 7 الى 4:30
لو وظفوك بتكون على برنامج Field Engineer Devolopment Program وهو عبارة عن تدريب مكثف على 3 مراحل
المرحلة الاولى بيرسلوك لدبي تاخذ كورس لمدة شهرين بعد كذا بترجع وتشتغل الوورك شوب فترة والكوالتي فترة ويمكن اقسام ثانية وفي اخر ثلاثة شهور تبتدي تطلع الفيلد
المرحلة الثانية راح تكون كاملة في الفيلد
المرحلة الثالثة كل الشغل في الاوفس
كل مرحلة مدتها الماكسيمم سنة والمنيمم 6 شهور يعتمد عليك انت ومجهودك
يعني بامكانك تخلص البرنامج في سنة ونص او ثلاث سنوات
اول ماتتوظف راح يكون راتبك الاساسي 7000-8000 ريال مع 25% بدل سكن و 10% بدل مواصلات
لما تشتغل في الفيلد شغلك بيكون 6 اسابيع وثلاثة اسابيع اوف (الستة الاسابيع مراح تكون كلها في الفيلد عبارة عن جوبات وكل جوب له فترة معينة يعني في بعضها يومين وبعضها اسبوع على حسب نوع الجوب ولما ترجع تجلس ستاند باي الين تطلع جوب ثاني)
في الفيلد راح تاخذ جوب بونص زيادة على راتبك 100 دولار يوميا
بعد ماتخلص كل مرحلة بتاخذ ترقية وزيادة على الراتب
وبس
اذا في اسئلة زيادة لاتتردد
^^^
جزاك الله كل خير والله
معلومات مفيدة جدا
السلام عليكم
شكرا لك أخوي abadi1234 
انا تخصصي مثلك ميكانيكل(ابلايد)سنير 
, عندي كم سؤال اذا ممكن
اول شي انت ابلايد ولا ساينس وفي اي شركة طبقت ؟ وهل في فرق او تفضيل بينهم في الشركة ؟
2-ذكرت ان شغلك لا يمت بصلة للتخصص 
, ايش الفايدة من كوني مهندس ميكانيكي, يعني الي ادرسه الحين ماله فايده 
ممكن توضح لي 
,
-وأيضا ايش تتعلم في الكورسات التدريبية-! وما هي وظيفتك الحالية ؟
معليش باتعبك شوي 
آخر سؤال, أنا احب الكرف 
-الشغل, متحمس أبي أخلص دراسة وأشتغل في الفيلد - وناوي على الشركات الي مثل بيكر هيوز وشلمبرجير وهليبرتون …
مالمطلوب مني لكي يتم قبولي في مثل هذه الشركات سواءا في التطبيق او التوظيف؟
شكراً لك على التفاعل
اتحملنا اشوي
معلومات قيمة شكرا جزيلا لك.
ولكن هل الراتب يعتمد على المعدل والتخصص صح؟ يعني لو تخرجت Electrical Engineering بمعدل أعلى من 3 يفترض آخذ 8 آلاف ولا أنا غلطان؟
أبي أسئلك عن الفيلد, لما تروح أعتقد يعطوك أيضا السكن؟ أبي أعرف السكن عبارة عن غرفة كاملة لك أو مشاركة مع أحد الزملاء؟ وأيش وسائل الترفيه الموجودة هناك يعني في تلفزيون وأنترنت وملاعب ومطاعم ولا كيف.
أيضا سؤال أخير لو سمحت، بالنسبة لل6 أشهر الي تكلمت عنها, ذكرت أن لما ما أكون في الفيلد أكون ستاند باي. طيب خلال ال6 أشهر هذي لو صادف يوم جمعة مثلا أكون خلاله ستاند باي أداوم أو يكون عطلة ويكند؟
السؤال بصيغة أخرى فترة ال6 شهور يكون فيها عطلة الويكند لو ما صادف الويكند وجودي في الفيلد أو لا؟
وبالمناسبة هي في ميزات ثانية مثل أنهم يدفعوا تذاكر السفر لي في الصيف أو 60% من الراتب مثل ما تسوي أرامكو أو يدفعوا تكاليف تعليم ابنائي مستقبلا في مدارس خاصة؟
وشكرا جزيلا لك, اجوبتك راح تكون مصيرية وتحدد هل اقدم على بيكر ولا اوفر عناء الاختبارات والمقابلات
انا ابلايد وطبقت في شركة زهير فايز
في السعودية بشكل عام مافي فرق في الوظيفة بين الابلايد والساينس الكل يشتغل نفس الشغل
ياعزيزي انت لما تكون معاك شهادة هندسة مو شرط انك تشتغل في نفس مجال تخصصك اعرف شباب تخصصهم ميكانيكل ويشتغلون مع ارامكو واغلب شغلهم كيميكال والعكس
بشهادة الهندسة انت المفروض تكون كواليفايد انك تشتغل في اي مجال وقادر انك تنجح فيه
وحتى لو اشتغلت في مجال تخصصك اعرف انك مراح تحتاج كل اللي درسته
انا اشتغل الحين فيلد انجنير وبالنسبة للكورسات فهي كلها في مجال شغلنا >> جالس ارد عليك وانا في دبي عندي كورسين ورا بعض
بالنسبة للتوظيف مطلوب منك في الانترفيو انك تبين لهم انك انسان كررررررررريييييييييف وماعندك مشكلة تشتغل اي شي في اي وقت
نهائيا مراح يسئلوك عن مواد الجامعة . يبغوا يشوفوا شخصيتك بس
اما لو اخذت الكو أب مع وحدة من هالشركات التوظيف بيكون مررررررررررررة سهل لو انت اشتغلت كويس وكنت هارد ووركر.
ولو ان شاء الله توظفت لاتتوقع انه احد راح ياخذك من يدك ويقولك تعال أعلمك راح تكون انت المسؤول عن نفسك وقد ماتشتغل قد مابتاخذ اهتمام وكورسات وفلوس
في شركات الاويل فيلد المعدل اخر همهم اللي معدله 2 واللي معدله 4 بياخذوا نفس الراتب وبعد التوظيف انت ومجهودك
بالنسبة للسكن ذكرتني اول ما اشتغلت مع هاليبورتون سألت الـ HR نفس سؤالك وقالي ايوة راح تسكن في كمباوند وغرفة لوحدك بدورة المياه الخاصة وانواع الفلة وطلع كله نصب
لما تكون في الفيلد راح تسكن في سكن الرق (بورتابل) واحيانا كثيرة دورة المياه مشتركة وفي بعض الرقوق غرفها تجيب القرف ودورة المياه فيها ودك تطلع البر انظف لك والاكل انوااااااااااع القرف اللهم لك الحمد وفي بعض الرقوق تكون غرفها نظيفة ودورة المياه خاصة ونظيفة والاكل كويس ولازم انك بتجرب الاثنين
اخر جوب طلعته كان في رق صيني جلست هناك خمسة أيام كنت عايش فيها على فطاير لوزين وشوية تشكوليت وبرينغلز 
كان الغدا عندهم بروستد ورز والعشا نفس الشي وكل يوم على هالحالة واتوقع انهم كانوا يقلوا البروستد في زيت مكينة
عجبتني وسائل الترفيه 
انسى هالسوالف في الاويل فيلد
احمد ربك اذا كان عندك ارسال جوال
الترفيه الوحيد تعبي الهارديسك افلام والا بي اس بي وعيش حياتك
لما تشتغل في الغيلد وتكون ستاندباي احيانا راح يطلبوا منك تجي تشتغل في الوورك شوب واحيانا كثيرة تكون في البيت تنتظر الاتصال عشان تطلع الفيلد
بالنسبة للميزات الثانية اللي انت ذكرتها انساها في بداية التوظيف
بس عادي جدا انك تاخذها وتاخذ اكثر منها بعد كم سنة على حسب شغلك واجتهادك
واذا في اسئلة ثانية انا جاهز
نسيت اقول لكم حاجة مهمة
الشغل في الاويل فيلد بالمررررررررررررة مو سهل فيه صعوبات كثيرة نفسيا وبدنيا وعقليا وكل شي بس اللي يصبر ويتحمل راح يلقى في الاخير نتيجة صبره واكثر من مايتوقع بكثير
معنا شباب لهم في الشركة 6 و 7 سنوات كنت اسألهم لو كلموكم ارامكوا تروحون قالوا مافي امل لأنه حتى ارامكوا مراح تعطينا الاشياء اللي احنا ناخذها من بيكر
بالنسبة للشركات الثلاث (بيكر وشلمبرجير وهاليبورتون) في الرواتب الاولى شلمبرجير بدون منافس والثانية بيكر والثالثة هاليبورتون
بس بالنسبة لاحترام ادمية الموظف واحتياجاته في المرتبة الاول بيكر وبس
في شلمبرجير انت رقم زيك زي اي تول عندهم كرررررررررررف متواصل من غير اي رحمة ولو تكون ظروفك ايش ماكانت بالنسبة لهم الشغل في المرتبة الاولى وبعد كذا تجي العائلة والحياة
في بيكر انت اسم بيحترموك ويحترموا ظروفك ( كان معنا واحد من الغربية ابوه دخل العناية المركزة واضطر انه يسافر جلس في جدة ثلاثة شهور وراتبه ماشي كأنه يشتغل ولو كان يبغى يجلس أكثر ماكان عندهم مشكلة)
اما هاليبورتون (الله لايعيد ايامها) لا احترام ولا فلوس
جزاك الله خير يا عبادي
معلومات مفيدة جدااا
ضروري يا شبــاب ,
سمر تريننق أفضل في بيكر ولا هاليبورتن …
ياخي انا مستعد ومتحمس جدا اني اطبق مع بيكر هيوز وفي الفيلد والله افضله عن الاوفس ابغى استفييييييييييييد, انا منتظر ردهم بفارغ الصبر بعد المقابله الهاتفيه حقتهم…
هل انتظر ردهم ولا وش اسوي كيف اتواصل مع المسؤول حق التدريب؟ ابي فزعتك يا abadi1234
واو أخوي أشكرك على فضح حقيقة الشركات. أنا أيضا hr هالبرتون قالي يا تشتغل في الكويت براتب 15190 ريال باكج وأروح الفيلد مشوار نص ساعة من البيت للفيلد, أو اشتغل في السعودية براتب قريب من الي قلته (ما اتذكر بالضبط) وقالي لي السكن كامباوند وكذا… زين انك نبهتني عليه ولا كان رحت لهم
صراحة ما توقعت شلمبرجير وبيكر هيوز وهالبرتون لهذي الدرجة من الانحطاط, المشكلة ما احس راتب بيكر يسوى (7000 ريال بس؟!) فباشوف الشركات الثانية (سكيكو وكذا) واشوف وين ربي كاتب.
شكرا جزيلا أخي abadi1234
الصراحة ماقصرت بالمعلومات المفيدة
اتمنى لك التوفيق في حياتك المهنية والاجتماعية
بس وش طبيعة شغل الواحد في الفيلد …وش تشتغلون بالضبط