كيف حالكم ؟! شخباركم ان شاء الله بخير ~ مدري من وين ابدأ ، لكن بصراحة أحب اشكركم جزيل الشكر على كل اللي قاعدين تسوونه ماشاء الله عليكم … ماتخلون احد وماتقصرون مع احد الله يجزاكم كل خير يا رب ، حقيقةً اعجز عن شكركم … وانتم خير قوم للمشوره باذن الله ~
انا توي تخرجت هالسنة مثلي مثلكم ، وبصراحة أنا انسان احب الكمبيوتر والحاسب والتصميم وكذا … قبل اسبوعين بالضبط !! ماكان لي اي نيّة بالطب ابدا ابدًا … وكنت اقول صعبة وطويلة و مستشفى و تعقيد … طبعًا كل شي صعب مافيه شي سهل !
لي ولد عم طيب اسنان كلمني عن الطب ونصحني فيها وكذا … والصراحة انها بدت تدخل مزاجي ، ركبت راسي بالاصح ! ومن هذاك اليوم وانا اقارن بين الاثنين وماوصلت لنتيجة الصراحة …
انا طموحي ابتعاث ارامكو او سابك باذن الواحد الاحد , لو كنت ابي حاسب بشكل عام ، سواء هندسة حاسب برمجة إلخ … و كلية طب الاسنان التابعة للشؤون الصحية بالحرس الوطني … لو كنت ابي ادرس طب !
كنت اقارن بين فترات الدوام / طبيعة العمل / ممل او ممتع / مريح او متعب / الرواتب !! … وللحين مالقيت معلومة موثوقة عن رواتب الاطباء … لأن عندي خلفية عن رواتب موظفي مهندسي الشركات … اجتماعي او لا … لأني سمعت ان الحاسب يبي له اشخاص غير اجتماعيين عشان يتفرغون لاعمال ويطبقون بشكل ممتاز …
أحيانًا اقول دوام المستشفى احلى عمل انساني وفيه اجر ان شاء الله وفيه حركة يعني ناس رايحه وناس جايه وفله => متأثر بـ 37 واحيانا اقول مرضى و شي متعب و عمل يبي له اخلاص وفيه مسؤولية كبيرة و إلخ … اما طبيعة عمل مهندس الحاسب فهو امام الشاشة طول الوقت … صراحة ماعندي خلفيه عن دوامه ولا فكرت فيه كثير …
الصراحة احترت … !! شوروا علي جزاكم الله خير …
وعندي سؤال خارجي يدور بذهني …
سمعت ان التوظّف بـ " ارامكو مثلاً " بشهادة البكالوريوس من البترول مثلاً او من ابتعاث الوزارة او اي ابتعاث غير مرتبط … أفضل من برنامج الابتعاث التابع لها … لآن فيها مردود أكبر وراتب أعلى ومرتبة اعلى … مدري هل هي صحيحة ؟! وهذا اللي خلا الشركة تبعث الطلاب عشان يرجعون يتوظفون برواتب اقل من مستحقاتهم لو قدموا للشركة …
الله يعين و يوفّق … شكرًا لكل من أنار صفحتي … واعتذر على الإطالة و اضاعة اوقاتكم
أخوي الكريم شف اللي تميل له ولو بشكل بسيط عن الآخر وصل صلاة الإستخارة لكي ترى إن كانت الخيرة لك في هذا التخصص.
بالنسبة لطبيعة عمل مهندس البرمجيات (هذا و التخصص اللي أنا راح أدخله وعندي معلومات وافية عنه) شغلتك تخطط البرنامج من a-z والإشراف على إنشائه ةبصراح التخصص هذا أنا يعجبني لأني هاوي للشغلة هذي فا الله يوفقك للي فيه خير لك.
وانا مثلك … احب الحاسب وتحيرت فيما بينه وبين الطب وكتبت مواضيع لين طفشت
سواء بهذا المنتدى او غيره من المنتديات … وأخيراً قررت استهدف تخصص هندسة الحاسب
في جامعة الملك فهد للبترول والمعادن … وأواجه نقد شديد ولاذع من الأهل وكل من حولي
ويسألني وش نويت … وتتكرر علي عبارات … شوف فلان وولد فلان …
الله يكتب لنا اللي فيه الخير
انت حيرتك يمكن أكبر كونك تقارن طب أسنان … واللي دراسته مثل الهندسة 5 سنوات …
مالك إلا الاستخارة والتوكل على الله … اقرا في قوقل عن الاستخارة وأفضل اوقاتها
وأدعيتها … الخ من الأمور اللي تهمك
تدري والله توي أدري ان طب الاسنان 5 سنوات … ! واللي تو اكتشفته انوا طبيب لاسنان بدون تخصص ماله معنى … فـ يبي لك سنتين تتخصص " اعصاب / تقويم / جراحة الفكين " … واللي هي الماجستير … !
الاستخارة حسب ماعرف عنها … اذا عزمت على فعل الشي تستخير … اما حيرة بين امرين فهي غير صحيحة اظن …الاصح انك تسأل وتشاور ثم تعزم وتستخير … !
" قبل شوي قريت باحد الردود عن شخص يبغى الطب ولاقى انتقادات ونصح له بارامكو او البترول … وانها افضل مستقبل ووظيفة "
السلام عليكم…
دراسة طب الأسنان ٧ سنوات، سنة تحضيرية و سنة امتياز وخمس سنوات دراسة عادية…
أنا والله نفس الشئ محتار بين الحاسب والاسنان، مع اين ما أحب الاحياء ولا اميل لها، والعكس بالنسبة للحاسب أحب البرمجة وتصميم المواقع، لكن اللي أنا خائف منه انه يمكن هذا الشئ يكون هواية، يعني ما أدري هل أنا ابعئ اقعد طول عمري أسوي هذا الشئ ولا لا ؟؟
ومن ناحية الرواتب معروف انه رواتب الأطباء أعلى بكثئييير ممكن يوصل الراتب بعد ١٠ سنوات الى ٤٠٠٠٠ ريال
أنا أعرف واحد في أرامكو تخصص علوم حاسب ويستغل عندهم ١٥ سنة راتبه ٢٢ ألف !!
أنا أقول لك صحيح انه كل شي اساسه يقوم على الحاسب…بس هذا ما يعني انه مهندس الحاسب هو صاحب أقوى وظيفه في العالم…الطلب في الوظايف على مستوى العالم وانتبه لكلمة العالم مو السعوديه بس
1-الطب
2-المحاسبه
3-الهندسه بكافة تخصصاتها
واخر شي أقول لك اذا صحيح محتار بقوه ما الك الا الاستخاره <<<<ورب العالمين ما راح يأمرك بشي يضرك
طب أسنان أفضل
من ناحية الراتب
- الدوام
- ممكن تفتح لك عيادة( الدولة تقدم لك قرض بمبالغ عالية جدا)
- ممكن تبيع اسمك لاحد التجار عشان يفتح عيادة ويمشيلك راتب وانت في بيتكم
تقدر تشتغل في قطاع صحي حكومي ثم اذا خلص دوامك تروح تشتغل في عيادة (شي زي كذا) وعاد شف الفلوس
لكن في النهاية ازداد عدد الطلاب في السنوات الاخيرة مما قلل الفرص الوضيفية بعض الشئ ولكن اذا لك رغبة تراه ممتاز لأخر درجة
شوف اخوي نحن مشكلتنا الضغوطات االاجتماعية
يعني الناس ما يشوفون في ها الحياة الا الطب
وذلك راجع لاحتكاكهم الدائم بالمستشفيات وبرون طبيعة عملهم
لكن قلي من اللي راح شاف المهندسين وعرف دواهم
من اللي راح شاف طلاب الادراة
فالاحتكاك الاجتماعي له دور مهم
انا زيك ولد خالي يدرس صيدلة ونصحني بطب الاسنان لسببين
الاول ان الدراسة اسهل من باقي انواع الطب
الثاني الفرص الوظيفية ممتازة
لكن انت شوف قدراتك ووش اللي تحب
انا شطبت على الطب من زمان وعرفت نفسي
لاني اكره الاحياء واكره الحفظ
واستخر ترى الاستخارة زينة
والله يوفقك ويختار لك اللي فيه الخيرة
أنا توني متخرج … و محتااااااااااار بين " هندسة البرمجيات " و " طب الأسنان " …
و إللي كان زي الصاعقه علي … مهندس حاسب يستلم فوق الـ 70 ألف " ماشاء الله تبارك الله " لما إستشرته قالي روح " طب أسنان " … حسيت إن مخي تشتت فعلاً … ليش طيب …!
أنا أعرف أطباء و أعرف مهندسين … و إذا إستشرت طبيب قالي روح هندسه … و إذا إستشرت مهندس يقولي روح طب … و بعدين معكم ألعب أنا …! و الله دوخوني دوخه مايعلم فيها إلا ربك …
آخر ماتوصل إليه العلم الحديث … قررت " طب أسنان " … قلت خلني أروح أشوف موادها … و بعد بحث حصلت على بعض منها … و يوم بديت أقرا و عرفت محتوياتها … مرررررره ما أعجبتني … حسيت مكاني مو هنا …
و ألحين رجعت للهندسه … و إن شاء الله مايجي شي و يخربط علي الدعوه …
السلام عليكم…
دراسة طب الأسنان ٧ سنوات، سنة تحضيرية و سنة امتياز وخمس سنوات دراسة عادية…
أنا والله نفس الشئ محتار بين الحاسب والاسنان، مع اين ما أحب الاحياء ولا اميل لها، والعكس بالنسبة للحاسب أحب البرمجة وتصميم المواقع، لكن اللي أنا خائف منه انه يمكن هذا الشئ يكون هواية، يعني ما أدري هل أنا ابعئ اقعد طول عمري أسوي هذا الشئ ولا لا ؟؟
ومن ناحية الرواتب معروف انه رواتب الأطباء أعلى بكثئييير ممكن يوصل الراتب بعد ١٠ سنوات الى ٤٠٠٠٠ ريال
أنا أعرف واحد في أرامكو تخصص علوم حاسب ويستغل عندهم ١٥ سنة راتبه ٢٢ ألف !!
طبعا الحاسب يعتمد على شطارتك وتطويرك لنفسك…
عليكم السلآم والرحمة … ايه توني تأكدت صحيح … الـ 5 سنوات نظام قديم =( احلى مافي الهواية انك ممكن تطورها وتطورها مستحيل توقف … هذا احلى مافي الحاسب وان فيه ابداع اكثر من الطب بصراحة من وجهة نظري … الحاسب ماتقدر تنظر لأبعد مدى له !
مستحيييل 40 ألف !!! هذا يمكن بعد مايكون اخصائي ويمكن بعد استشاري … ! هذي دراسة 11 سنة ياطويل العمر …
لو درست حاسب 11 سنة وخذيت الدكتوراة … صار راتبك يعادله ! مثل ماقلت لك يمكن بكالوريوس … وحسب الرتبة ! اذا كان تقدير عملك ممتاز تزداد كل سنتين رتبة ويزداد راتبك … اذا كان تقديرك جيد جدا كل ثلاث سنوات … جيد كل 4 سنوات وهكذا
أنا أقول لك صحيح انه كل شي اساسه يقوم على الحاسب…بس هذا ما يعني انه مهندس الحاسب هو صاحب أقوى وظيفه في العالم…الطلب في الوظايف على مستوى العالم وانتبه لكلمة العالم مو السعوديه بس 1-الطب 2-المحاسبه 3-الهندسه بكافة تخصصاتها
واخر شي أقول لك اذا صحيح محتار بقوه ما الك الا الاستخاره<<<<ورب العالمين ما راح يأمرك بشي يضرك
اجحفت في حق الحاسب صراحة ، ما اعتقد المحاسبة تطغى على الحاسب … برضوا وظايف الحاسب على مستوى العالم بكل مجالاته قوي قوي قوي جدًا … لو نظرت للشركات العالمية و المؤسسات والبنوك والمواقع وكل شيء … !
