…
…
السلام عليكم ورحمة الله وبركاته …
صبحكم الله بالخير جميعا …
ما أدري كيف ومن وين راح أبدأ …
طبعا بالبداية أنا نفسه العضو " استفسار بسيط " …
http://www.skfupm.com/vb/member.php?u=36729
واللي يبغى يعرف وضعي ومشكلتي بالضبط يبحث بمواضيعي بعضوية " استفسار بسيط " …
طبعا آخر موضوع لي كان " وداعا يالبترول " …
وطبعا كان أملي وتوقعي من الأعضاء إنهم راح يواسوني ويفيدوني بخبراتهم من تجارب الغير …
لكن اكتشفت ان الشباب الله يسعدهم مصرين إني أحاول بالبترول وأحاول أرجع … !!
بالبداية ما أخفيكم حسيت بندم إني استسلمت …
لكن فكرت فيها شوي وجلست أحلل ردود الشباب …
اللي يقول فيه واحد عطوه دسمس وبعد سنة كاملة قبلوه … !!
وفيه واحد دسمس وجاب عذر رسمي وقبوله بعد سمستر وصيف … !!
قلت يعني أجلس الفترة هذه كلها وانا أحاول وأحاول …
طيب يمكن إدارة القبول روسهم يابسة ويحطوني بالبلاك ليست من كثر ما أراجعهم وانشب لهم …
ويمكن … ويمكن … ويمكن …
طيب خلنا من الكلام هذا وخلنا نفكر بطريقة ثانية …
طريقة إيجابية شوي …
لو قدمت على جامعة أخرى …
راح تكون ان شاء الله بدايتي قوية …
وخبرة أربع سنوات ان شاء الله ماتروح عبث …
وأعوض عن الاشياء اللي أهملتها من معدل ومشاركات تفاعلية وغيرها …
بس هل راح يقبلوني بعد هالسنين … ؟!
رحت اراجع الأوراق …
شهادة الثانوية موجودة بالجامعة … done
القدرات لها اكثر من ثلاث سنوات … fail
التحصيلي لها اكثر من سنتين … fail
هنا تحطمت بقووووووة وقلت خلاص الدعوة كلية تقنية أو معهد إدارة … 
كلمت مركز قياس …
وكل واحد يقول ما عندي علم …
واللي يقول مستحيل …
واللي يقول يمكن لو تدخل على المدير …
قلت طيب خلني أروح لهم بنفسي …
بالبدابة كلمت واحد …
والله ثم والله مثل نفسه الطيبة ما عمري شفت …
تخيلوا يا جماعة أمس كلمته وقلت له السالفة وقال مرنا بكرا ونشوف …
ويوم جيت لقيته كاتب خطاب بنفسه على أساس إنه أنا ومرسله للمدير … !
والرجال يوم دخلت عليه قال لي أبشرك درجة القدرات مددوها سنة كاملة …
بس التحصيلي للاسف لازم تختبر مرة ثانية وتراني سجلت لك على المقاعد الأخيرة بمدارس المعرفة …
<-- هذا شكلي يوم جاني بالأخبار هذه 
من زمااااااان ما سمعت أخبار حلوة تخصني أنا شحصيا …
والله ياجماعة ما يمر يوم اتذكر فيه الرجال هذا إلا وأدعي له من قلبي واقول للوالدة دايم تدعي له … 
ناس قلما تلقى مثلهم بطيبتهم وحسن خلقهم وأمانتهم وإخلاصهم …
نرجع للقصة …
شهادة الثانوية موجودة بالجامعة … done
القدرات لها اكثر من ثلاث سنوات … done
التحصيلي لها اكثر من سنتين … fail
اختباري التحصيلي باقي عليه ثلاث أيام … !!
يعني بالله وشلون راح اجمع حصيلة ثلاث سنوات بالثانوي بثلاث ايام …
وخاصة بعد أربع سنوااااااات متخرج منها …
المهم بديت أقرأ لي كم مصدر وكم موقع …
وحملت لي كم كتاب لرائز وجبت العيد بعد ماخلصت منها …
المعلومات تشابكت وانحاست …
كيمياء … وأحياء … وفيزياء … ورياضيات … وانجلش
حق ثلاث سنوات …
بثلاث ايام … !!!!!
المهم قلت مالي إلا أسوي اللي علي واتوكل على رب العالمين …
وجاء اليوم المنتظر …
وأروح للمدرسة اللي راح يعقد فيها الاختبار …
ودخلت الاختبار …
من المواقف اللي حصلت بوقت الاختبار …
جاء المراقب اللي ياخذ البطاقات ويشيك عليها …
المهم بطاقتي معدومة … والصورة مختفية … والأراقم نصها رايحة …
قال لي والله ما نسمح بها وصعب شوي ومن هالكلام …
المهم قال لي عطني رقم الهوية …
قلت له 105…
الرجال وقف شوي … !
قال أول مرة تختبر تحصيلي … ؟
قلت لأ والله هذه ثاني مرة …
قال متى كانت … ؟
قلت قبل أربع سنين …
تحسونه رحمني وشفق علي …
بدون ما ياخذ شيء قال بالتوفيق ومشى …
المهم خلص الاختبار …
والحين باقي الموعد المرتقب بعد 10 ايام وهي النتائج …
وتمر الأيام …
وأنا ماتمر ساعة خلال الفترة هذه إلا وأدخل الموقع من الوسوسة والتعب النفسي …
وبعد 11 يوم انتظار طلعت النتائج …
شفت الدرجة بالبداية تحطمت بشكل ما تتخيلونه …
على طول غمضت وشوي أبكي … !!
رجعت أقراها مرة ثانية …
وفجأة !!!!!!! <-- كيف التشويق 
من الفرحة حلفت على أهلي غداهم وعشاهم على حسابي اليوم … 
ولله الحمد جبت 84 …
طبعا بالبداية قريتها 48 …
لا أحد يسألني كيف … XD
شهادة الثانوية موجودة بالجامعة … done
القدرات لها اكثر من ثلاث سنوات … done
التحصيلي لها اكثر من سنتين … done
بشكل مختصر …
قدمت على الملك سعود والإمام …
والحمد لله …
قبلت بالملك سعود سنة تحضيرية للكليات العلمية …
وقبلت هندسة بجامعة الإمام …
واستخرت ربي وكملت إجرائاتي بالملك سعود …
و أرسلوا لي الرقم الجامعي وباقي ان شاء الله اختبار تحديد المستوى بـ 9 شوال …
صحيح إنه حصلت بعض العوائق …
على أساس زمن الشهادة …
والقدرات صعب يدخلونها لأنها تتدخل بشكل آلي …
ولازم يراجعون أوراقي كاملة والترانسكربت بعد 10 أيام من إرسال الاوراق … !!
والرقم الجامعي تأخر بقوة …
لكن شيء واحد كان هو اللي يقويني ويعطيني أمل كبيييير …
الصلاة و الدعاء و قراءة القرآن
والحمد لله لا واسطة ولا خرابيط …
في الختام …
اشكر كل من وقف معي وآزرني سواءا بالموضوع او الرسائل أو بالجوال …
كلمات الشكر قليلة بحقكم … الله يبيض وجيهكم … ويكثر من أمثالكم …
وأخص بالشكر الجزيل صاحب الفضل الكبير بعد الله …
كل خطوة أحس إني تحطمت منها …
أروح أسأله وتلقاه يعيد لك الأمل …
ومع الوقت صرت أسعد بالحديث معه …
انسان كان مخلص وصادق معي بكل كلمة قالها …
تحس حب الخير صفة متأصله بمعدنه الأصيل …
يعجبني بعض الأحيان إنه يزبد لي ويقول لي هذا الشيء مستحيل تسويه … (^_^)
وما تصدقون ياجماعة على كثر ما كنت أتكلم معه وبيننا أخذ وعطى …
ما أعرف اسمه … (*_*) !
هو الأخ
satellite ISE
ما أقول إلا جزاك الله كل خير … 
واعذروني ياجماعة الخير على الإطالة …
وياليت تحللوني وتبيحوني إذا كنت أخطيت بحق أحد …
أستودعكم الله الذي لاتضيع ودائعه …
أخوكم : محمد
راعي الكابرس السوداء <-- توضيح أكثر
…
…
: