السلام عليكم
وشلونك يالربع … خصوصا اخواننا من الخارج ( خارج الشرقية 
) … وشلون تأقلكم مع الظهران والمنطقة بشكل عام ؟
انا اكتب لكم هالموضوع بعد ثلاث سنين من انسحابي من جامعة البترول! والله الشاهد اني اكتبه ابي الربع اللي فالاوريا يتعظون من السالفة هههههه !
( احس اني مدمن مخدرات سابق وانا بكتب قصتي 
)
انا تخرجت من الثانوية في 2006 ( ايام اختبارات الوزارة ) ونسبتي كانت حلوة 96 وقياس ممتاز 85 وتحصيلي حليو 78 … وكانوا الاهل والجماعة مستانسين وطبعا وللاسف ماكان عندي توجه محدد ( يعني ماكنت ادري وش التخصص اللي ابيه … ليش ابيه … هل يناسب قدراتي ؟ ) … كنت ابي ارامكو السي بي سي ( ثقافة شرقاوية هههههه ) او البترول … وقدمت على الطب ترضية للوالدة … انقبلت بالبترول والطب … وكانت خيبة الامل اني ماانقبلت بالسي بي سي … وكانت خيبة امل لان دفعتي ( يعني المواطنين من دفعتي ) 21 واحد بالثانوية … 15 كانوا بالسي بي سي !! فـ انصدمت بس قلت الحمدالله البترول كويسة وبشد حيلي وبقدم على ارامكو بعد مااخلص كم سنة من الجامعة … ( وانا للحين مدري وش التخصص اللي ابيه … اهم شي تخصص يوديني ارامكو واصير زي فلان وعلان من الجماعة اللي متوظفين بارامكو ومهندسين وكلن يفتخر فيهم ) … ف كانت الفكرة العامة هندسة
انجليزي كانت اعلى من اغلب الطلاب اللي كانوا معي بكلاس الانقلش لاني متخرج من مدرسة زوينة بالخبر وماكان عندي مشكلة بالانجلش
الماث مشيت فيه مع مدرس خصوصي وادرس على الخفيف ومو شاد حيلي
كان عندي لاب القرافكس دزاين ونجحت فيه ببركة الله
ومهارات الدراسة الجامعية والرياضة كانوا حلوين وسهالات
نجحت السمستر الاول … وكان شي جيد بالنسبة لي واعتبرته انجاز … مع اني ماشديت حيلي ابد وكان كله بالبركة … طبعا انا انسان عاقل في حياتي منيب سربوت هههههه بس بدت تصير عندي سيارة بيدي واخوياي بعضهم فاضي وحبيت سالفة الروحات والجيات
بيتنا يبعد عشر دقايق عن الجامعة … ومرتاح ومخدوم عكس الطلاب اللي جايين من مدن ثانية وساكنين بسكن الجامعة
بدء السمستر الثاني … ونفس عدم الاهتمام كان موجود وساحب ماادرس الماث الا عند المدرس … وكان عندي فزكس وكنت ساحب عليها … احضر اسبوع واغيب اسبوع … وعبط وجايب العيد فالكوازات … والماث اسلم اساينمت كامل وثلاثه ناقصين وانت ماشي
جت الميدترمز وجبت العيد في الماث … ( مااذكر اذا كان الفزكس فيه مدتريم ولا لا ) … ونفس الشي بدال لا ادرس بعد المدترمز على طول مابديت ادرس الا قبل الفاينلز ب اسبوعين
ومع كذا كنت واثق من نفسي … واهلي حاجزين لي تذكرة معهم على اساس اني بسافر معهم بالصيف ومنيب عايد ولا شي …
طلعت النتايج
دي بلس بالماث … اف بالفزكس! الانجلش سي بلس مدري بي … والباقي مااذكر الصراحة
المهم رحت شيكت مع دكتور هندي محترم الله حق … وقلت له كم باقي لي على السي ( النجاح ) ووراني الكشف … طلع درجتين ناقصتني !! قلت عطني اياهم ماتضر درجتين وانا حاجز وطيارتي بعد اسبوع مااقدر اجلس هنا ومادري ايش … قالي اعطيك لازم اعطي الجميع قلت عطهم هههههههه قام يضحك قال مايصلح قلت زودني بالمشاركة … قال انت لو حاضر اربع كلاسات زيادة كان نجحت !!! ( تسألني وينك ليه ماحضرت اقولك مدري … مرة نايم … مرة قايم وجالس بالبيت اشوف تلفزيون … واعذار تفشل ) المهم والله انغبنت غبنة غير طبيعية ( بعلمكم ليه بعدين ) … وقلت مو مشكلة ناخذه بالصيف
جا الصيف
مافي الا انا واخوي الكبير بالبيت … الباقين مسافرين … كل واحد معه سيارة وفلوس وجواز واخوياه معطلين … وانواع الطلعات وقلة السنع … وماعندي الا كلاس واحد مرة وحده كل يوم ومع ذلك كنت اسحب !! مرة رايح الكويت … مرة رايح المزرعة … مرة الشاليه … واشياء ملحوق عليها !
وتجيك الطامة الكبرة نهاية الترم !! دي بلس بعد … ياولد غير بدل ؟ واروح عند الدكتور كان اردني … واقوله كم باقي لي … ونفس الشي والله العظيم درجتين باقي لي ! مالكم بالطويلة نفس السبب درجات المشاركة ناقصة
وجا الترم اللي بعده وتوقعت انهم بيحولوني المجتمع … بس جاتني فرصة وينزلون لي فزكس وماث … ومالكم بالطويلة ! نفس الدرجات بالضبط … دي بلس واف !! وعاد ماصار لي اي فرصة الا اني اروح المجتمع … ( اخوياي بهالفترة اللي خلاص ارامكو طلعته برا … واللي تخصص بالبترول ) … ولاحظوا للحين في بالي هندسة مع اني مو ملتزم دراسيا وخصوصا بمادة مهمة مثل الفزكس
قلت لابوي … قالي لك مني اصرف على لبسك واكلك … اما المجتمع دبر نفسك … تبي تداوم عندي 9 ساعات باليوم وب ادفع لك فلوس الكورس!! … مالكم في تفاصيل السوالف العائلية … ماعجتني سالفة اني " التزم ب وقت !! " ورحت خذت الفلوس من اختي الكبيرة وسجلت الماث بالمجتمع … وحنا الحين دخلنا 2008 !! ونفس القصة … عبط وسحب وعدم جدية … اختبرت الفاينل وطلعت داري ان وضعي تعبان … ( وكنت مقدم على البعثات وقتها ) جتني بعثة على كندا وخليت طياراتي بعد النتايج … كان عندي امل اني لو نجحت برجع البترول وبسحب على البعثة … رحت اشيك على النتائج … لان كلية المجتمع يحطونها لك في ورقة في الممرات … واشيك وتطلع دي بلس !! ( درس يعني ! )
واخوياي ( كللللللللللللللهم ) اللي حولوا المجتمع معي … رجعوا للبترول !! كلهم نجحوا الا انا وهذا خلاني محبط بشكل غير طبيعي
ف عزمت على السفرة مع اني ماكنت ابيها
التكملة اليوم المغرب بتوقيتنا …" انتظرونا وفالكم طيب "
