طرحت الموضوع في قسم الطريق، ولكن أظن لو طرحته هنا لكان في الإفادة أجود. أنا قدمت على الابتعاث الخارجي لسابك وعلى البترول.
وبالنظر في الدرجات، فلا نملك إلا أن نقول الحمد لله
ولكن السؤال: إلى أيهما أذهب؟ من يرشح لي إحداها فأتمنى يجود علينا بذكر الأسباب.
بخصوص ابتعاث سابك، فعندي مجموعة أسألة أتمنى ممن عنده المعلومة يفيدنا بها:
1- كيف نوعية الجامعات اللي يبتعثون فيها الشعب؟ هل للطالب حق الاختيار بين جامعة وأخرى؟ وهل يبتعثون إلى جامعات تُعتبر أفضل من البترول (وأتمنى ذكر من أي ناحية هي أفضل)؟
2- طبعًا مع إنهاء الابتعاث يرجع الواحد يعمل عندهم، والسؤال عن طبيعة العمل وماهيته. أحد يفيض لنا بما عنده من هالناحية؟
3- وكذلك طبيعة الدراسة والمعدل وغيرها… آمل تغطون جميع النواحي بالذكر.
4- كذلك يهمني ما يتعلق باللغة الإنجليزية، هل البترول كفيلة بجعلي ذو مستوى عالي بالإنجليزي كما لو كنتُ مبتعث؟
وأتمنى من العارف منكم والمنصف يعمل مقارنة بينهما ويذكر ما لهما وما عليهما من أمور شاملة. فأخاكم في حيرة من أمره فأزيلوا غشاء جهله.
اولا انا ما اعرف في الاثنين بس انا كنت مبتعث و الحمد
لله خلصت و رجعت البلد
فاللي حاب اقوله بس انه على ما اعتقد
انه سابك متكفله بتوظيفك صح او لا فاذا جاب انك
تضمن الوظيفة و ترجع و دايركت تشتغل فانصحك بسابك
هذا ميزة من سابك و سابك معروفه بترقية الموظيفين من جميع
النواحي و شركة لاتعوض و كل واحد يتمنى يتوظف فيها
و شي طبيعي انه سابك راح تبتعثك على تخصص هي تبقيه
فمالك مجال انك تغير او تحتج من التخصص اللي راح يودونك عليه
فيمكن راح تدرس شي انت مو رغبان فيه اما من ناحيه الضمان
للوظيفه فهي شبه مضمونه مع اني ما اعرف نظام سابك في الابتعاث
بس هذا بشكل عام جميع الشركات كذا ما راح تدفع على دراستك
و تجي و ما توظفك تستفيد منك
اما بالنسبه من الجامعه فشنهو الابتعاث اللي منهم انك تروح و ترجع
و تكون موظف (معيد - محاضر) في الجامعه ؟
فاذا كان كذا فاذا انت تحب سلك التدريس و دوشة الطلاب
فعليك بالعافيه البعثة
اما اذا بيبتعثونك بس لانك متفوق عشان تكمل دراسه و ترجع
بس ما يوظفونك فهذي فيها عدة مفترقات :
ميزات
1- راح تدرس التخصص اللي انت تبقيه بفرصه اكبر
2- مدة الدراسة راح تطول فيها قد ما تقدر سواء في اللغه
او التخصص
3- يمديك تكمل الدكتوراة اذا كنت بتبعث على الماجستير
المساوئ
1- فرص العمل اقل لانه ما احد ضامن لك عمل اذا رجعت
2- يمكن تطول على ما تحصل وظيفه و يمكن ما تتوظف الا في
شي ما يكون بمستوى شهادتك الا بإذن الله فالله على كل شي قدير
بالنسبة للغة ما ادري عن نظام جامعه البترول و سابك بس
الاكيد و لا واحد من الاثنين راح يوديك على شي دمار عشان
ما تتخرب سمعتهم
و على المعدل من سابك ما اعتقد انهم بيتهمون بالمعدل كثير
لانك موظف من الاساس اما الجامعه فمهم جدا
المتابعه سابك راح تتابعك خطوة بخطوة لانك موظفها
اما الجامعه فما اعتقد
بس بصراحه ما فهمت سوالك هل تعني الابتعاث من سابك
و الا الدراسه في جامعه البترول
او الابتعاث من الجهتين سابك و البترول ؟
فردي الموجود على انك مبتعث من البترول او سابك
اتمنى لك التوفيق
ممتاز، يعني لو جينا للدراسة والتعليم نجد أن ابتعاث سابك أفضل حيث انها تبعث على أفضل جامعات أمريكا وبريطانيا حتى يتخرج منها
ولكن لو جينا للمستقبل الوظيفي، نجد أني سأكون محصورًا في سابك بعدد السنوات التي ابتعثت لها أن أعمل معهم، كما أن سنوات الدراسة لت تُسب سنوات خبرة. (هذا غير الامور اللي تطرأ ويمكن ما تعجبني بشركتهم ولكن ملزم بهم)
بينما في البترول، الواحد تجيه عروض من مختلف الشركات (سابك أرامكو شلمبرجير وغيرها كثير)، فهنا أكون افكر في شركة يمكن هي أفضل من سابك وراتبها أعلى.
سابك شركة كبيره … ترتيبها 98 من أقوى 1000 شركة في العالم بحسب تصنيف الفوربس … والخبره فيها جدًا ممتازه … ورواتبهم جيّده !
ويقال … عصفور في اليد خير من عشره على الشجره … أنت أمامك على الأقل خمس سنوات قادمة ماتدري وش وضع شلمبرجير والبقية … وعلى فكره شلمبرجير نادرًا أو بحسب ماسمعت ماتقبل طلاب معدلاتهم أعلى من 3 ! والشاهد شباب كثير أعرفهم قدموا عليها معدلاتهم ممتازه وماقبلتهم !
أنصحك في أبتعاث سابك … لأنك بعد سنتين هنا في البترول راح تقول ليتني طلعت إبتعاث ! وإسأل مجرب !!
الله يرحم والديك مع احترامي لجامعة البترول هل تقارنها بجامعات امريكا و بريطانيا اللي تبتعث لها سابك
وكمان بدون مقارنه انقليزيتك برى بتكون توب لأنك عايش بين اهل اللغة نفسهم وبتعرف المشمش والبطيخ فاللغه لكن هنا استخدامك لها خفيف ومنت مجبور زي برى
انصحك بالابتعاث وتكون ضامن الوظيفه بعد ضمان ربي سبحانه وسابك خبرتها اقوى شيء هنا بالسعودية لو فكرت بعدها تروح لشركات ثانيه بنفس المجال او قريبه منها زي صداره او الصحراء او باقي شركات البتروكيماويات
ضمان المستقبل الوظيفي أهم شيء لك كشاب في مُقتبل العمر وأخص بالذكر بعد الدراسه الجامعيه …
سابك وإبتعاثها وبس … أنت جمعت بين الدراسه الجامعيه والوظيفه بالمستقبل بلا شك فرصه عظيمه لا تفوت وألف مبروك مقدما وماشاء الله لو كان جاك القبول للإبتعاث الجامعي من سابك …
وإبتعاثك خارج البلد سوف يكون له الأثر الإيجابي بأمر الله بتحسين اللغه التي لا وجه للمقارنه بين تحسينها بالإبتعاث أو البترول …
رد شافي ووافي وفيه محاسن كل جهة.
أكبر سيئة لابتعاث سابك هي اختيار التخصص فالبعض اختاروا لهم تخصصات مايبوها وتشوف المبتعث وقت الدراسة متأزم وبعضهم يفكر انه ينسحب بسبب ان التخصص مو بالعه.
من الجهة الثانية وانت تدرس تحس نفسك كاش مقارنة بباقي الطلبة وغير كذا تدرس وانت مطمن على مستقبلك وأول ماتتخرج مكانك محفوظ بعكس الطلبة اللي بعضهم له سنة ولا توظف وبعض اللي توظفوا في شركات ورواتب دبلوم وليس بكالوريوس فالبعض تعب 5 سنين والنهاية توظفوا في شركات صغيرة (طبعا هي أرزاق).
انا حاليا متخرج بس لو كنت مكانك بحتار نفس الشي لاني من جهة شفت معاناة مابعد التخرج فالشغلة مو مثل ماوصفوها العالم بانك تاخذ بكالوريوس وتتهافت عليك الشركات بالعكس نلاحق ورا الشركات وتشتغل في البداية في شركات برواتب خايسة عشان تاخذ خبرة.
لكن من الجهة الثانية انا دخلت البترول على أساس أدرس هندسة وأخذت سنة في الهندسة كرهت حياتي فيها وحسيت اني مالي في الهندسة وموراغب فيها بعدها حولت على الادارة والحمدلله تخرجت بمرتبة شرف.
والنهاية انصحك بالاستخارة والله يكتب اللي فيه الخير لك.
طيب سؤال مهم، وقبل كذا أشكركم جزيل الشكر على كلامكم، ما تعرفون قد ايش هو مؤثر ^^
الحين في سابك لو اجتزت المقابلة الشخصية، هل يقولون لي بالتخصص المطلوب؟ وهل إن كان يعارض رغبتي بالإمكان تغييره؟ وهل إن عجزت عن تغييره أخرج من البرنامج بالكامل وأروح البترول ولا ملزم بعد ما وافقوا علي أني أكون معهم؟
