يا اخوان انا جاني عرض وظيفي من بنك الراجحي على برنامجهم IT GDP تدريب لمدة ٨ شهور بعدها وظيفة براتب تقريبا ١٢ الف و٥٠٠ ويتطور الراتب بعدها بسنتين ونصف ويوصل تقريبا حدود ١٨ الف، وحاليا اكملت اجرائاتي في كلية الملك فهد الامنية وايضا وزارة الدفاع وراح يطلع القبول النهائي بعد شهر تقريبا.
راتب كلية الملك فهد الامنية ووزارة الدفاع مقارب للراجحي مع العلم ان هناك امكانية للنقل بعد سنوات خدمة عكس الراجحي اللي راح تكون مقر الوظيفة في الرياض للابد.
السؤال ايش رايكم وش الافضل بينهم وليش؟
هل اروح للراجحي عشانه اضمن وجاني عرض وظيفي واسحب على كلية الملك فهد الامنية ووزارة الدفاع ولا اخاطر وارفض الراجحي وانتظر نتائج الامنية ووزارة الدفاع وش رايكم؟
اولا الف مبروك ياعبدالله ،
ثانياً من وجهة نظري اذا انت من الرياض بقولك توكل على الله ولا تفكر وادخل برنامج الراجحي ، اذا مو من الرياض عندك خيار اقترحه عليك، ادخل البرنامج وشف الوضع كيف سنة سنتين ثلاث ، الكليات العسكرية فاتحه لين عمرك ٢٧ ، فأتوقع في اسوء الاحوال اذا ماعجبك الوضع ممكن تطلع من الراجحي وتقدم على العسكرية وهذا اشوفه احتمال ضعيف ،
عموماً انت استخر وفكّر بنفسك بعد ٣٠ سنة ، هل بتندم لو دخلت العسكرية ؟ او هل بتندم انك دخلت برنامج الراجحي ؟
والله يكتب لك اللي فيه الخير
اذا كان العقد مع الراجحي غير ملزم بالبقاء … عندك خيار قبول عرض الراجحي ثم انتظار القبول النهائي من الأمنية …
وقتها استخير واختار اللي تراه مريح لك بعد الاستخارة والاستشارة …
وبما انك طلبت آرائنا … بالنسبة لي لا أفضل العمل بالبنوك وشركات التأمين اطلاقا لوجود شبهة بها تكاد تكون مؤكدة … فالابتعاد عنها افضل رغبة فيما عند الله .
لا أجرّم من يعمل هناك … لكن هذا رأيي وكل شخص مسؤول عن قراراته …
اسال الله لنا ولك التوفيق
الله يعطيكم العافية جميعاً وشاكر لكم على طرح ارائكم والتفاعل في الموضوع.
الله يعطيك العافية اخوي، للاسف العقد ملزم بالبقاء وفيه غرامة كسر عقد ٦٠ الف ريال عشان كذا محتار، اللي يميز الراجحي تطوير وظيفي قوي + راتب عالي ولكن يقابلها ضغط عمل عالي وعمل كبير في الدوام، هناك خريجين من نفس البرنامج ويقال ان بعض الاحيان يصل العمل الى ١٢ ساعة في بعض الاقسام وقد تضطر تحضر في الويكند لانهاء بعض المهام الطارئة بينما في الامنية عمل مريح+ وجاهة اجتماعية+ راتب عالي وقوي وهذا اللي مخليني اتردد بعد لكن الله يكتب اللي فيه الخير.
يعطيك العافية اخوي مهندس والله يبارك فيك، انا من خارج الرياض وهذا اللي يخليني اتردد من ناحية الوظيفيتين، وبالنسبة للبرنامج اذا دخلته ف انا ملزم اجلس معهم مدة ١٨ شهر ٩ شهور تدريب و٩ شهور توظيف وبكذا ماراح اقدر ادخل الكليات العسكرية لانها تقبل خريج السنة والسنة اللتي قبلها فقط.
الرياض زي ما انتوا عارفين الايام ذي العقار فيها غالي وزحمة وغير كذا اني راح اكون بعيد عن الاهل للابد فهو قرار مصيري صراحة، اما الامنية ففرصة كبيرة اني انقل عند الاهل والراتب راح يكون اعلى من الراجحي لان الراجحي عندك ترقيتين مضمونة لك بعدها انت وشغلك ممكن تجلس سنوات ماتترقى بس اللي يميزها ان الناس دايم تجيهم عروض بعد مايخلصون السنتين الاجبارية.
