صباح الخير
كثير منها يدرس هندسة او حتى ادارة ، ويتوقع العمل بشركة كبيرة ، بس هل ياترا تعيينه سيأتي مثل رغبته ؟؟ ، حبيت اني انقل انطباعي الشخصي عن بعض المدن الكبيرة والمعروفة في مملكتنا ، واتمنا اسمع انطباعات الشباب بدون تعصب ،، بحيث لو تعينت فيها تكون عارف محاسنها ومساوئها .
الخبر ،، حبيبة القلب
المدينه والجو : يكفيها فخرا انها صنفت ثاني اجمل مدينه عربية بعد ابو ظبي ( تخيل !!)، و الخبر مدينه جميلة ساحليه ، الشوارع جميله ومرتبه ، وفي السنوات الخمس الماضيه شهدت تسارع مذهل في اعادة تشكيل وتجميل بنيتها التحتيه ، المجمعات في الخبر ضخمة جدا امثال الراشد والظهران وقريبا الشبيلي ( بيصير اضخم مجمع في السعوديه ) وجرير وغيرها ، كورنيش الخبر جميل ومنظم ( بس انصحك لاتروح هاليام لان عيال الرياض بيجونا وبيسوون زحمه ) ،
جونا : لك عليه ، بس في اخر ثلاث سنين يمكن ،احس ان الجو احسن من اول ( الرطوبه خفت والجو معتدل في معظمه )
مناطق الخبر: ( في التقسيم فقط عنيت بالمدينة الام – الخبر- ، وتركت ملحقاتها مثل الدوحة وملحقاتها والراكة والعنيزي والبندرية وغيرها )
1: الشماليه : المواجهه للكورنيش ، يحدها شرقا البحر(الواجهة البحريه) وجنوبا شارع الملك عبدالله ( الظهران ) وغربا شارع الملك عبد العزيز ( الكباري ) وشمالا شارع الببسي ( ومنطقة حي الكورنيش اللي خلفة )
والمنطقة الشمالية في غالبها لايسكنها سكان الخبر الاصليين ، معظمهم نقلوا الى الغربيه ( العقربية ) او مناطق مثل الراكة او الدوحة , الخ ، واستثني حي الكورنيش , في معظمه قصور وبيوت فارهه ( الله يهنيهم ) ويعتبر ثاني افخم منطقه في الخبر .
2: الغربية : يحدها شرقا شارع الملك عبد العزيز وشمالا امتداد شارع الببسي ( والحزام الذهبي ) ، غربا منطقة الراشد جنوبا شارع الملك عبدالله ( الظهران ) ،، اهم مناطقها العقربية وهي سكن موضفي اراامكو القدامى ،و الحزام الاخضر وهو يقع في شمالها وهو ارقى حي سكني في الخبر والدمام بالاضافه الى الحزام الذهبي ، روح وشوف القصور على كيف كيفك ( الله يبلغنا )
3: الجنوبيه : شمالا شارع الملك عبدالله ، شرقا امتداد شارع الكورنيش الرئيسي ، غربا شارع مكة والمنطقة اللي بعده ، جنوب الاسكان واتجاه العزيزية ، اهم مناطقها الثقبه ، وهي اردى منطقه عندنا من الناحية التنظيميه والنظافة ، وزحمه ، وكثيرين مشاكل ، وغيرها الصبيخة ، حالها افضل من الثقبه بشوي ان لم يكون مثلها من النواحي التنظيميه والنظافة واهلها وشبابها جدا طيبين ، ولاتستغرب اذا قلتلك كوول .
الشرقيه : البحر ( الواجهة البحرية )
مجتمعها : سكان الخبر في معظمهم نازحين من الخارج ، وفي الغالب قدموا للعمل ضمن مشاريع شركة ارامكو
اما اوائل سكان الخبر ، فيرجع بنا التاريخ الى قسم من قبيلة الدواسر من سكان البحرين ( الرفاع ) قدموا بسبب مضايقات الاستعمار الانجليزي في البحرين آنذاك ، وسكنوا في منطقه ساحلية مواجهه تقريبا الى البحرين تسمى العقير ( نقلا عن جدتي لوالدي ) ،
من المعروف عن سكان الخبر الاصليين النظام والنظافه و اكبر اسبابه انظمام معظم السكان للعمل في ارامكو وشركات البتروكيماويات وارسالهم بعثات للخارج فقدموا بعقليه متفتحة ونقلوا هذه القيم للاجيال التي اتت بعدهم ،
والسبب الاخر : قرب البحرين المعروفه بانفتاحها الاجتماعي ولكونها مستعمرة انجليزيه سابقه ( ولاحظ في تنظيم السير والاشارات المروريه في البحرين)
ومن المعروف ايظا عن سكان الخبر ، الطيبه في معظمهم والهدوء ، والمجتمع السكاني في الخبر مجتمع صغير ومعظم الناس يعرفون بعضهم ، بل يمكن اصغر مجتمع سكاني في اي مدينه بالسعوديه مقارنه بضخامة المشاريع فيها وحجمها القابل للتوسع ( وهذا قد يفاجأ البعض ، حيث ان المراقبين يضعون الخبر على رأس المدن السعوديه في تصنيفها ضمن حجم ومساحات المجمعات التسوقيه ، وهل العرض يناسب الطلب المو جود في منطقة الخبر )
والكول في الخبر وشباب الفله كثير ، انا وجهة نظري ( وكلن له وجهة نظر ) ان شباب الخبر يحتلون المرتبه الثانيه اذا لم تكن الاولى ، في افضل شباب لبيسين ومتحظرين و كشخة بعد شباب جدة على مستوى المملكة
والغاالب في لبس شباب الخبر الماركات الغالية ، وخاصة الملابس اللي يشترونها من البحرين اللي ماتكون متوفرة بالنسبه لعيال جدة ، وغير كذا بالنسبه للسيارات ، الغالب ان سيارات شباب الخبر مو لي هناك ، ومعظمهم مايحب تعديل السيارة ولا الالوان الغريبه .
وايضا الشباب الملتزمين في الخبر طيبين ومتعاونين ، وفي معظمهم يجيك بهدوء ولطف ، وكذلك الهيئه وتجربة معظم الشباب معهم ان هيئة الخبر جدا متعاونه ، ومتفاهمين جدا مع الشباب وقليل المتشددين فيهم .
يعيب اهل الخبر ، ان كثير من الشباب واول مايطلع الجواز سيدا عالجسر ، ويطيح في شغلات ماتنفع للاسف( الحلو مايكمل ) 
.
اللهجة : هناك عدة لهجات ، لكن الرسمي منها اللهجة القريبة من لهجة سكان الاحساء والقريبة بطبعها من سكان البحرين ، وايضا في الاونه الاخيرة ظهرت لهجة قريبه من لهجة سكان الرياض ( آثار شاعر المليون ودعوات بدونة الكلام ) .
بالنسبه للدمام : الدمام قريبه من الخبر بس تختلف اختلافات كثيره وخاصة بالنسبه لسكانها مقارنة بالخبر .
الدمام هي في الاساس اساس المنطقة الشرقيه وفيها تقع الامارة واهم الدوائر الحكوميه ، لكن مستوى الدمام المعيشي والتنظيمي اقل بكثير من الخبر ،
بالنسبة لشباب الدمام : كيف تعرف ان الشاب من الدمام :
1: يغلب عليهم اللون الاسمر ( او البرازيلي )
2: اللكنه اقرب الى البحرينيه او في بعض الاحيان الكويتيه ( متاثرين بالمسلسلات الكويتيه )
3: من ناحية اللبس ما اقدر افتيكم ، لنه متنوع ومعظمهم متأثر بشباب الخبر
4: السيارات : يموتون في شي اسمه تعديل السيارات ، تطييح ترفيع زينون رفع ابواب وو الخ ،وفرة وحدة في كرنيشهم تخليك تفهم هذا الشي وبقوه
كورنيش الدمام : ممل ممل ممل ( بالنسبة لي ) ، ليه ؟ طوييييييييييييل ، وغير كذا الواجهه البحريه معظمها ناس مدري من وين جايين ( احس عن طريق صحون طائرة ) يعني لحد يزعل… اشكال فضائية ،، وغير كذا الانوار ( مدري مين المهندس اللي قص عليهم وحط انوار لونها ابيض )
ونسيت شي : الا وهو ان كثير من ابناء الخبر-الشباب – مايدانون شباب الدمام ، وبينهم زي النعرات الطائفية ، ومدري ليه تقدرون تعلموني ؟ 
واذا تبغى اثبت لك كلامك انا في حي الروضه وتقول اللي يبي التفحيط يروح حي الروضه وبالتحديد شارع انكاس ههههههههههههههه عاد ما لقيت الا هالشارع اللي ولد امه وابوه يدخل الشارع هذا ويفحط لانه زحممممممممممممممممممه دايم وشارع عام يعني مستحيل احد يفحط فيه … واذا على التفحيط اطلع الثمامه والشوارع معروفه ومشهوره اسمائها هناك والتفحيط يكون برى الأحياء غالبا واذا بغيت تتأكد ان كلامك غلط في غلط تعال معي يوم الاربعاء الرياض عشان اصحح لك كلامك وتفكيرك المغلوط . 