ألف مبروك التخرج وحصولك على السي بي ايه مقدما
من وجهة نظري اشوف انك تنتظر لين تكمل المواد المتبقية لك وان شاء الله تعدي السي بي ايه
هناك طلب على المحاسبين طوال السنة من البق فور حسب علمي
رواتبهم ضعيفة
بالنسبة لخريج البكالريوس اتوقع يصفاله من الراتب 8300 و الله اعلم
لكن فكر اكثر من مرة قبل ما تشتغل معاهم خاصة اذا كنت متزوج
الله يوفقك ويكتبلك اللي فيه الخير
الله يبارك لك في عمرك اكونت برنس, انا كان رأيي نفس كلامك, بس الشباب اللي حولي صاجيني وكبروها بعيني, قلت استشير هنا, وان شاءالله شورك وهداية الله, خاصه انه موافق للي كنت افكر فيه.
الحقيقه اني متزوج وعندي طفلين بعد, وعارف انه دوامهم قاتل لكنه طريق احسه لابد لي من عبوره لأكتساب خبره تدعم الشهاده, استغرب ضعف رواتبهم عندنا بالسعودية, هنا اللي يتوظف فرش من دون خبره بالبكلوريوس (بشرط مخلص 150 ساعة علشان يقدر يختبر السي بي ايه) يصفاله بعد ضريبة الدخل حول 3400 دولار يعني 12,750 ريال سعودي شهريا.
واللي عنده ماستر يزيدونه, واذا عدى الس بي ايه تجيه 8000 دولار على البكج السنوي يعني زياده 2500 ريال شهري!! فمادري ليه عندنا بالسعودية مقللين رواتبهم؟
انا اخذت الكؤوب في PricewaterhouseCoopers
وجاني القولون بسبب الضغط اللي كنت عايشه
فشلت فكرة اني اشتغل في البق فور (موليه) على قولة الكويتيين
انصحك مره اخرى بالتفكير اكثر من مره
حاليا أنا اشتغل في شركة ديلويت
الراتب الاساسي يعطوك 7000 ويدفعون overtime (يمكن 2 من الاربع الشركات اللي عندهم overtime)
بدل مواصلات 600
بدل سكن ثلاث رواتب
الشغل فيها ضغط ومتعب يمكن السبب الى قلة الموظفيين وكثرة العملاء
ماهو اي شخص يقدر يتحمل الشغل في Big 4
لكن الخبرة فيها السنة تساوي ثلاث سنوات بشركة عادية ويمكن أكثر
واسمها ثقيل في CV تجيك مقابلات وعروض عمل لانهم يعرفون الاغلبية فاهميين
للمعلومية في نقص في عدد السعوديين في Big 4 و السبب استقالة الكثير لانهم وجدوا وظائف افضل واريح
اذا توظفت عندهم وجبت CPA بعد التعيين فحسب معلوماتي تكون مستحق لترقية وزيادة راتب
اذا عندك اي سؤال احنا في الخدمة
اكونت برنس, انا مصر اني اشتغل بشركة محاسبة, قولون عصبي والا حتى قولون مجنون, ماراح تفرق معاي, انا نفسي اصير بارتنر وبأذن الله ابي اصير بارتنر حتى لو افقد كل شعر راسي (طبعا هذا اللي راح يصير)
ABZ شكلك بتصير صديقي
اتفق معاك في مسألة ضغط العمل وايضا في قيمة الخبره اللي ممكن الواحد ياخذها, ممكن لاهنت تخبرني اذا تعرف كم يبداء راتب شخص معاه ماستر وسي بي ايه بس من دون خبره في المحاسبة. انا عندي خبره فوق 6 سنوات اشتغلت في البنك الفرنسي وشركة العليان المالية وبعدين بمستشفى الحرس مترجم وبعدين طلعت بعثه, هم اشتغلا هنا بأمريكا لمدة سنة بس كان داخل الجامعة وماهوب في المحاسبة.
من الشركة الثانية اللي تعطي اوفرتايم غير ديلويت؟
بالنسبة للراتب حسب معلوماتي الشركة ماتهمها الماستر أو اي خبرة خارج مجال audit خاصة انك ما عندك خبرة محاسبة يعني تتوظف بنفس راتب موظف جديد أو اعلى بقليل
لكن المهم الشهادات المهنية هي اللي تعطيك قيمة عندهم
والشهادة الاهم من CPA هي SOCPA (شهادة المحاسب القانوني في السعودية)
لأن القانون السعودي لا يسمح لاي شخص يوقع على القوائم المالية الا اذا كان سعودي وعنده SOCPA (الشريك الاجنبي مايقدر يوقع القوائم المالية)
اذا تبغى معلومات عن الشهادة هذا موقعهم http://www.socpa.org.sa/
اما بالنسبة لموضوع الاوفرتايم انا ما اتذكر الشركة الثانية يمكن pwc أو KPMG
لكن افضل شركتيين في السعودية هي E&Y و Deloitte حاول يكونوا خيارك الأول
في كل الشركات يتوقعون انك تشتغل زيادة على الدوام وقت الحاجة
E&Y ما يعطون اوفرتايم لكن يعطون مكافاة آخر السنة لكن حسب معلوماتي انهم سنة يعطونك وسنتين لا
Deloitte يعطوك افورتايم لكن مايعطوك مكافاة آخر السنة
جزاك الله كل خير وبيض الله وجهك انك ماقصرت, انا عندي خبر انه رواتب شركات المحاسبة قليل بس 7000 اساسي مره نازل, فيه واحد ما اعرفه بشكل شخصي بس كان مبتعث, هم بالاساس متخرج من فيصل محاسبه وبعدين جا بعثه واخذ ماستر, طبعا ما اخذ cpa بس الماستر, قابلته العام في الصيف لما كنت نازل وسولفنا شوي ولما سألته عن وين توظف قال بشركة محاسبة بالرياض, ماقال اسمها بس قال انهم اعطوه دوره بسويسرا لمدة 3 اسابيع, وقال من غير ما أسئله انه يجيه 16 الف وحقيقة تفائلت بكلامه.
السوكبا هذه ناوي عليها بعد اكمال سنة خبره, لأني ناويها بعد cpa اختبار المحاسبة والتدقيق مره طويلين واحس أني اخذ اختبار المعايير بدل المادتين ذولا اسهل واروق.
ممكن لاهنت تخبرني اذا ديلويت عندهم عملاء في مجال البترول, الطاقه او البتروكيماويات, مايحتاج تسمي شركه اذا نظام ديلويت مايسمح
تحياتي لك والحقيقة افدتني كثير ولا يهون اكونت برنس انه ماقصر بعد.
بالنسبة للراتب الاربع الشركات رواتبها قريبة من بعض ورأي الخاص ديلويت الافضل
بالنسبة للعملاء انا اشتغل في ديلويت جدة نسبة شركات البتركيماويات قليل
لكن الشركة عندها عملاء من الشركات البتركيماوية في رابغ وينبع لكن ماعندي معرفة باسمائهم لاني ما احب اشتغل على عميل خارج جدة
لكن يكفي ان اقول ان نسبة كبيرة جدًا من مجموعة شركات بن لادن هم عملاء بديلويت مع العلم ان الشركات الرئيسية (الشركات الأم) في المجوعة هي عملاء لدى ديلويت
بالاضافة الى الخطوط السعودية و البنك الاسلامي للتنمية وهذا البنك تديره دول وليست شركات
وللمعلومية اغلب شركات المساهمة تغير المحاسب القانوني كل 5 سنوات اتباعا لقانون امريكي يحمي حقوق المساهمين
يعني الشركات البتروكيماوية ستشتغل عليها اذا انت في الشرقية
وتشتغل على البنوك اذا كنت بالرياض مايهم اي من الشركات الاربعة كنت متوظف فيها
لكن E&Y و Deloitte لهم نصيب الأسد
حلو الكلام, يعني راتب طيب وعملاء على الكيف, بس بالنسبة للتقديم انا لسه ماتخرجت, ولو تشوف بداية كلامي بالموضوع انا اصلا سألت عن فترة التقديم, الاخ اكونت برنس ادلى برايه واللي انا متوافق(ن) معاه فيه بس اذا عندك راي ثاني ياريت توضحه اكثر, خاصه أني لازلت بأمريكا ولاعندي وسيلة اتصال الا رقمي هنا والحقيقة ماظنيت انهم بيتكلفون اتصال دولي علشان وجهي.
ماعليك احنا اخوان نساعد بعض
بالنسبة للتقديم بالفعل اغلب الشركات توظف الآن خاصة بشهر 9 يبدأ موظفين جدد
و أنا انصح تقدم الآن لأن الشركات الأربع عندها نقص كبير في السعودة خاصة في ديلويت
وعادي تقدم وانت مازلت طالب لكن لازم تكتب موعد التخرج في cv وانك تدرس cpa
واذا قدمت لازم تكون متواصل معاهم يعني اتصل عليهم
احتمال بسيط جدًا انهم يقولوا لك كمل cpa بعدين تقدم على الوظيفة لكنه احتمال ضعيف
للمعلومية قليل اللي يعرفون انك في حال خلصت socpa أو cpa يعطوك مبلغ مابين 10,000 الى 20,000 غير متاكد من المبلغ بالضبط لكن الشريك قال لي هذا الاسبوع اذا خلصت socpa نعطيك 20,000 مقابل التكاليف اللي دفعتها على الدراسة
ولا تنسى الترقية وزيادة الراتب وفي الاخير الخيار لك
وبأذن الله ابي اصير بارتنر حتى لو افقد كل شعر راسي (طبعا هذا اللي راح يصير)
وبعدين طلعت بعثه, هم اشتغلا هنا بأمريكا لمدة سنة بس كان داخل الجامعة وماهوب في المحاسبة.