بسم الله الرحمن الرحيم …
بداية … أبارك لكل الطلاب نهاية السنة الدراسية وخصوصاً طلاب تالت ثانوي وبالتوفيق إن شا الله في التحصيلي …
قبل سنة … كنت طالب ثانوي … أتخرجت … قدمت على أرامكو … دورت في النت عن أي معلومة عن برنامج الابتعاث الخارجي … للأسف ما لقيت إلا شويييييية … فعشان كدا حبيت إني أنقلكم دحين تجربتي خلال سنة دراسية في برنامج الابتعاث الخارجي في أرامكو …
في البداية … إيش هوا برنامج الابتعاث الخارجي أو الـcpc …؟
باختصار … هوا برنامج يجهزك ويخبرك هل تنفع تطلع تدرس برا وتتخرج بتفوق وهل تستاهل كل المبالغ اللى حتدفعها عليك الشركة عشان ترجع وتشتغل في الشركة …
طبعن الدراسة تكون سنة في الظهران … وبعدين تطلع برا تدرس البكلوريوس وترجع تشتغل في الشركة …
أنا اليوم كتبت الموضوع وأنا ما زلت في الظهران … خلصنا الدراسة بس باقي الاختبارات النهائية الأسبوع الجاي إن شا الله …
طبعن في البداااية … لازم تعرف إنو مجرد قبولك في الـcpc يدل على إنك من أفضل الطلاب السعوديين … وخلي في بالك إنو لو قررت إنك تدرس في الـcpc الدراسة ما حتكون سهلة إطلاقاً … أقدر أجزم إنها أصعب مرحلة ممكن تواجهها في حياتك … بس خلي في بالك إنها كلها سنة وحدة بس وبعدين تعيش أمير …
أدخل في الموضوع >> أما كل دا مقدمة …!!
حأوصف كل البرنامج بداية من التقديم وانتهاءً بالتخرج …
أول شي زيو زي أي جامعة … التقديم يكون من النت … فورم بسيط تعبي فيلو بياناتك الشخصية …
أهم الأشياء اللى في التقديم إنك حتحتاج ترفعلهم صورة من الشهادة ومن بطاقة الأحوال … وكمان حيكتبولك كل التخصصات الموجودة ونتا ترتبها حسب الأولوية … طبعن لازم أقل شي تختار تخصصين … والباقي باختيارك … بس أحب أنوه إنك لا تختار أبداً تخصص إنتا ما تبغا تدرسو … مو لازم تعبيها كلها … لأنو لو مثلاً درجاتك كانت تهيأك إنك تدرس هندسة كيميائية أو ميكانيكية أو أي هندسة بس إنتا حطيت في الاختيارات جيولوجيا مثلاً … احتمال كبيييير إنهم يختارولك جيولوجيا … فحاول إنك تختار التخصصات اللى إنتا فعلاً تحبها أو ما عندك مانع إنك تدرسها …
شي تاني أحب أنوه عليه … أرامكو ما يطلبو تحصيلي … وشروطهم كمان سهلة … لكن المقياس الرئيسي هوا اختبارهم …
بعدين يحددولك موعد ومكان الاختبار … الاختبار يسير في المدن اللى فيها مركز تدريبب تابع لأرامكو ( الظهران - الرياض - جدة - ينبع - ومدري فين كمان …!! ) …
الاختبار يتكون من قسمين … انجليزي ورياضيات … الاختبار هوا اللى حيحدد مستواك لو انقبلت ويحدد المواد اللى تدرسها بعد قبولك … شد حيييييلك في الاختبار … وروح ونتا مصحصح ونشيييط …
طبعن الاختبار كلو اختيارات … أتوقع 5 اختيارات لكل سؤال … ما أفتكر عدد الأسئلة … لكن كان مو صعب مرة … المطلوب منك إنك تعدي المستوى التالت في الإنجليزي …
قسم الرياضيات ممتع جداً … أسئلة أغلبها من تالت ثانوي ( تكامل - تفاضل - نهايات - قطوع - معادلات - … ) … الأسئلة تحتاج تركيز … لا تجاوب على طول … فكر واقرا السؤال أكتر من مرة … أغلب الأسئلة فيها لفات … ونفس الفكرة … 5 اختيارات لكل سؤال … أتوقع إنو 40 سؤال رياضيات … المطلوب منك إنك تعدي المستوى الخامس في الرياضيات …
بعد الاختبار يحددو موعد النتايج … بس طبعن حط في بالك إنها تطلع بعد أسبوع من الموعد …!! ^ــ^
توصلك الرسالة على إيميلك …
الطلاب 4 أصناف في النتايج …
الصنف الأول : ناس يرسلولهم يقولهم إنهم مقبولين في التخصص الفلاني … ويدوك موعد تروح توقع العقد مع الشركة …
الصنف التاني : ناس يقولولهم مقبولين لكن مو في التخصص المرغوب الأول ولا التاني … وبرضو يحددولك موعد تروح تختار التخصص من جديد … وبعض الأحيان يدقو عليك ع الجوال بدل ما يرسلولك الإيميل …
الصنف التالت : ناس في قائمة الانتظار … ويدوك موعد يردو عليك فيه رد نهائي … بس أقدر أقول إنو 99٪ إنك حتنقبل … لأنو طلاب كتيييير يدخلو الاختبار بس كدا وينسحبو بعدين … يعني طول بالك …
الصنف الرابع وهما اللى ما جابو الشروط : يرسلولك إنك ما انقبلت … وأحياناً ( مو دايمن ) يرسلولك بعدين يقولولك تعال قبلناك … بس احتمال ضعيف … ودا الكلام يسير أحياناً بعد ما تبدأ الدراسة خلاص … أو بعدها بأسبوع …
بعدها تروح توقع عقدك لو كنت من الصنف الأول … ويحددولك موعد للمقابلة …
ولو كنت من الصنف التاني … تروح تختار من جديد … وبعدها بتقريبن أربعة أيام يعطوك التخصص النهائي … بس برضو بنسبة 80٪ تقدر تغير تخصصك بعدين … وبعدين توقع عقدك … وبعدين المقابلة …
أنا عن نفسي … كنت من الصنف التاني … بعد ما اخترت التخصص المرة التانية ردولي إني أدرس هندسة كمبيوتر … وبعدها بأسبوع اتصلو عليا وقالولي فيه مجال إنك تدرس هندسة كيميائية ( اللي هيا اختياري الأول ) … ووافقت وروحت وقعت عقد جديد …
العقد يكون مكتوب فيلو الإدارة اللى حتشتغل فيها بعد ما ترجع … وإدارتك هيا اللى حتدفع كل تكاليف دراستك …
المقابلة تكون جداً بسيطة … أسئلة عااامة … وما أتوقع إنهم ممكن يرفضوك بعد المقابلة … كل الهدف من المقابلة إنهم يتأكدو إنو ما عندك مشكلة تدرس برا …
بعدين يحددولك موعد … تروح تسمع محاضرة من طلاب سابقين … مفيدة جداً …
بعدين يحددولك موعد تسلم فيه شهادتك ( أو صورة منها ) وصورة من الجواز وشهادات أولى وتاني ثانوي وبعدين تطلع بطاقة أرامكو وتاخد ورقة الإسكان …
بالنسبة للشهادة … أغلب الطلاب يكون رسل الشهادة لأي جامعة انقبل فيها … أرامكو تقولك مافي مشكلة … أدينا صورة من الشهادة … وبعد ما تبدأ الدراسة روح الجامعة وأسحب ملفك وجيبلنا الشهادة الأصلية …
بالنسبة للبطاقة … للي عندو خبرة … البطاقة زرقة … يعني أرامكو يعتبرونا موظفين من الدرجة 3 …
معلومة … دراسة أرامكو تبدأ قبل كل الجامعة ( دفعتنا بدأنا رابع يوم العيد …!!!! ) … وننتهي آخر ناس … يعني لازم تكون متهيئ لدا الشي …
بعد ما تجي هنا الشرقية … تستلم سكن …
السكن هنا عبارة عن غرفة ( سريرين ) وحمام ومطبخ … تقدر تختار روميتك اللى تبغاه … الغرفة في منطقة المنيرة داخل كامب أرامكو … السكن يعتبر سيء إلى حد ما … أقيمو 4 من 10 …
سلبيات السكن :
جدران خشب مدري جبس … شي سيء … تسمع كل الأصوات اللى في الممر … وشبابيك تدخل موية أحياناً مع المطر … مع إنو الغرفة جديدة وإنتا تكون أول واحد يسكنها … والأثاث رديء … الممرات ضيقة جدا جداً … الجدران مهي عازلة … تسمع أصوات السيارات أحياناً … تسمع اللى فوقك واللى تحتك …! مافي نت في السكن … يفضلو موبايلي كنكت …
إيجابيات السكن :
حمام لكل غرفة … مطبخ ( تلاجة وفرن ومغسلة ) … قريب من مباني الدراسة ( دقيقتين بالسيارة … وفيه باصات توديك وترجعك ) … مواقف كبيرة …
المرافق الموجودة في المنيرة : ملاعب ( تنس أرضي - تنس طاولة - سلة - قدم - طائرة - بلياردو - سنوكر ) … مركز رياضي ( جيم ) … مطعم أرامكو ( بوفيه مفتوح بسعر جيد ) … مغسلتين … حلاق … مركز بريد … مسبح …
طبعن في كل عمارة فيه 4 غسالات و 4 نشافات مجاناً …
شي تاني … اللبس موحد … البنطلون من عندك … بس التيشيرت من عندهم … يدوك 5 تيشيرتات عليها شعار أرامكو … لونها كحلي ( أزرق غامق ) … ولبس الجزمة إجباري …
يتبع …
