السلام عليكم ورحمة الله وبركاته
اتمنا ان الجميع في تمام الصحه والعافيه
كلنا نعرف ان كلما زاد عدد الخريجين سواء كانوا هندسه او اي تخصص اخر زادت المنافسه وزادت المقارنه وهذي سنه الحياه.
كما قال سبحانه تعالى (خِتَامُهُ مِسْكٌ ۚ وَفِي ذَٰلِكَ فَلْيَتَنَافَسِ الْمُتَنَافِسُونَ) فذكر في هذه الايه المنافسه والمعروف ايضا ان لكل مجتهد نصيبه من التعب. ( فارجوا من الجميع عدم الحكم على انفسهم وعلى هذا الموضوع بخلاف ذلك).
كلامي اليوم ودي اخصصه للبش مهندسين الي تخرجوا من الجامعات او الي بيتخرجون قريب, وان لم تكن منهم فاهلا بك بين اخوانك.
طبعا مثل ما الكل شايف اعداد خريجين تخصص الهندسه في ازدياد, وعليه نسبه البطاله للاسف في ازدياد, طبعا الاسباب كثيره مثل الاقتصاد الحالي والواسطه والفساد ونوعيه المخرجات واللسته تطول.
انا ودي اتكلم عن الاسباب الشخصيه للعطاله (اسباب كانت بسبب الشخص نفسه) مثل المعدل والخبره والى اخره بغض النظر عن الظروف المحيطه بنا الي ما نقدرنغيرها مثل الاقتصاد في ديرتنا.
انت كخريج حديث المعدل هو بعد الله يمكن يكون سبب انك تتعطل لفتره من الزمن لين تلقا الوظيفه.والوظيفه الاولى يمكن تكون الوظيفه الي ما تبغاها بعد. فما يحق لك تصيح و تشكي (الا لخالقك) وتربك العالم حولك وتبث السلبيه في نفوسهم وتحسسهم ان الوضع مزري جدا وانت معدلك 2 من 4
حط في راسك انه في خريجين هندسه كثيره معدلهم فوق 3 وتعبوا لين يوصلون لهذا الشي فهم ان كنا عادلين المفروض يكونون في اول الصف والفرص راح تكون اكبر واكثر لهم.
اسم الجامعه يفرق, فما تقدر تقول ليه ما توظفت وانت متخرج من جامعه الجوف وغيرها مقارنه بالخريجين من الابتعاث وخريجين البترول واذا انت مبتعث ما تقدر تقارن بين خريج هارفارد وخريج مونتانا. فهذولا ما تخرجوا من جامعه صعبه ولها سمعتها الا بعد ما اخذوا الطريق الاصعب.
بالاضافه, في اثناء فتره وجودك في الجامعه كان معاك طلاب يشتغلون ويدرسون وطلاب ياخذون كواب او انترنشب, فهذا عنده خبره عمليه ولو بسيطه وعنده مهارات تطورت وصار مستواها افضل بكثير من مستوى نفس المهارات الي عندك لانه اشتغل وعنده خبره.
وبعد, كان فيه معك طلاب بالجامعه ياخذون دورات قويه ويدفعون عليها فلوس ووقت وجهد وكان فيه طلاب ياخذون كلاسات قويه تنحط بالسي في ولها وزنها.
وايضا لا تشتكي اذا قدمت على 30 شركه وتقول ما فيه شي, غيرك يقدمون على 200 و300 شركه ويعرف كيف يكون شكل السي في المرتب وايش المفروض يكتب وما يكتب, ولا تشتكي اذا رحت الانترفيو وانت منت جاهز, غيرك يبحث ويجرب ويعرف كيف يتجهز وايش المفروض يتكلم وما يتكلم في الانترفيو.
فكل حاجه تسويها لها قيمه ولها وزنها واجرها, كما قال سبحانه في اياته ( إِنَّا لا نُضِيعُ أَجْرَ مَنْ أَحْسَنَ عَمَلا) وقوله تعالى (وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ).
في نفس الوقت اعرف ان الحياه ماهي عادله دايم, اعرف شخصين ( معرفه قويه)واحد تخرج بمعدل 2.6 ولا عنده اي خبره ولا انتشرب ولا شي وموظف الان في اطلق وظيفه وراتبه ما شاء الله ممتاز جدا, والشخص الاخر بمعدل 3.3 ومعاه 2 انترنشب ولا توظف الى الان.
ولكن سعيك واجتهادك في اداء كل هذه الاشياء هو لراحه بالك واقتناعك في اخر المشوار انك سويت الي عليك وبزياده وواثق بان وعد الله حق وفرجه قريب.
انا اكتبلكم هذا الكلام وانا باقي لي شهر واتخرج من الجامعه, بالعقل انا المفروض ما اتفلسف لاني ما جربت الطريق, ولكن من باب الايجابيه يا اخوان والصراحه الي ان شاء الله بتريحني وتريحكم, وفي الاخير الشخص يجتهد والارزاق بيد الله سواء كانت بعد عطاله شهر او شهرين او حتى 10 سنين. يمكن سبحانه يرزقك في غير الي انت كنت متصوره ( وهو انك تصير مهندس تستلم حزمه فلوس اخر الشهر) ويرزقك في شي ثاني تجاره او عمل ثاني او غيره وتصير تستلم رزم فلوس بدل حزمه وحده.
اعتذر عن الاطاله, وبعد هذا الكلام والنصايح ودي انهيها بسوال.
انا كخريج حديث عارف ان المعدل تقريبا هو اهم شي خاصه في السعوديه في الوقت الحالي, محدثكم بيتخرج ب 3.2 من امريكا فهل هذا المعدل في سوقنا يعتبر كويس؟
اتمنا من عنده الاجابه يفيدنا كما افدتكم باذن الله.
واسال الله العلي العظيم ان يرزقكم ويرزقنا الجنه ويجيرنا من النارجميعا ويسهل امورنا في هذه الدنيا ويفرج كربنا.
والسلام عليكم ورحمه الله وبركاته
