سلام عليكم ورحمة الله وبركاته , حفظكم الله ورعاكم .
أنا قدمت في كل مكان في كل الشركات وفي كل القطاعات والكليات العسكرية والمؤسسات والقطاع الحكومي حتى الجمعيات الخيرية قدمت عليها لايوجد اي رد منهم !! ولا حتى بحرف … جربت اقدم يدوي نفس الموضوع حط ورقتك ونتصل عليك . طبعا بيتصلوا عليك !
مررة مافي وظايف !!
راحت 17 سنة من حياتي هدرا دون اي فائدة !! صرت اخذ مصروف من أمي ومن أخي الصغير في الإبتدائي وانا رجل كبير !!
تعب ومذاكرة وجد وإجتهاد لسنوات وهذا النهاية … لا أريد شيئأ من هذه الدنيا …
لا أريد تحطيم أحد هذا الكلام انا واجهته وهو مخصص لي فقط .
صرت أستحي وأنحرج من أهلي وأقاربي وأصدقائي وأي شخص عندما يقولون لي ليس لديك عمل وانت كبير حرام عليك .
أصبحت إنسان لاقيمة له وليس لي فائدة تذكر وليس لدي هدف ولا ان اكون عائلة واكون اب المستقبل .
أصبحت أنام وأصحى فقط دون طموح أو هدف أو تحقيق أحلام .
أردت أن اكون فعالا وقيماً في المجتمع ولم أستطع إلا أن أكون بلا قيمة .
جعلت كل دراستي وتعبي دون فائدة تذكر وأصبحت كأنها هباءاً منثورا .
وددت أن لم تنجبني هذه الحياة بهذا الشكل المؤلم .
أردت أن أسعد أبي وأمي وأهلي وأن أسعدهم وأرفع رأسهم عالياً بالوظيفة ولم أستطع فعل شيء .
كلها كانت مجرد أحلام فقط بكرة تصير مهندس او دكتور فقط اوهام وتخيلات .
حسبنا الله ونعم الوكيل …
الله يوفق الجميع لكل خير وأسئل الله رب العرش العظيم ان لاتذوقوا شيء من ذلك والله يرزقكم بكل خير وافضل الوظائف والمناصب يارب .
الله يعينك اخوي شوف مكاتب طاقات مع انه عندي شهاده هندسيه لكنهم كانوا يرسلوا لي مقابلات على وظايف خارج تخصصي مثل كاشير وغيره انا اشوفها شي يمشي الحال على الاقل ماتضطر تطلب من احد وتستمر في البحث في نفس الوقت. سؤال اخي انت متى متخرج؟ وايش تخصصك وهل حطيتك سيرتك الذاتيه في الموقع هنا علشان يساعدونك الاعضاء فيها؟ وبالتوفيق لك ولكل باحث عن وظيفه وقرار التوطين بداية السنه القادمه ان شاء الله راح يحل نسبه من العطاله الموجوده.
يعني انت متخرج في وقت الازمه وماصار لك فتره طويله انا كنت احسب صار لك سنه او سنتين والتوظيف واقف ما يقارب ٧ اشهر تقريبا بسبب الجائحة فحالتك تعتبر مو غريبه وللاسف في كثيرين مثلك فعليك بالصبر اخوي والتوظيف بدا يرجع تدريجيا اهم شي ثقتك بان الله ماراح يضيع لك تعب ومثل ماقلت لك حط سيرتك في الموظوع المثبت علشان الشباب يساعدوك فيها
اخوي أولا خل ثقتك بربك ثم بنفسك كبيرة وأفعل بالأسباب والمقصد هنا مو بس تقدم على وظايف وتنتظر لأ , طور من نفسك بأي شكل من الاشكال حتى لو مجرد انك تقرأ كتاب عشان تزيد من ثقافتك ومعلوماتك أو حتى تطور من لغتك لو ضعيفة.
انت تقول قدمت على كل الشركات والقطاعات ومحد رد عليك , طيب هل بحثت عن المشكلة؟ هل يوجد نقاط ضعف تحتاج تطوير؟
لاتنسى كورونا مثل ماقال اخونا ENG_KSA.
ثانيا مافي شيء اسمه 17 سنة ضاعت هدرا لا عزيزي , شهادتك هذه لحالها إنجاز واثبات على مكانتك الاجتماعية والثقافية وغيرك كثير يتمناها !!
تدري متى تصير كل ذي السنين هدرا؟ لم تستسلم للظروف وتبدأ تقول ذا الكلام.
صدقني مافي انسان غيرك أدرى بالمواقف والتحديات الي واجهتها عشان توصل الي وصلته , أي شخص يقولك حرام انت كبير ومن ذا الكلام اقل شيء تقدر تسويه انك تبتسم في وجهه ابتسامة ثقة ان ربك قادر يغير الموازين بلمح البصر.
اخوي الأنسان مايدري رزقه وين مكتوب , مو شرط تكون وظيفة هندسية. أي شيء ثاني ممكن تفكر فيه.
آخر شيء حاب اقوله لك حاول تغير من اهتماماتك وانك تطور مهارات جديدة المصادر في الوقت الحالي لاتعد ولا تحصى. لا تضيع وقتك في الندم والتحسر أبدا
وربي يكتبلك ويكتبلنا الخير.
الله يعينك أخوي
حالة طبيعية نمر فيها و طول بالك شوي
أنا توظفت بعد 11 شهر عطالة و بشركة مشي حالك , الحمدلله بالتخصص و أخذ راتب مشي حالك لكن الحمدلله
لا تفكر أنك تقدم اليوم بكرة يردون عليك
و الله بعض الشركات يتصلون علي لما أروح اكتشف أن قدمت عليهم قبل سنة أو ست شهور
تقدر تمشي حالك بوظيفة جانبية مثلا بالمطاعم ولا الأسواق الى أن الله يفرجها من عنده
صديقي بالجامعة توظف ببنك و بعد سنتين و نص حصل وظيفة هندسية كويسة
عرف أنه لو جلس عاطل راح يتجنن و يتعب نفسيا
نصيحة أخيرة : أرجوا قبل ما كتبت الموضوع هذا أنك اشتكيت لربك الكريم الرازق الرحمن الرحيم
ادعي الله عزوجل نهار و ليل بكل وقت و خصوصا اخر الليل وربنا يوفقك
أبداً أخي لا تستحي اذا انت بين أهلك وما مديت يدك لغريب وثاني شي حنا تخرجنا في أزمة كبيرة والكل يعرف هالشي وكثير من زملائي الخريجين من مختلف التخصصات والمعدلات والمدن ما حصلوا وظايف والحال نفسه … فلا تخاف طبيعي جدا الاوضاع تكون كذا. خذها فترة نقاهة وتطوير لنفسك ووسع صدرك ولا تاخذ الأمور بصعوبة ورزقك باذن الله جايك
شكلك خريج ثانوية من وقت ما قلت 17 سنة … خش معهد تقني او اي شيء بما ان الفنيين عليهم طلب وخلال دراستك قدم على وظائف اذا جتك وظيفة عسكرية او اللي يكون رح لها واترك دراستك او تتخرج دبلوم اذا واصلت … وسالفة التقديم على الوظائف ولا يجي رد لان غالبا اعلانات التوظيف غير حقيقية او قديمه بالذات اللي عن طرق الايميل.
انا قدمت عن طرسق الايميلات فوق 400 شركة محد رد الا شركتين وحده الجامعة مرسلتها ووحده ردوا قالوا قدم من الموقع… اما اللي مقدم عليها من موقع الشركة جيد على الاقل فيه رد سواء بالرفض او اكمال الاجراءات وخلال الفترة هذي حتى اللي عطوني قبول مبدئي موقفين كل الاجراءات بس عادي لحد الان باقي اقدم سواء عن طريق الايميلات او اعلانات التوظيف… المهم ما اعطي نفسي عذر محد يرد او مافيه توظيف… بعض الشركات عندها ارقام تواصل دق عليهم منت خسران ممكن يعطونك طرقة تقديم على الاقل
قال تعالى “سَيَجْعَلُ اللَّهُ بَعْدَ عُسْرٍ يُسْرًا”
بدأت بهذي الآية لانها خير من كل الكلام اللي بتسمعه مننا او من غيرنا هذا أولاً …
كلنا نعرف ان الدقيقة تمر على العاطل كأنها سنة ، وكلنا نعرف ان كل شخص كان راسم له خطة وعنده طموح يبغى يحققه
لكن يا الطيب الواحد لابد انه مايقنط من رحمة الله … ولابد بعد التخرج من الجامعة من فترة الواحد يبحث عن عمل الاغلب تطول معهم هالفترة لكن بعد فضل الله وتوفيقه تمشي امورهم … وانت تخرجت هالسنة يعني في عز ازمة شح الوظايف … حتى الموظف مو ضامن مكانه … ولكن الامور ان شاء الله في تحسن …
اللي حاب اقوله لك يالغالي ان الكلام اللي كتبته فيه ظلم لنفسك كثير وهذا مايجوز … انت اجتهدت وتخرجت بمعدل عالي وبتخصص مهم ومن جامعة محترمة … اما قضية الوظيفة فلازم تعرف ان الرزق حتى لو هربت منه مثل ماتهرب من الموت راح يدركك … فلذا اجعل أملك بالله اولا واخيرا واصبر ومع الصبر اسعى وراح تنفرج ويأتيك أكثر مما ترجوه باذن الله
تفكيرك سقيم اعذرني … انت مثل اللي يقول انطق في البيت رزقك مكتوب ههههههه
ولو فعلت الاسباب وما توظفت بتقول هش لا تزعل ولا تكلم احد اقبل باللي يجيك مكتوب لك الفقر وعيشة المتخلفين اقعد في البيت او رح المسجد واشتغل دعاء فقط هههههه
انت تتوقع ردك هذا بيجعل العاطل مرتاح نفسيا عقليا بدنيا روحيا؟
وين السقم في تفكيره مااشوفه, رزقك مكتوب وبيجيك وبنفس الوقت الفعل بالاسباب
محد راح يرتاح عقليا بدنيا وروحيا الا بالدين لو تملك من الدنيا ماتملك , هل معناته اني من بداية السنة الميلادية قاعد ماتوظفت ومستانس لا اكيد ودي اتوظف واكمل حياتي باسرع وقت ولاكن عارف ان رزقي مكتوب ولا راح يضيع واسعى بفعل الاسباب
+ ماني شايف وين الرابط بين الفقر وعيشة المتخلفين.
